အာဇာနည်နေ့အတွက် ရန်ကုန်မြို့မှာ လုံခြုံရေးတင်းကျပ်

မနက်ဖြန် ဇူလိုင်လ ၁၉ ရက်နေ့မှာ ကျရောက်မယ့် ၆၃ နှစ်မြောက် အာဇာနည်နေ့ အခမ်းအနားတွေ မကျင်းပမီ အကြိုနေ့ဖြစ်တဲ့ ဒီကနေ့မှာတော့ ရန်ကုန်မြို့အနှံ့ လုံခြုံရေး အစီအမံတွေကို တွေ့မြင်ကြရပါတယ်။ ကွယ်လွန်သူ ဗိုလ်ချုပ်အောင်ဆန်းနဲ့တကွ အာဇာနည် ခေါင်းဆောင်တွေ ကျဆုံးခဲ့ရတဲ့ ၆၃ နှစ်မြောက် အထိမ်းအမှတ် အခမ်းအနားတွေကို အာဏာပိုင်တွေက ကျင်းပဖို့ စီစဉ်နေသလို ဗိုလ်ချုပ်အောင်ဆန်းရဲ့ သမီးဖြစ်သူ ဒေါ်အောင်ဆန်းစုကြည် ဦးဆောင်တဲ့ အမျိုးသား ဒီမိုကရေစီ အဖွဲ့ချုပ်ကလည်း အာဇာနည်နေ့ အထိမ်းအမှတ် အခမ်းအနား သီးခြား အစီအစဉ်တခု ကျင်းပသွားဖို့ ရှိပါတယ်။ အကြောင်းစုံကို ဆက်သွယ်စုံစမ်းထားတဲ့ မသင်းသီရိက တင်ပြပေးထားပါတယ်။

မနက်ဖြန် ကျရောက်မယ့် ၆၃ နှစ်မြောက် အာဇာနည်နေ့ အခမ်းအနားအတွက် ရန်ကုန်မြို့မှာ လုံခြုံရေး တင်းတင်းကျပ်ကျပ် ချထားတယ်လို့ ပြောပါတယ်။ အာဇာနည်နေ့ အခမ်းအနား ကျင်းပမယ့် ရွှေတိဂုံဘုရား မြောက်ဘက်မုခ်နားက အာဇာနည်ကုန်းဘက်၊ နောက် ဘုရားဝန်းကျင် တလျှောက်နဲ့ မြေနီကုန်း စမ်းချောင်းဘက်တွေမှာ ဒီကနေ့ လုံခြုံရေးတွေကို ၀တ်စုံပြည့်တွေနဲ့ တွေ့ရတယ်လို့ ရန်ကုန်မြို့ခံတဦးက ပြောပြပါတယ်။

“လုံခြုံရေးကတော့ အများကြီး ချထားတယ်ဗျ။ အာဇာနည်ကုန်း ပတ်ချာလည်၊ ရွှေတိဂုံဘုရား၊ ပြည်သူ့ရင်ပြင် အဲဒီပတ်ဝန်းကျင်တွေ၊ နောက် M3 ပတ်ချာလည်၊ ရွှေဂုံတိုင် အဖွဲ့ချုပ်ရုံး ပတ်ချာလည်မှာရော တွေ့ရတယ်ဗျ၊ လုံခြုံရေးတွေ၊ ယူနီဖောင်း အပြည့်အစုံနဲ့ ၀တ်ထားတာကို တွေ့ရတယ်။

“မြို့ထဲမှာတော့ တင်းတင်းကျပ်ကျပ် မရှိဘူး။ ဒါပေမဲ့လည်း ချတော့ ချထားတယ်။ တင်းတင်းကျပ်ကျပ် ရှိတာတော့ အာဇာနည်ကုန်း ပတ်ဝန်းကျင်မှာတော့ အများကြီးပဲ။ ကျနော်တို့ နောက်ထပ်ကြားတာလည်း အရင်တုန်းကဆိုရင် ရွှေဂုံတိုင်ရုံးချုပ်မှာ အခမ်းအနားလုပ်တာပေါ့၊ အခုတော့ NLD က အဘ ဦးတင်ဦးအိမ်မှာ ပြောင်းပြီးတော့ သူတို့ အခမ်းအနားလေး လုပ်မယ်လို့ သိရတယ်ဗျ။ ဦးတင်ဦး အိမ်နားမှာလည်း လုံခြုံရေးတွေ အပြည့်အ၀ ချထားတယ်လို့လည်း သိရတယ်။”

မနက်ဖြန် ကျင်းပမယ့် အာဇာနည်နေ့ အခမ်းအနားကိုတော့ ဗိုလ်ချုပ်အောင်ဆန်းရဲ့ သမီးဖြစ်တဲ့၊ နေအိမ်မှာ ဖမ်းဆီးထိန်းသိမ်း ခံထားရတဲ့ ဒေါ်အောင်ဆန်းစုကြည်ကို တက်ရောက်ဖို့ ခုချိန်ထိ အကြောင်းကြားတာ မရှိသေးဘူးလို့လည်း သိရပါတယ်။ တခါ ဒေါ်အောင်ဆန်းစုကြည်ရဲ့ NLD ပါတီကိုလည်း အခမ်းအနားတက်ဖို့ ဖိတ်ကြားခြင်း မရှိပေမဲ့ ၂၀၁၀ ရွေးကောက်ပွဲဝင်မယ့် နိုင်ငံရေးပါတီတွေကို တက်ရောက်ဖို့ ရွေးကောက်ပွဲ ကော်မရှင်က ဖိတ်ကြားခဲ့တယ်လို့လည်း သိရပါတယ်။

အာဇာနည်နေ့ အခမ်းအနားကို နိုင်ငံတော် အခမ်းအနားတရပ် အနေနဲ့ ကျင်းပပေမဲ့ မြို့တော်ဝန် အဆင့်လောက်ကို အမြင့်ဆုံးထား ကျင်းပနေတာ နှစ်အတော်လေး ရှိနေပါပြီ။ ဟိုးအရင်တုန်းကလို အာဇာနည်ကုန်းမှာ ပြည်သူလူထုတွေ တိုးမပေါက်အောင် ဂါရ၀ပြုကြတဲ့ မြင်ကွင်းမျိုး မတွေ့ရတာလည်း ကြာလှပြီလို့ သူက ဆက်ပြောပြပါတယ်။

“မတွေ့ရတော့ပါဘူး၊ အဲဒါတွေဆို လုံးလုံး ပျောက်ကွယ်သွားပြီ။ အခုဟာ အာဇာနည်ကုန်းမှာ လူတွေ အလေးပြုဖို့ နေနေသာသာ အနားတောင် ကပ်လို့မရတော့ဘူး။ သက်ဆိုင်ရာ လူတွေလောက်ပဲ လုပ်တယ်။ ၉ နာရီ၊ ၁၀ နာရီ ပတ်ဝန်းကျင်ဆို ပြီးသွားတာပဲ။ သူတို့က အခမ်းအနား ပြီးသွားတာနဲ့ တခါတည်းပိတ်၊ အဲဒီအထဲကိုလည်း ၀င်လို့မရ၊ အဲဒီနားလည်း ကပ်လို့မရ။ လုံခြုံရေးတွေ ဒီလောက်ချထားတာ ဘယ်လိုမှ သွားလို့မရဘူး။ ဗိုလ်ချုပ်ပြတိုက်ကို ကြည့်ဖို့က တော်တော်ခဲယဉ်းတယ်။

“အဲဒီလိုဆိုတော့ လူတွေက အာဇာနည်နေ့ကို တော်တော်များများ သိဖို့ တော်တော်ခဲယဉ်းသွားတယ်။ ဘာဖြစ်လို့လဲဆိုတော့ အစိုးရက ဒါတွေကို မသိစေချင်ဘူး။ သူတို့ကိုယ်တိုင်လည်း ညှိုးချက်နဲ့ထားပြီးတော့ ဒါကြီး ဖျောက်ကွယ်ချင်တဲ့ သဘောတရားမှာရှိတယ်။”

အခုဆိုရင် အာဇာနည် သူရဲကောင်းတွေနဲ့ အာဇာနည်နေ့ ဆိုတာကို ကလေးသူငယ်တွေ မသိသလောက်၊ နားမလည်သလောက် ဖြစ်ကုန်တာမျိုးတွေထိ ရှိနေတယ်လို့လည်း ဆိုပါတယ်။

“အရင်တုန်းကတော့ တခဲနက် လူထုက အာဇာနည်နေ့ကြီးကိုပဲ စောင့်ပြီးတော့ မျှော်နေကြရတယ်။ ရေဒီယိုမှာလာတဲ့ ဥသြဆွဲသံကြီးကို နားထောင်ပြီးတော့ အလေးပြုကြတာတွေ ဘာတွေ ရှိတယ်။ အခုကတော့ အဲဒီလိုတွေလည်း မလုပ်ကြတော့ဘူး။ တချုိ့လူတွေဆိုလည်း မသိတော့ဘူး၊ မသိဘူးဆိုတာ ကလေးတွေပေါ့။ အာဇာနည်နေ့ဆိုတော့ ကလေးတွေက ပြောတယ်၊ အာဇာနည်နေ့ကျတော့ရှိပြီး စိုင်းစိုင်းခမ်းလှိုင်ရဲ့နေ့ကျတော့ မရှိဘူးလားလို့တောင် မေးတဲ့ အဖြစ်အပျက်မျိုး ဖြစ်သွားတော့ တော်တော်ဝမ်းနည်းစရာပဲ။ ကလေးတွေလည်း မသိတော့ဘူး။ နောင်လာနောက်သားတွေဆို အာဇာနည်နေ့ဆိုတာ ဘာမှန်းကို မသိလောက်အောင် ဖြစ်သွားတော့ ၀မ်းနည်းစရာတော့ ကောင်းတယ်။ အခု လူတွေကလည်း စိတ်ဝင်စားမှု တော်တော်နည်းသွားတယ်၊ အာဇာနည်နေ့ကို၊ သူတို့မသိကြတော့။”

ရန်ကုန်မြို့ခံ လူငယ်တဦး ပြောပြခဲ့တာ ဖြစ်ပါတယ်။

မြန်မာ့လွတ်လပ်ရေး ဖခင်ကြီး ဗိုလ်ချုပ်အောင်ဆန်း အပါအ၀င် သခင်မြ၊ ဒီးဒုတ်ဦးဘချို၊ မန်းဘခိုင်၊ ဦးရာဇတ်၊ ဦးဘ၀င်း၊ မိုင်းပွန်စော်ဘွားကြီး စ၀်စံထွန်း၊ ဦးအုန်းမောင်၊ ရဲဘော်ကိုထွေးတို့ဟာ လွန်ခဲ့တဲ့ ၁၉၄၇ ခု၊ ဇူလိုင် ၁၉ ရက်နေ့၊ မနက် ၁၀ နာရီခွဲခန့် အချိန်မှာ ရန်ကုန်မြို့ အတွင်းဝန်များရုံးအတွင်း အစည်းအဝေး လုပ်နေတုန်း ၀င်ရောက်ပစ်ခတ် သတ်ဖြတ်မှုကြောင့် ကျဆုံးခဲ့ရတာ အခုနှစ် ဇူလိုင် ၁၉ ရက်ဆိုရင် ၆၃ နှစ် ရှိခဲ့ပြီ ဖြစ်ပါတယ်။

အမေရိကန်ဘဏ္ဍာရေး ပြုပြင်ပြောင်းလဲမှု မြန်မာပြည်သူတွေအတွက် အကျိုးရှိ

အမေရိကန်ပြည်ထောင်စုက ငွေကြေးကုမ္ပဏီတွေကို ကြပ်ကြပ်မတ်မတ် ကွပ်ကဲရေး ဆိုင်ရာ ဥပဒေမူကြမ်း တရပ်ကို မနေ့က အမေရိကန် အောက်နဲ့ အထက်လွှတ်တော် နှစ်ရပ်စလုံးက ထောက်ခံအတည်ပြုခဲ့ကြပါတယ်။ နောက်အပတ်ထဲမှာ သမ္မတ အိုဘားမား လက်မှတ် ရေးထိုးပြီး ရင်တော့ ဒီဥပဒေ အတည်ဖြစ်မှာ ဖြစ်ပါတယ်။ ဒီဥပဒေ အတည်ဖြစ်သွားရင် မြန်မာနိုင်ငံ သားတွေအတွက်လဲ အကျိုးဖြစ်နိုင်တယ်လို့ နိုင်ငံတကာ သဘာဝပတ်ဝန်းကျင် ထိန်းသိမ်းရေးအဖွဲ့ Earth Rights International ရဲ့ အမှုဆောင် ညွှန်ကြားရေးမှူး ကို ကစောဝါးက ပြောပါတယ်။ ဘယ်လို အကျိုးသက်ရောက်မှုတွေ ဖြစ်နိုင်တယ် ဆိုတာကိုတော့ ကိုကစောဝါးက အခုလို ရှင်းပြပါတယ်။

“မနေ့ကမှ အတည်ပြုလိုက်တဲ့ ဥပဒေမူကြမ်းပေါ့လေ၊ အထက်လွှတ်တော်၊ အောက်လွှတ်တော် ကနေပြီးတော့ Wall Street Reforming Consumer Production Act ဆိုတဲ့ ဥပဒေမူကြမ်းဟာ ကျနော်တို့ မြန်မာပြည်သားတွေအတွက် အင်မတန်ကိုပဲ အကျိုးကျေးဇူး ဖြစ်နိုင်ပါတယ်။ ဘာဖြစ်လို့လည်းဆိုတော့ အပြည်ပြည်ဆိုင်ရာ ကုမ္ပဏီကြီးတွေက မြန်မာပြည်မှာ လာပြီးတော့ ရင်းနှီးမြှုပ်နှံနေတာကို ဗမာပြည်အစိုးရက ငွေကြေး ဘယ်လောက်ရနေလဲဆိုတာကို မြန်မာပြည်သူပြည်သားတွေ မသိနိုင်ပါဘူးခင်ဗျ။ ဒါပေမဲ့ ဒီဥပဒေကြီး အတည်ပြုလိုက်ပြီဆိုရင် ဗမာပြည်မှာ ရင်းနှီးမြှုပ်နှံနေတဲ့ကုမ္ပဏီတွေဟာ သူတို့ ဗမာစစ်အစိုးရကို ငွေကြေးဘယ်လောက်ပေးရလဲဆိုတာကို သူတို့က အမေရိကန် အစိုးရကို အသိပေးရမှာပါခင်ဗျ။ အဲဒီလို အသိပေးတဲ့အချိန်မှာ ကျနော်တို့ Earth Rights Organization က ဒီ အခြေအနေ အကြောင်းအချက်တွေကို Information တွေကို ယူပြီးတော့ ကျနော်တို့အနေနဲ့ ဗမာပြည်သူပြည်သားတွေကို အသိပေးနိုင်တဲ့ အတွက် ဗမာပြည်သူပြည်သားတွေဟာ ဘယ်လိုကုမ္ပဏီမျိုးတွေမှာ ဘယ်လို ဘယ်လောက်ငွေကြေးရတယ်ဆိုတာကို သိနိုင်မယ်ဆိုရင် မြန်မာပြည်သားတွေအတွက် အများကြီး အကျိုးရှိနိုင်ပါတယ်။”

၂၀၀၈ ခုနှစ်က ကြုံတွေ့ခဲ့ရတဲ့ ကမ္ဘာ့ငွေကြေး အကျပ်ရိုက်မှု ပြဿနာ နောက်တခါ မကြုံရလေအောင် ကာကွယ်ဖို့ ရည်ရွယ်တဲ့ ဒီဥပဒေ မူကြမ်းဟာ ငွေကြေးဆိုင်ရာ ရင်းနှီးမြှုပ်နှံမှုဘဏ်တွေကို ပိုပြီး ကြပ်ကြပ်မတ်မတ် ထိန်းကွပ်မှာ ဖြစ်ပါတယ်။ ဒါကြောင့် မြန်မာနိုင်ငံမှာ ရင်းနှီးမြှုပ်နှံနေတဲ့ အမေရိကန် ကုမ္ပဏီတွေရဲ့ ငွေစာရင်းရှင်းတမ်းတွေကို သိနိုင်ယုံတင်မက မြန်မာနိုင်ငံမှာ ရင်းနှီးမြှုပ်နှံနေတဲ့ တခြား နိုင်ငံတွေက နိုင်ငံခြား ကုမ္ပဏီကြီးတွေရဲ့ ငွေကြေးရှင်းတမ်းတွေကိုလဲ တဖက်တလှမ်းကနေ သိနိုင်မှာဖြစ်တယ်လို့ ကိုကစောဝါးက ထောက်ပြပါတယ်။

“ဒီမူက အမေရိကန် ကုမ္ပဏီတခုတည်းကိုသာ အကျိုးသက်ရောက်မှု မကပါဘူးခင်ဗျ၊ အခြား တရုတ်တို့၊ ပြင်သစ်ကုမ္ပဏီ တိုတယ်လ်တို့မှာလည်း အကျိုးသက်ရောက်မှု ရှိပါတယ်။ ဘာဖြစ်လို့လည်းဆိုတော့ တရုတ်ကော်ပရေးရှင်းတွေက အမေရိကန်နိုင်ငံရဲ့ စတော့ပ်အိပ်စ်ချိန်းမှာ ရှိနေတဲ့အတွက် ဒီကုမ္ပဏီတွေကလည်း အမေရိကန်နိုင်ငံကို အသိပေးရမှာ ဖြစ်တဲ့အတွက် ဥပမာအားဖြင့် ရှယ်ဗလွန်တို့ကတော့ သေချာပြီ။ ဒါကတော့ အမေရိကန် ကုမ္ပဏီဖြစ်တဲ့အတွက်။ ဒါပေမယ့် Total တို့ CMPC တို့ China ကုမ္ပဏီတွေက သူတို့က ဒီအမေရိကန်နိုင်ငံမှာ သူတို့ရဲ့ရှယ်ယာတွေကို ရောင်းနိုင်ဖို့အတွက် ယူအက်စ် အိပ်စ်ချိန်းမှာ ၀င်ပါထားတယ်ခင်ဗျ။ ၀င်ပါထားတယ်ဆိုတော့ ဒီဥပဒေက ယူအက်စ် စတော့ အိပ်စ်ချိန်းမှာ ၀င်ပါထားတဲ့ ကုမ္ပဏီတိုင်းက အမေရိကန်အစိုးရကို ငွေစာရင်းတွေကို အသိပေးရမယ်လေ။ ဆိုတော့ သူတို့တွေကလည်း ဒီ အမေရိကန် အစိုးရကို သူတို့ ဗမာပြည်ကို ငွေဘယ်လောက်ပေးလဲ၊ ဗမာစစ်အစိုးရကို ငွေဘယ်လောက်ပေးလဲဆိုတဲ့ ငွေစာရင်းကို သူတို့ တင်ပြရပါလိမ့်မယ်။”

ခုချိန်မှာ မြန်မာနိုင်ငံသားတွေဟာ နိုင်ငံခြားကုမ္ပဏီတွေရဲ့ ရင်းနှီးမြှုပ်နှံမှု ငွေကြေးတွေနဲ့ ပတ်သက်လို့ ဘာမှမသိကြသလို သဘာဝ သံယံဇာတ အရင်းအမြစ်တွေ ပေါကြွဝတဲ့ မြန်မာနိုင်ငံမှာ နိုင်ငံသားတွေကတော့ ဒီကရတဲ့ အကျိုးအမြတ်ကို ခံစားရလေ့ မရှိပါဘူး။ ဒါကြောင့် ဒီဥပဒေ မူကြမ်း အတည်ဖြစ်သွားမယ် ဆိုရင် မြန်မာနိုင်ငံမှာ ရင်းနှီးမြှုပ်နှံမှုတွေ လုပ်ကိုင်နေတဲ့ နိုင်ငံခြား ကုမဏီတွေကနေ မြန်မာစစ်အစိုးရ ဘယ်လောက် ၀င်ငွေ ရနေတယ်ဆိုတာတွေကို ဖော်ထုတ်နိုင်မှာဖြစ်သလို ပြည်သူတွေ ဒီအကြောင်းတွေကို သိလာခြင်းအားဖြင့် မြန်မာစစ်အစိုးရ အနေနဲ့ လူထုအတွက် အကျိုးပြုမှု တစုံတရာ လုပ်လာနိုင်တဲ့ တွန်းအားဖြစ်လာဖို့လဲ ကိုကစောဝါးက မျှော်လင့်ပါတယ်။

“ဗမာပြည် စစ်အစိုးရကြီးဟာ အများသိတဲ့အတိုင်း နျူကလီးယား ဓာတ်ပေါင်းဖိုတွေဘာတွေကို သူတို့ တည်ဆောက်နေတယ်။ ဒါပေမဲ့ တကယ်တန်းတွက်ကြည့်လိုက်ရင် ဒီငွေကြေးတွေဟာ တိုင်းသူပြည်သားတွေအတွက် အနည်းဆုံးတော့ နည်းနည်းပါးပါး ရောက်သင့်တယ်။ ဒီ ရှယ်ဗရွန်းက ပေးတဲ့ပိုက်ဆံတို့ တိုတယ်လ်က ပေးတဲ့ ပိုက်ဆံတို့ ဒီငွေကြေးအများကြီးတွေဟာ တိုင်းသူပြည်သားတွေဆီမရောက်ဘဲ ဒီဘာမဟုတ်တဲ့ မလုပ်သင့်တဲ့ဟာတွေ ဒီစစ်အစိုးရကို အာဏာခိုင်မြဲဖို့အတွက်ပဲ ဖြစ်နေတော့ ကြည့်ရတာ ကျနော်တို့ တော်တော်လေးကို စိတ်မကောင်းဖြစ်နေပါတယ်။ အခုကြည့်မယ်ဆိုရင် ဗမာပြည်သူပြည်သားတွေ ဘယ်လောက်ဒုက္ခရောက်နေလဲ ကျနော်တို့ မျက်မြင် တွေ့နေရပါတယ်။ ဒါတွေကို ကြည့်နေရတာ စိတ်မချမ်းသာတဲ့အတွက် အနေအထားတခုမှာ ကျနော်တို့ ဘာအကောင်းဆုံးလုပ်နိုင်မလဲ၊ ဒီလိုသာ ကုမ္ပဏီတွေက ငွေကြေးရှင်းတမ်းတွေကို တင်ပြရမယ်ဆိုရင် အနည်းဆုံးတော့ ဗမာပြည်သူပြည်သားတွေ ဒီအနေအထားကို သိမယ်ဆိုရင် စစ်အစိုးရက အနည်းဆုံးတော့ တခုခု လုပ်လာလိမ့်မယ်လို့ ကျနော်တို့ မျှော်လင့်ချင်ပါတယ်ခင်ဗျ။”

နိုင်ငံတကာ သဘာဝပတ်ဝန်းကျင် ထိန်းသိမ်းရေးအဖွဲ့ Earth Rights International ရဲ့ အမှုဆောင် ညွှန်ကြားရေးမှူး ကို ကစောဝါးကို ဆက်သွယ်မေးမြန်းခဲ့တာပါ။

မြန်မာ့နိုင်ငံရေး ပြုပြင်ပြောင်းလဲဖို့ ထိုင်းနိုင်ငံက ဖိအားပေးရန် အမေရိကန်တိုက်တွန်း

ထိုင်းနိုင်ငံမှာရောက်ရှိနေတဲ့ အမေရိကန်အကြီးတန်း သံတမန်တဦးက ထိုင်းအစိုးရအနေနဲ့ အိမ်နီးချင်းမြန်မာနိုင်ငံမှာ နိုင်ငံရေး ပြုပြင်ပြောင်းလဲမှုတွေ ဖြစ်ပေါ်လာအောင် တွန်းအားပေးပါလို့ တိုက်တွန်းလိုက်ပါတယ်။

အမေရိကန်နိုင်ငံခြားရေးဝန်ကြီးဌာနမှာ တတိယရာထူး အကြီးဆုံးဖြစ်တဲ့ ဒု လက်ထောက် နိုင်ငံခြားရေးဝန်ကြီး William Burns ဟာ ထိုင်းနိုင်ငံကို ရောက်ရှိနေတုန်း ထိုင်းနိုင်ငံက အနီးကပ်အိမ်နီးချင်း မြန်မာနိုင်ငံမှာ ရွေးကောက်ပွဲ မတိုင်မှီ နိုင်ငံရေးပြုပြင် ပြောင်းလဲမှုတွေ လုပ်ဖို့ ဖိအားပေးပါရန် တိုက်တွန်းလိုက်တာပါ။

ဒါ့အပြင် ထိုင်းအစိုးရရဲ့အရေးပေါ် အခြေအနေ ကြေညာချက်ကို အမြန်ဆုံး ရုပ်သိမ်းပေးဖို့ တိုက်တွန်းလိုက်ပါတယ်။

ပြီးခဲ့တဲ့နွေဦးကာလက အကြမ်းဖက် ဆန္ဒပြပွဲတွေ ဖြစ်ပွားစေခဲ့တဲ့ ၂ ဘက် မပြေမလည် ဖြစ်နေတာတွေနဲ့ ပတ်သက်ပြီး ပွင့်ပွင့်လင်းလင်း ဆွေးနွေးခွင့် ပြုခြင်းဟာ ထိုင်းနိုင်ငံရဲ့ အကျိုးစီးပွားအတွက်ပဲ ဖြစ်ပါတယ်လို့ Mr. Burns က သောကြာ နေ့က ပြောဆိုလိုက်ပါတယ်။

အရေးပေါ်အခြေအနေ ကြေညာချက်ဟာ ဒီမိုကရေစီ စံနစ်အတွက် ကသိကအောက် ဖြစ်စေတယ်လို့ ဆိုပါတယ်။ အရေးပေါ် အခြေအနေ အမိန့်အရ တရားစွဲဆိုဖို့မလိုဘဲ မသင်္ကာတဲ့လူတွေကို ဖမ်းဆီးနိုင်ခွင့်ရှိပြီး သတင်းတွေကိုလည်း ဆင်ဆာ လုပ်ခွင့် ရှိပါတယ်။ ဘန်ကောက်မြို့နဲ့ နယ်ခရိုင် ၁၈ ခုမှာ အရေးပေါ် အခြေအနေ ၃ လ ထပ်တိုး လိုက်တယ်လို့ ထိုင်းအာဏာပိုင်တွေက ပြီးခဲ့တဲ့သီတင်းပတ်က ကြေညာခဲ့ပါတယ်။

ဒေါ်စုရဲ့ ဆုံးဖြတ်ချက်အတိုင်း ဦးဝင်းထိန် ရပ်တည်မည်

အမျိုးသားဒီမိုကရေစီ အဖွဲ့ချုပ်ပါတီရဲ့ ရုံးအဖွဲ့မှူးတာဝန်ထမ်းဆောင်ခဲ့သူ ဗိုလ်ကြီးဟောင်း ၀င်းထိန်ဟာ ကသာထောင်က လွတ်မြောက် လာပြီးတဲ့နောက် နိုင်ငံရေးလုပ်ငန်းတွေမှာ ဒေါ်အောင်ဆန်းစုကြည်ရဲ့ ဆုံးဖြတ်ချက်အတိုင်း ဆက်လက် ရပ်တည်သွားမယ်လို့ ပြောပါတယ်။ ဦးဝင်းထိန်ဟာ အကျဉ်းကျခံရစဉ် အစာအိမ်၊ သွေးတိုး၊ နှလုံးနဲ့ အရိုးကျီးပေါင်း တက်တဲ့ ရောဂါတွေကိုလဲ ခံစားခဲ့ရပြီး သူဟာ ချမှတ်ထောင်ဒဏ်ထက် ၂ လကျော်ကြာ ပိုနေထိုင်ခဲ့ရပြီးမှ လွတ်မြောက်လာတာ ဖြစ်ပါတယ်။ ဒီအကြောင်း အပြည့်အစုံကို ထိုင်းအခြေစိုက် သတင်းထောက် ကိုမိုးဇော်က တင်ပြထားပါတယ်။

ဦးဝင်းထိန်ဟာ မနေ့ကပဲ ကသာထောင်ကနေ လွတ်မြောက်လာခဲ့ပြီး ဒီကနေ့ ရန်ကုန်က သူ့ မိသားစုဆီကို ပြန်လည် ရောက်ရှိလာပြီ ဖြစ်ပါတယ်။

ထောင်က ပြန်လည်လွတ်မြောက်လာတဲ့ ဗိုလ်ကြီးဟောင်း ဦးဝင်းထိန်ဟာ အနာဂတ်နိုင်ငံရေးမှာ ဒေါ်အောင်ဆန်းစုကြည်ရဲ့ ဆုံးဖြတ်ချက် အတိုင်း ဆက်လက် ရပ်တည်သွားမယ်လို့ ပြောပါတယ်။

“နိုင်ငံရေးအရဗျာ ဒေါ်စုက မှတ်ပုံမတင်ဘူးဆိုတော့ ကျနော်တို့လဲ မှတ်ပုံမတင်တဲ့အတိုင်း နေရမှာပဲ။ ဒီမှာ ကျနော်က အသက် ၇၀ ရှိတော့မယ်။ ဟိုတုန်းက အင်္ဂလိပ် လက်ထက်မှာကော၊ နိုင်ငံရေး အစိုးရလက်ထက်မှာကော နိုင်ငံရေးလုပ်ချင်တဲ့ကောင် ကိုယ်ဟာကိုယ် ဆိုင်းဘုတ် ထ ထောင်၊ ဘာမှ မှတ်ပုံတင်စရာမလိုဘူး။ ထောက်ခံတဲ့လူရှိရင် အဲဒီပါတီက ကြီးပွားမယ်၊ ထောက်ခံတဲ့လူမရှိရင် အဲဒီပါတီက တုံးသွားမယ်။ ကျနော်က အဲလို သဘောထားတာ။ ကျနော်ကတော့ ဒေါ်စု ဆုံးဖြတ်တဲ့ အတိုင်းပဲ ရပ်တည်ရမှာပဲ။”

ဒေါ်အောင်ဆန်းစုကြည် ဦးဆောင်တဲ့ အမျိုးသားဒီမိုကရေစီ အဖွဲ့ချုပ်ဟာ ၂၀၀၈ ခုနှစ် ဖွဲ့စည်းပုံကို ပြန်လည် သုံးသပ်ဖို့နဲ့ တွေ့ဆုံဆွေးနွေးဖို့ တောင်းဆိုခဲ့ပြီး မတ်လ ၂၉ ရက်နေ့မှာကျင်းပတဲ့ ပါတီ ဗဟိုဦးစီး အဖွဲ့အစည်းအဝေးက ရွေးကောက်ပွဲဆိုင်ရာ ဥပဒေတွေဟာ တရားမျှတမှု မရှိတာကြောင့် ပါတီကို မှတ်ပုံမတင်ဖို့ အများသဘောတူ ဆုံးဖြတ်ထားတာ ဖြစ်ပါတယ်။

လက်ရှိ ရွေးကောက်ပွဲဝင်ဖို့အတွက် နိုင်ငံရေးပါတီသစ် တည်ထောင်ကြသူတွေအပေါ် သူ့ရဲ့သဘောထားကိုတော့ ဦးဝင်းထိန်က အခုလို ပြောပါတယ်။

“နိုင်ငံရေးက လူတိုင်းလုပ်ကိုင်ခွင့် ရှိတာလေ။ သူတို့ဟာသူတို့ ယုံကြည်လို့ လုပ်ကြတာတော့ ကျနော်က ဘာမှ ဝေဖန်စရာ မလိုပါဘူး။ လုပ်ကြပေါ့။ ဒါက ကျနော့် မူဝါဒနဲ့ မကိုက်တဲ့အတွက်တော့ ကျနော်က ဘာမှ လုပ်မှာ မဟုတ်ဘူး။”

အင်းစိန်၊ မြင်းခြံ၊ မိတ္ထီလာ၊ မန္တလေးနဲ့ ကသာ အပါအ၀င် ထောင် ၅ ထောင်မှာ အကျဉ်းကျခံခဲ့ရတဲ့ ဦးဝင်းထိန်ဟာ ထောင်အတွင်းမှာ ရောဂါ အတော်များများ ခံစားခဲ့ရသူလဲ ဖြစ်ပါတယ်။ သူရဲ့ လက်ရှိ ကျန်းမာရေး အခြေအနေကိုတော့ သူက အခုလို ပြောပါတယ်။

“ကျနော်က အခုဒီမှာ ကျန်းမာရေးအရ ဆေးသောက်မလို့ လုပ်နေတာ ၇ မျိုးရှိတယ်။ ရောဂါကတော့ နှလုံးသွေးကြော ကျဉ်းတာရယ်၊ အစာအိမ်အချဉ်ပေါက် တာရယ်၊ နောက် လည်ပင်း အရိုးကျီးပေါင်း တက်တာရယ်၊ နောက်ပြီးတော့ ကျောရိုးက ဘေးက မာဆယ်လ်တွေ တောင့်သွားတယ်။ ဘာကြောင့်လဲဆိုတော့ ငှက်ဖျားဖြစ်တာ ငှက်ဖျား အကြီးအကျယ်ဖြစ်တာ ကသာမှာဗျ။ သွေးတိုးက လာခါနီး နောက်ဆုံး ၂ ရက် ၃ ရက်မှာ အရမ်းဖောက်တာ။”

လွန်ခဲ့တဲ့ ၁ နှစ်လောက်က ကသာထောင်ကို ထောင်ဆရာဝန် ရောက်လာတာကြောင့် နှစ်ပတ်တခါလောက် ကျန်းမာရေး စစ်ဆေး ကြည့်ရှုတာတွေ ရှိပြီး အရင်ကတော့ ဆရာဝန်မရှိလို့ တလကို အကျဉ်းသား တယောက်နှစ်ယောက်လောက် ဆုံးပါးတာတွေ ရှိခဲ့တယ်လို့ ဆိုပါတယ်။

ဦးဝင်းထိန်ဟာ ၁၉၉၆ ခုနှစ်က ပြည်ပ သတင်းဌာနတွေကို သတင်းမှားပေးတယ်ဆိုတဲ့ စွဲဆိုချက်နဲ့ ထောင်ဒဏ် ၁၄ နှစ် ချမှတ်ခံခဲ့ရတာ ဖြစ်ပါတယ်။ သူ့ကို ၂၀၀၈ ခုနှစ်မှာ ပြန်လွှတ်ပေးခဲ့ပေမဲ့ ကသာက တည်းခိုခန်းမှ တညအိပ်ပြီး ပြန်လည် ဖမ်းဆီးခံခဲ့ရပါတယ်။

ဒီလိုဖမ်းဆီးပြီးတဲ့နောက်မှာ ဘာအကြောင်းပြချက်မှမပေးဘဲ နောက်ထပ် ၂ နှစ်ထပ်မံ အကျဉ်းချထားခဲ့တာပါ။ ဒါကြောင့် မနေ့က ပြန်လည် လွတ်မြောက်လာချိန်မှာ ဦးဝင်းထိန်ဟာ ထောင်အတွင်းမှာ ၁၄ နှစ်နဲ့ ၂ လ နေခဲ့ရတာ ဖြစ်ပါတယ်။

ဒီလိုအကြောင်းပြချက်မပေးဘဲ ပြန်လည် ဖမ်းဆီးပြီး အပြစ်ဒဏ်ရက်ထက် ၂ လကျော်လွန် ဖမ်းဆီးတဲ့ အပေါ်မှာတော့ မြန်မာနိုင်ငံ အကျဉ်းသားများ ကူညီစောင့်ရှောက်ရေး အသင်း AAPP ရဲ့ တွဲဘက် အတွင်းရေးမှူး ကိုဘိုကြည်က အခုလို ဝေဖန်ပါတယ်။

“အဲဒီဟာကိုယ်ကစ နအဖက ဥပဒေမဲ့လုပ်ဆောင်နေတာကို ပိုထင်ရှားစေတယ်။ အနိမ့်ဆုံး ဗိုလ်ကြီးဝင်းထိန်ကို ဘာကြောင့် ပြန်ဆွဲတယ်ဆိုတဲ့ဟာကို အနိမ့်ဆုံးအသိပေးရမယ်၊ အကြောင်းကြားရမယ်။ အဲလို အသိပေး အကြောင်းမကြားဘဲနဲ့ လူတယောက်ကို လွတ်ပေးလိုက်တယ်။ ပြန်ထည့်ထားတာကို မတရားသဖြင့် လုပ်တယ်၊ ဥပဒေမဲ့ လုပ်တယ် ဆိုတာကို ပိုပြီးထင်ရှားစေပါတယ်။”

ဒီလိုမျိုး ရက်ကျော် ဖမ်းဆီးထိန်းသိမ်းထားတာနဲ့ လွှတ်အပြီးမှာ ပြန်ဖမ်းတာတွေဟာ အရင် ကလဲ ဖြစ်ပျက်ခဲ့ဖူးတယ်၊ ဒီလို ဖမ်းဆီးတာတွေဟာ နိုင်ငံအနာဂတ်အတွက် မကောင်းနိုင်ဘူးလို့ ကိုဘိုကြည်က သုံးသပ်ပါတယ်။

“ဟိုးအရင်ကတည်းကလဲ တချို့တွေက ရက်ကျော်ပြီး ပိုနေခဲ့ရတာမျိုးတွေ ရှိတယ်။ ကိုစောဝေဆိုရင် သူအဖမ်းခံရတဲ့အချိန်က စပြီးတော့ ရုံးတင်တဲ့အချိန်ထိ တရားရုံးက လျော့ရက် ခံစားစေလို့ ဆိုပေမဲ့ လျော့ရက်မရဘဲနဲ့ ထောင်ထဲမှာ ပိုနေလိုက်ရတာမျိုးတွေ ရှိတယ်။ အဲဒီရှေ့မှာလဲ အလားတူဖြစ်ပျက်ခဲ့တာတွေ ရှိတယ်။ တချို့တွေဆို ပိုဆိုးတာက လွှတ်ပေးတယ်ဆိုပြီး ထောင်ဗူးဝမှာ လက်မှတ်ထိုး လိုက်ရတယ်။ လက်မှတ်ထိုးပြီးတဲ့အခါ ကျမှ ၁၀(က) နဲ့ ပြန်ဖမ်းတယ်ဆိုပြီးတော့ နောက် ၅ နှစ်ခွဲလောက် နေရတာမျိုးတွေ ရှိတယ်။ ဥပမာ ကိုမင်းကိုနိုင်တို့၊ ကိုကိုကြီးတို့၊ ကိုဌေးကြွယ်တို့ ဒီလူတွေဆို အဲလိုမျိုးနဲ့ နေခဲ့ရတာတွေ ရှိတယ်။ အဲဒီဟာက မြန်မာပြည်မှာ ဥပဒေစိုးမိုးမှု လုံးဝ မရှိဘူးဆိုတာကို ကောက်ချက်ချလို့ ရတယ်။ နောက်တခုက နိုင်ငံရေး အကျဉ်းသားတွေကို ဖြစ်နိုင်သမျှ မလွှတ်ဘဲနဲ့ထားချင်တယ် ဆိုတာမျိုးကို လက်တွေ့ ပြနေတာဖြစ်ပါတယ်။ ဒါဟာ နိုင်ငံတော်ရဲ့ အနာဂတ်အတွက် ကောင်းတဲ့ အလားအလာမဟုတ်ပါဘူး။”

ဗိုလ်ကြီးဟောင်း ဦးဝင်းထိန်ဟာ ၁၉၆၃ ခုနှစ်မှာ ဗိုလ်လောင်းသင်တန်း ဆင်းခဲ့ပြီ ၁၉၇၆ ခုနှစ်မှာ ဗိုလ်ကြီး အုံးကျော်မြင့် ဦးဆောင်တဲ့ နိုင်ငံတော်လုပ်ကြံမှုမှာ ပါဝင်တယ်ဆိုပြီး စွပ်စွဲခံရတာကြောင့် တပ်မတော်ကနေ ထွက်ခဲ့ရတာဖြစ်ပါတယ်။

ကြံ့ခိုင်ဖွံ့ဖြိုးရေး အပြောင်းအလဲ ပွင့်လင်းမှုရှိသင့်

မြန်မာနိုင်ငံမှာ စစ်အစိုးရ ကျောထောက် နောက်ခံပေးထားတဲ့ ပြည်ထောင်စု ကြံ့ခိုင်ဖွံ့ဖြိုးရေး အသင်းက ရွေးကောက်ပွဲဝင်ဖို့ ကြံ့ခိုင်ဖွံ့ဖြိုးရေးပါတီ အဖြစ်နဲ့သာ ရပ်တည်ဖို့ ပြင်ဆင်နေချိန်မှာ ဒီလုပ်ငန်းစဉ်တွေကို ပြည်သူတွေကို ရှင်းရှင်းလင်းလင်း အသိပေးသင့်တယ်လို့ မြန်မာနိုင်ငံက ရှေ့နေကြီး ဦးအောင်သိန်းက ပြောလိုက်ပါတယ်။ အစိုးရဝန်ထမ်းတွေ၊ ကျောင်းသူ ကျောင်းသားတွေ ပါဝင်တဲ့ ကြံ့ခိုင်ဖွံ့ဖြိုးရေးအသင်းကို နိုင်ငံရေးပါတီအဖြစ် အသွင်ပြောင်းတာနဲ့ ပတ်သက်ပြီး မေးခွန်းတွေ ရှိနေသေးတယ် ဆိုတာကိုတော့ ရှေ့ နေကြီး ဦးအောင်သိန်းနဲ့ ဆက်သွယ်မေးထားတဲ့ မစုမြတ်မွန်က အပြည့်စုံ တင်ပြထားပါတယ်။

မြန်မာနိုင်ငံမှာ လူမှုရေးလုပ်ငန်းတွေလုပ်ဖို့ဆိုပြီး ၁၉၉၃ ခုနှစ်မှာ ဖွဲ့စည်းခဲ့တဲ့ ကြံခိုင်ဖွံ့ဖြိုးရေးအသင်းကြီးကို နိုင်ငံရေးပါတီသက်သက်ဖြစ်တဲ့ ကြံ့ခိုင်ဖွံ့ဖြိုးရေးပါတီအဖြစ် ပြောင်းလဲဖွဲ့စည်းဖို့ ပြင်ဆင်တဲ့အခါမှာ ပြည်သူတွေကို အသိပေး လုပ်သင့်တယ်လို့ ဗဟိုတရားရုံးရှေ့ နေကြီး ဦးအောင်သိန်းက ပြောပါတယ်။

“အသင်းကို ဖျက်မယ်ဆိုရင် အသင်းဖျက်သိမ်းရေး ဥပဒေဆိုင်ရာ အသင်းတခုလုံးကို ဖျက်သိမ်းတယ်။ ဖျက်သိမ်းပြီး စာရင်းရှင်းလင်းတာတို့ ဘာတို့ လုပ်ရတာတွေ ရှိတယ်ဗျ။ အသင်းက ရစရာရှိတဲ့ ကြွေးမြီတွေ ရှိတယ်။ ပေးစရာတွေလဲ ရှိရင်ရှိတတ်တာကိုး။ နောက် ကုမ္ပဏီ ဖျက်သိမ်းမယ်ဆိုလဲ ကုမ္ပဏီ ဖျက်သိမ်းရေးကို တင်ရတာပဲဗျ။ တင်ပြီး တချို့ဟာတွေကျတော့ သတင်းစာထဲမှာကို ထည့်ပြီး ကြေညာရတာတွေ ရှိပါတယ်။ အသင်း မဖျက်သိမ်းဘဲနဲ့ ပါတီကို ကူးပြောင်းတာလား။ အသင်းကို ဖျက်သိမ်းပြီးတော့ ပါတီအဖြစ် နံမည်အသစ်တင်ပြီး ကူးပြောင်းတာလား ဆိုတာ။ အဲဒါက ရွေးကောက်ပွဲဥပဒေမှာ မှတ်ပုံတင်ကတည်းကိုက ရှင်းရှင်းလင်းလင်း ဖော်ပြထားခြင်း မရှိဘူးဗျ။”

ကြံ့ခိုင်ဖွံ့ဖြိုးရေးအသင်းကို ဖျက်သိမ်းဖို့ ကိစ္စတွေကို စပြီးဆွေးနွေးနေတယ် ဆိုတာကို ရန်ကုန်မှာရှိတဲ့ အသင်းဌာနချုပ်က အမည်မဖေါ်လိုသူ အဖွဲ့ဝင်တယောက်က VOA မြန်မာပိုင်းကို ပြောပါတယ်။ ဒါပေမဲ့ ဒီကိစ္စတွေကို လူသိရှင်ကြား ထုတ်ပြန်ခြင်းတော့ မရှိသေးပါဘူး၊ အသင်းပိုင်ပစ္စည်းတွေနဲ့ အသင်းဝင်တွေကို ဘယ်လိုခွဲမှာလဲ ဆိုတာကိုလဲ ရှင်းရှင်း မသိရသေးတာနဲ့ ပတ်သက်လို့ ရှေ့နေဦးအောင်သိန်း ပြောတာက -

“အသင်းရည်ရွယ်ချက်နဲ့ နိုင်ငံရေးပါတီ ရည်ရွယ်ချက်က မတူဘူးဗျ။ အသင်းအဖြစ်နဲ့ ပေါ်ပေါက်လာတာက ကျောင်းသားတွေ ပါတယ်။ ဆရာ ဆရာမတွေ ပါတယ်။ ၀န်ထမ်းတွေ ပါတယ်ပေါ့ဗျာ။ လူမှုရေးအသင်းလို့ လက်ခံတာကိုး။ အခုကျတော့ လူမှုရေးအသင်းက နိုင်ငံရေးပါတီအဖြစ် ပြောင်းလိုက်တယ်ဆိုတော့ ဥပဒေကတော့ ပြောင်းနိုင်တယ် မပြောင်းနိုင်ဘူး ဆိုတာ သတ်မှတ်ထားတာ မရှိဘူး။ သို့သော်လဲ အသင်းလုပ်ပြီးတော့မှ နိုင်ငံရေးပါတီအဖြစ် ပြောင်းလိုက်တာကတော့ ဒါ လက်တလုံးခြား လှည့်လိုက်တဲ့သဘော သက်ရောက်တယ်ဗျ။ အရှည်သဖြင့် နိုင်ငံရေးကို မျှော်ကိုးပြီး လုပ်မယ်ဆိုရင်တော့ ဒီလိုတော့ မဖြစ်ကောင်းဘူးလို့ ကျနော် အဲဒီလို မြင်ပါတယ်။”

ဗိုလ်ချုပ်မှုးကြီးသန်းရွှေ နာယက အဖြစ်တည်ထောင်ထားတဲ့ ကြံခိုင်ဖွံဖြိုးရေးအသင်းဟာ စတင်တည်ထောင်ကတည်းက နိုင်ငံရေး အာဏာယူနိုင်ဖို့ ရည်ရွယ် တည်ထောင်တာလို့ မြန်မာ့နိုင်ငံရေး အကဲခတ်တွေက သုံးသပ်ကြပါတယ်။ အသင်းရဲ့  ဥက္ကဌအပါအဝင် ထိပ်ပိုင်း အသင်းတာဝန်ရှိသူတွေကလဲ စစ်ရာထူးတွေကနေ အရပ်ဖက်ကိုပြောင်းပြီး ရွေးကောက်ပွဲဝင်ဖို့ ပြင်ဆင်ထားခဲ့တာပါ၊ အခုလို အစိုးရရဲ့ ကျောထောက်နောက်ခံ အပြည့်ရနေတဲ့ ကြံ့ခိုင်ဖွံဖြိုးရေးအသင်းကနေ ကြံ့ခိုင်ဖွံဖြိုးရေးပါတီ ပြောင်းမယ်ဆိုရင်လဲ တခြားနိုင်ငံရေးပါတီတွေ အတွက် နစ်နာစေတယ်လို့ ရှေ့နေကြီးက သုံသပ်ပါတယ်၊

“အခုဟာက အစိုးရက ကမကထ လုပ်ထားတဲ့အသင်း ဖြစ်တဲ့အတွက် အစိုးရ အသင်းကနေ အစိုးရပါတီ ပြန်လုပ်တယ်ဆိုတဲ့သဘောမျိုး သက်ရောက်တာပေါ့။ အဲဒီတော့ ပါတီလိုင်းဘက်ကနေ ကြည့်ရင် သူဟာ နိုင်ငံရေးပါတီတခုခုရဲ့ ဖြစ်တည်မှုအတွက်ကို အသင်းအနေနဲ့ စည်းရုံးသိမ်းသွင်းထားတဲ့ လူအင်အားတွေက နဂိုကတည်းကိုက သူ့မှာ အင်အားအပြည့်ရှိတဲ့သဘော သက်ရောက်နေတာပေါ့။ ဆိုတော့ အခြား အခြားသော နိုင်ငံရေးပါတီတွေက အခုမှ ထူထောင်မယ့် နိုင်ငံရေးပါတီတွေဟာ အခုမှ အစပျိုး ခြေလှမ်း လှမ်းဖို့ ပြင်တုန်း ရှိသေးတယ်။ သူက အသားကျပြီးတဲ့ အင်အားနဲ့ အသားကျပြီးတဲ့ အင်အားစုအားလုံးကို ပါတီအဖြစ် ပြောင်းလဲပြီးတော့ သူ့မှာ အလိုအလျောက် သက်တောင့်သက်သာနဲ့ သူများနဲ့ နှာတဖျား မဟုတ်ဘူးခင်ဗျ။ နှာ ၁၀ ဖျား လောက် သာပြီးတော့ သူ့မှာ အခွင့်အလမ်းတွေ ရှိသွားတာပေါ့။ အများကြီး တာသွားတာပေါ့ဗျာ။ ကြံ့ခိုင်ဖွံ့ဖြိုးရေးအသင်းကနေ ပါတီပြောင်းတာနဲ့ ပါတီသစ်ကနေ အခုမှ ထောင်ရတဲ့ပါတီအတွက် အင်မတန် နစ်နာတာပေါ့ဗျာ။”

ဗဟိုတရားရုံးရှေ့နေ ဦးအောင်သိန်းဖြစ်ပါတယ်၊ မြန်မာနိုင်ငံမှာ ရွေးကောက်ပွဲဝင်ဖို့ ပြင်ဆင်နေကြတဲ့ နိုင်ငံရေးပါတီတော်တော်များမှာ မဲဆွယ်စည်းရုံးဖို့ နေနေသာသာ လူအင်အားအခက်အခဲ ငွေအားအခက်အခဲတွေကြောင့် စည်းရုံးလှုပ်ရှားဖို့ မလွယ်ဘူးလို့ ပြောနေကြတာဖြစ်ပါတယ်၊ စစ်အစိုးရပေးတဲ့ အခွင့်ထူးတွေနဲ့  ကြံ့ခိုင်ဖွံ့ဖြိုးရေးအသင်း ရရှိထားတဲ့ ရန်ပုံငွေတွေ၊ ပိုင်ဆိုင်မှုကို ကြံ့ခိုင်ဖွံ့ဖြိုးရေးပါတီကို လွှဲပြောင်းပေးမယ်ဆိုရင် မတရားဘူးလို့လဲ နိုင်ငံရေးပါတီတွေက ပြောနေကြပါတယ်။

ရွေးကောက်ပွဲ အနိုင်ရရေး ပါတီတွေ ပူးပေါင်းလုပ်ဆောင်မည်

စစ်အစိုးရလုပ်မယ့် ရွေးကောက်ပွဲ ၀င်ကြမယ့် နိုင်ငံရေးပါတီတွေထဲက တချို့ဟာ ရွေးကောက်ပွဲမှာ အနိုင်ရဖို့အတွက် အတူတွဲပြီး အလုပ်တွေ ခွဲလုပ်ကြဖို့ တိုင်ပင်ဆွေးနွေးနေကြပါတယ်။ လက်ရှိ ဥပဒေတွေအရ မဟာမိတ်ပါတီဖွဲ့လို့ မရနိုင်တဲ့အတွက် အခုလို ပူးပေါင်းဆောင်ရွက်ရေးကို ဆွေးနွေးနေကြတာလို့ ပြောကြပါတယ်။ အပြည့်အစုံကို စုံစမ်းထားတဲ့ ကိုကျော်အောင်လွင်က တင်ပြပေးထားပါတယ်။

မြန်မာပြည်က နိုင်ငံရေးပါတီ အများစုမှာ တပါတီချင်းအလိုက် ငွေကြေးအခက်အခဲ၊ အချိန်အခက်အခဲ စတာတွေနဲ့အတူ အာဏာပိုင်တွေရဲ့ ထိန်းချုပ် ကန့်သတ်မှုတွေကလည်း မပြတ်ရှိနေတော့ ရွေးကောက်ပွဲမှာ အောင်မြင်နိုင်ရေး တူရာတူရာ ပါတီတွေ ပူးပေါင်း လုပ်ဆောင်ကြဖို့ဆိုတဲ့ ဆွေးနွေးညှိနှိုင်းမှုတွေ အခုရက်ပိုင်းတွေအတွင်း ရှိနေပါတယ်။

“လက်ရှိ ရွေးကောက်ပွဲ ကော်မရှင်က ပါတီဝင်တယောက်က ပါတီတခုမှာပဲ ၀င်ရမယ်။ ပါတီတွေပေါင်းပြီး တပ်ပေါင်းစုတို့၊ မဟာမိတ်တို့ ဖွဲ့စည်းမှုကို ရွေးကောက်ပွဲ ကော်မရှင်က ခွင့်ပြုမထားပါဘူး။ ဒါပေမဲ့ ပါတီတွေအားလုံး Joint Action Committee ပုံစံမျိုး လုပ်မယ်ဆိုရင်တော့ ရတယ်။ အလုပ်တူ ပူးပေါင်း ဆောင်ရွက်နိုင်ရေးအတွက် ကျနော်တို့ ညှိနှိုင်းတဲ့ သဘောပါပဲ။ အခု ကျနော်တို့ ဆောင်ရွက်နေတဲ့ အခြေအနေတွေ အားလုံးဟာ ရွေးကောက်ပွဲ ကော်မရှင်က ချမှတ်ထားတဲ့ စည်းမျဉ်းစည်းကမ်းတွေ အောက်ကပါပဲ။”

ပြည်ထောင်စု ဒီမိုကရေစီပါတီရဲ့ ဥက္ကဋ္ဌ ဦးဖြိုးမင်းသိန်း ရှင်းပြခဲ့တာ ဖြစ်ပါတယ်။

မကြာခင်ရက်ပိုင်းကပဲ တရားဝင် နိုင်ငံရေးပါတီတခု ဖြစ်လာခဲ့တဲ့ NDF လို့ခေါ်တဲ့ အမျိုးသား ဒီမိုကရေစီ အင်အားစုကလည်း ဦးတည်ချက်တူတဲ့ နိုင်ငံရေးပါတီ အချင်းချင်း ပူးပေါင်းဆောင်ရွက်မှုတွေကို လိုလားနေတဲ့အကြောင်း ပါတီခေါင်းဆောင်တဦး ဖြစ်တဲ့ ဦးခင်မောင်ဆွေက ပြောပါတယ်။

“ဒီမိုကရေစီစစ်စစ် ပါတီတွေ၊ ပုဂ္ဂိုလ်တွေနဲ့တော့ ကျနော်တို့က ထိပ်တိုက်မတိုးဖို့ ဦးတည်ထားတဲ့ အခါကြတော့ ကျနော်တို့ အားနည်းတဲ့ နေရာတွေ၊ အားသာတဲ့ နေရာတွေ ရှိမှာပါ။ အဲဒီလိုပဲ ဒီမိုကရေစီ ပါတီများကလည်း သူတို့ အားသာတဲ့နေရာ၊ အားနည်းတဲ့နေရာတွေ ရှိတော့ ရွေးကောက်ပွဲ မတိုင်ခင် ကာလမှာတော့ ညှိနှိုင်းမှု တခုတော့ ဖြစ်လာလိမ့်မယ်လို့ မျှော်လင့်ပါတယ်။ ရွေးကောက်ပွဲဝင်မယ့် နယ်မြေတွေ မထပ်ဖို့နဲ့ လစ်လပ် ကျန်ဟာနေခြင်း မရှိအောင်ဆိုတဲ့ သဘောထားက ကျနော်တို့အားလုံး၊ ဒီမိုကရေစီ ပါတီတိုင်းလိုလိုမှာ ရှိနေတော့ Cooperation၊ Coordination ပေါ့၊ ဒါမှမဟုတ်ရင်လည်း Joint Action ပေါ့။ တခုခုတော့ လုပ်ရလိမ့်မယ်လို့ ထင်ပါတယ်။”

အခုလို ပါတီတွေ အတူပူးပေါင်း ဆောင်ရွက်ရေးကို ပြည်ထောင်စု ဒီမိုကရေစီပါတီက လိုက်ပြီး ဆွေးနွေးနေတာပါ။ အဓိက ဘယ်လိုအချက်တွေကို ပူးပေါင်း ဆောင်ရွက်ချင်ရတာလဲ ဆိုတာကို ဦးဖြိုးမင်းသိန်းက ရှင်းပြပါတယ်။

“အဓိက ပူးပေါင်းဆောင်ရွက်ပြီး လုပ်ချင်တဲ့ အပိုင်းတွေကတော့ ရွေးကောက်ပွဲ ကော်မရှင်နဲ့ ပတ်သက်တဲ့ ရွေးကောက်ပွဲဆိုင်ရာ လွတ်လပ် တရားမျှတမှုလို အပိုင်းမျိုးကို ကျနော်တို့အားလုံး ပူးပေါင်း ဆောင်ရွက်ကြမယ်။ နောက်တချက်က လွှတ်တော် ကိုယ်စားလှယ်လောင်းလို နေရာမျိုးကို နေရာလပ်မရှိအောင်၊ အဲဒီမှာလည်း ဒီမိုကရေစီ အင်အားစုတွေ ထိပ်တိုက်မတိုးမိအောင်၊ မကျန်အောင် ကျနော်တို့ ကြိုးစားဖို့အတွက် အဲဒီဟာတွေ အပေါ်မှာ ကျနော်တို့ ပူးပေါင်း ဆောင်ရွက်ချင်ပါတယ်။

“၂၀၁၀ ရွေးကောက်ပွဲဟာ အချိန်ကလည်း နည်းလွန်းအားကြီးတယ်၊ ရန်ပုံငွေကလည်း ပြည်တွင်း အနေအထားအရ အခက်အခဲတွေ ရှိကြတယ်၊ အဲဒီအနေအထားတွေ အပေါ်မှာ ကျနော်တို့ ပူးပေါင်း ဆောင်ရွက်ခြင်းအားဖြင့် ဒီ ၂၀၁၀ ရွေးကောက်ပွဲကို ကျနော်တို့ ပုံစံတခု ပြောင်းလဲပြီး ဖြတ်သန်းနိုင်လိမ့်မယ်လို့ ထင်တယ်။ ဘာဖြစ်လို့လဲဆိုတော့ နိုင်ငံတ၀န်းလုံးကို ပါတီတခုချင်းစီက လိုက်ပြီး ကြိုးစားဖို့ဆိုတာ အချိန်အားဖြင့်ကို တော်တော် ခက်ခဲနေပါတယ်။”

ပါတီတွေ ပူးပေါင်းဆောင်ရွက်ရေးကိစ္စ ညှိနှိုင်းမှုတွေမှာ တိုင်းရင်းသားပါတီတွေ တော်တော်များများလည်း ပါဝင်ပါတယ်။ အခုအချိန်ထိ အားလုံးရဲ့ တုံ့ပြန်မှုက အပြုသဘော ဆောင်ကြတယ်လို့ ဦးဖြိုးမင်းသိန်းက ပြောပါတယ်။ မကြာခင်မှာ သဘောတူညီတဲ့ ပါတီတွေ စုဝေးပြီး တရားဝင် ဆွေးနွေးပွဲတွေ ဖြစ်လာအောင်လည်း လုပ်ဆောင်ဖို့ ပြင်ဆင်နေကြတာပါ။

ရွေးကောက်ပွဲကိုတော့ ဘယ်နေ့မှာ ကျင်းပမလဲဆိုတာ အခုချိန်ထိ စစ်အစိုးရဘက်က မကြေညာသေးပါဘူး။ အဲဒါကလည်း နိုင်ငံရေးပါတီတွေအတွက် သတိထားနေရတဲ့ အချက်တခု ဖြစ်ပါတယ်။ တကယ်လို့ ရွေးကောက်ပွဲ ဘယ်တော့လုပ်မယ် ဆိုတာကို ကြေညာတဲ့ အချိန်နဲ့ ရွေးကောက်ပွဲနဲ့က သိပ်မကွာဘူးဆိုရင် အချိန် မလောက်မင ဖြစ်မှာနဲ့ ရွေးကောက်ပွဲဝင်ရေး စီစဉ်ရတဲ့ အခက်အခဲတွေ အခုထက်ပိုပြီး ရှိလာမှာကိုလည်း နိုင်ငံရေးပါတီ အများစုက စိုးရိမ်နေကြပါတယ်။

မလေးရှား ကမ်းလွန်ပင်လယ်မှာ မြန်မာသင်္ဘောသားတဦး ပျောက်ဆုံးနေ

တောင်တရုတ်ပင်လယ်ထဲမှာ ဓာတုဗေဒ ပစ္စည်းတွေ တင်ဆောင်လာတဲ့ သင်္ဘောတစီးပေါ်မှာ မီးလောင်မှု ဖြစ်ပွားခဲ့တဲ့အတွက် မြန်မာသင်္ဘောသား ၂ ယောက် ဒဏ်ရာရပြီး ၁ ယောက် ပျောက်ဆုံးနေတယ်လို့ မလေးရှား ရေကြောင်းဆိုင်ရာ တာဝန်ရှိသူတွေက ပြောပါတယ်။

မလေးရှားနိုင်ငံ ပါဟမ်းပြည်နယ် ကမ်းလွန်မှာ စင်ကာပူနိုင်ငံ မှတ်ပုံတင်သင်္ဘော ဒီနေ့ မတော်တဆမှု ဖြစ်ပွားခဲ့တာလို့ မလေးရှား ရေကြောင်းဌာန တာဝန်ရှိသူတဦးက ပြောပါတယ်။

သင်္ဘောသား ၂၂ ယောက် လိုက်ပါလာတဲ့ ဒီသင်္ဘောဟာ ဗီယက်နမ်နိုင်ငံကနေ မလေးရှားနိုင်ငံ ပါဟမ်းပြည်နယ်က ကွာအန်တန်ဆိပ်ကမ်းကို ဦးတည် ခုတ်မောင်းလာနေတာ ဖြစ်တယ်လို့လည်း ဆိပ်ကမ်းအာဏာပိုင် တဦးဖြစ်တဲ့ ဆာအိ မိုဟာမက် ဖူဇီဟာဆန်က ပြောဆိုခဲ့တာ ဖြစ်ပါတယ်။

မတော်တဆမှုအတွင်း မြန်မာသင်္ဘောသား ၂ ယောက်ဟာ မီးလောင်ဒဏ်ရာတွေ ရခဲ့ပြီး ၁ ယောက်ကတော့ သင်္ဘောပေါ်က ပြုတ်ကျခဲ့ပုံ ရပါတယ်။ ပျောက်ဆုံးနေတဲ့ သင်္ဘောသားကို ရှာဖွေဖို့အတွက် မလေးရှားနိုင်ငံက ကယ်ဆယ်ရေးတွေကို စေလွှတ်ထားပါတယ်။

ထိုင်းဝန်ကြီးချုပ် မြန်မာပြည်သွားမည်

ထိုင်းဝန်ကြီးချုပ် အဘီဆစ် ၀ိဂျာဂျီဝ ဟာ ၀န်ကြီးချုပ်ဖြစ်ပြီး ပထမဆုံးအကြိမ်အဖြစ် နောက်လ ဩဂုတ်လဆန်းထဲ မြန်မာနိုင်ငံကို သွားရောက်မယ်လို့ ထိုင်းအစိုးရက အတည်ပြုပြောကြားခဲ့ပါတယ်။ ၀န်ကြီးချုပ် အဘီဆစ်ဟာ အရင်နှစ် ဇူလိုင်လတွင်း ဒေါ်အောင်ဆန်းစုကြည်ရဲ့ အမှု ရုံးတင်စစ်ဆေး နေချိန်ကာလကလဲ မြန်မာနိုင်ငံကို သွားရောက်ဖို့ စီစဉ်ထားခဲ့ပေမယ့် မြန်မာစစ်အစိုးရ ဘက်က ပန်ကြားမှုနဲ့  အဲဒီခရီးစဉ်ကို ဆိုင်းငံ့ခဲ့ရတာ ခုချိန်အထိဖြစ်ပါတယ်။ ထိုင်းဝန်ကြီးချုပ်ရဲ့ မကြာမီ မြန်မာပြည် ခရီးစဉ်နဲ့ပတ်သက်ပြီး သတင်းအချက်အလက်နဲ့ သုံးသပ်ချက်တွေကိုတော့ စုံစမ်းမေးမြန်းထားတဲ့ နော်ရှိုးက တင်ပြထားပါတယ်။

ထိုင်းဝန်ကြီးချုပ် အဘီဆစ်ဟာ နောက်လ ဩဂုတ်လ ပထမပတ်ထဲမှာ မြန်မာနိုင်ငံကို သွားရောက်ဖို့ကိစ္စကို ပြီးခဲ့တဲ့လတွေ တွင်းကတည်းက နှစ်နိုင်ငံကြားမှာ ညှိနှိုင်းလာခဲ့တာ ဖြစ်တဲ့အကြောင်းနဲ့ ဒီခရီးစဉ်ရဲ့ ရည်ရွယ်ချက်၊ ဆွေးနွေးဖွယ်ရှိတဲ့ အကြောင်းအရာတွေနဲ့ ပတ်သက်ပြီး ထိုင်းအစိုးရရဲ့ ပြောခွင့်ရသူ Panitan Wattanayagorn က ဗွီအိုအေ မြန်မာပိုင်းကို ပြောခဲ့ပါတယ်။

“၀န်ကြီးချုပ်ဟာ နောက်လ ပထမပတ်ထဲ မြန်မာနိုင်ငံကို သွားမှာဖြစ်ပါတယ်။ ခုခရီးစဉ်ရဲ့ ရည်ရွယ်ချက်ကတော့ ထိုင်းခေါင်းဆောင်သစ် တယောက်အနေနဲ့ မြန်မာနိုင်ငံအပါအ၀င် အာဆီယံနိုင်ငံတွေကို တရားဝင် မိတ်ဆက်ဖို့နဲ့ နှစ်နိုင်ငံဆက်ဆံရေး ပိုမိုခိုင်မာစေဖို့ ဖြစ်ပါတယ်။ တပါထဲမှာပဲ နှစ်နိုင်ငံ နယ်စပ်ကိစ္စ၊ ကုန်သွယ်ရေး၊ ရင်းနှီးမြှုပ်နှံမှု၊ အလုပ်သမားအရေး၊ မူးယစ်ဆေးဝါး တိုက်ဖျက်ရေးကိစ္စ၊ စွမ်းအင်ဆိုင်ရာ ကိစ္စတွေမှာ ဘယ်လို ပူးပေါင်း လုပ်ဆောင်နိုင်မလဲ ဆိုတာကို ဆွေးနွေးမှာဖြစ်ပါတယ်။ ကျနော်တို့ ထိုင်းနိုင်ငံရဲ့ နိုင်ငံရေး အခြေအနေတွေနဲ့ ပတ်သက်ပြီး မြန်မာခေါင်းဆောင်တွေကို အသိပေးဖို့ရှိပါတယ်။”

မြန်မာစစ်အစိုးရက ဒီနှစ်အတွင်း ကျင်းပမယ်လို့ ကြေညာထားတဲ့ ရွေးကောက်ပွဲကိစ္စနဲ့ ပတ်သက်လို့ မစ္စတာ Panitan က -

“ကျနော်ထင်တယ်၊ ပြည်တွင်းက ရွေးကောက်ပွဲဟာ မြန်မာနိုင်ငံသားတွေ ဆုံးဖြတ်ရမှာဖြစ်ပါတယ်။ ယေဘုယျ အားဖြင့်တော့ ကျနော်တို့အနေနဲ့ နိုင်ငံတွေအားလုံးမှာ လွတ်လပ်ပြီး တရားမျှတတဲ့ ရွေးကောက်ပွဲဖြစ်ဖို့ကို အားပေးထောက်ခံပါတယ်။ ဒါကျနော်တို့ရဲ့ ရပ်တည်ချက်ပါ။ မြန်မာနိုင်ငံမှာ ခုချိန်အထိ ဖြစ်ပေါ်တိုးတက်နေတဲ့ အခြေအနေတွေကနေ နှစ်နိုင်ငံကြား ပူးပေါင်းဆောင်ရွက်လို့ ရနိုင်မယ့်အခွင့်အရေးတွေ ပိုပွင့်လာမယ့်လို့ ကျနော်တို့ မျှော်လင့်ပါတယ်။”

ဝန်ကြီးချုပ် အဘီဆစ်ဟာ အရင်နှစ် ဇူလိုင်လတွင်း ဒေါ်အောင်ဆန်းစုကြည်ရဲ့ အမှု ရုံးတင်စစ်ဆေးနေချိန် ကာလကလည်း မြန်မာနိုင်ငံကို သွားရောက်ဖို့ စီစဉ်ထားခဲ့ပေမဲ့ မြန်မာစစ်အစိုးရဘက်က ပန်ကြားမှုနဲ့ အဲဒီခရီးစဉ်ကို ဆိုင်းငံ့ခဲ့ရတာ ခုချိန်အထိ ဖြစ်ပါတယ်။ အခုလာမယ့် ခရီးစဉ်မှာ မြန်မာစစ်ခေါင်းဆောင် ဘယ်သူဘယ်ဝါနဲ့ တွေ့ခွင့်ရမလဲ၊ ဒေါ်အောင်ဆန်းစုကြည်နဲ့ တွေ့ခွင့် တောင်ထားလားဆိုတဲ့ မေးခွန်းကိုတော့ မစ္စတာ ပါနိတန်က အခုလိုဖြေကြပါတယ်။

“၀န်ကြီးချုပ်ရဲ့ ခရီးစဉ်အသေးစိတ်ကို ညှိနှိုင်းနေတုန်းပဲ ဖြစ်တာကြောင့် ဘယ်သူဘယ်ဝါနဲ့ တွေ့မလဲဆိုတာကို အတည်ပြုလို့ မရသလို ငြင်းဆိုလို့လဲ မရသေးပါဘူး။”

ဒါကတော့ ထိုင်း-၀န်ကြီးချုပ်နဲ့အတူ မြန်မာနိုင်ငံကိုလိုက်ပါသွားမယ့် မစ္စတာ Panitan ပြောခဲ့တာပါ။ ထိုင်းအခြေစိုက် ထိုင်းနိုင်ငံအရေး လေ့လာနေတဲ့ ကိုကျော်လင်းဦးကတော့ ထိုင်းဝန်ကြီးချုပ်ရဲ့ မကြာမီခရီးအပေါ် အခုလို သုံးသပ်ပါတယ်။

“ဒီတကြိမ်မှာတော့ ကျနော်ထင်တယ်။ ဒေါ်အောင်ဆန်းစုကြည်နဲ့ တွေ့ခွင့်ရရေးကို အဓိကထားပြီး တောင်းဆိုမယ်လုိ့တော့ မထင်ပါဘူး။ ဒါပေမဲ့ အခုလောလောဆယ် ထိုင်းအစိုးရဘက်က စိတ်ဝင်စားတဲ့ ကိစ္စကတော့ လာမယ့်ရွေးကောက်ပွဲပေါ့လေ။ ဒီနှစ်အတွင်းမှာ ကျင်းပမယ့်ရွေးကောက်ပွဲမှာ အောင်အောင်မြင်မြင်ဖြစ်ဖို့၊ နောက်တခုက မှန်မှန်ကန်ကန် ဖြစ်ဖို့၊ အားလုံးက ကျေနပ်တဲ့ ရွေးကောက်ပွဲမျိုး ဖြစ်ဖို့ ဒါမျိုးကို အဓိကထားပြီး တိုက်တွန်းလိမ့်မယ်လို့ ကျနော် ယူဆပါတယ်။

“နောက်တခုက ပြီးခဲ့တဲ့လထဲကပဲ ထိုင်းနိုင်ငံခြားရေးဝန်ကြီး ကဆစ် က ဥရောပ သမဂ္ဂနဲ့တွေ့တဲ့အချိန်မှာ ဘာပြောသလဲဆိုတော့ ထိုင်းနိုင်ငံထဲမှာရောက်နေတဲ့ ဒုက္ခသည်တွေ ရွှေ့ပြောင်းအလုပ်သမားတွေ၊ နိုင်ငံရေးအဖွဲ့အစည်းတွေကိုပါ လာမယ့် ရွေးကောက်ပွဲ ပြီးတဲ့အချိန်မှာ မြန်မာပြည်ကို စနစ်တကျ ပြန်သွားအောင်လို့ သူတို့ အားထုတ်ကြိုးပမ်းမယ်ဆိုတဲ့ သဘောမျိုး ပြောပါတယ်။ ဥရောပသမဂ္ဂနဲ့ တွေ့တဲ့အချိန်မှာ။ နောက်တခုက အဲဒီအတွက် လိုအပ်တဲ့ ငွေကြေးတွေကိုလဲ ဥရောပ သမဂ္ဂနဲ့ သူတို့ ဆွေးနွေးတယ်လို့ သတင်းတွေ ထွက်လာပါတယ်။ ဆိုတော့အခါကျတော့ ဒီကိစ္စဟာလဲ လာမယ့်လမှာ ၀န်ကြီးချုပ် သွားမယ့်ခရီးစဉ်အတွင်း မြန်မာအစိုးရနဲ့ ဆွေးနွေးတဲ့အထဲမှာ ပါကောင်းပါနိုင်ပါတယ်လို့ ကျနော်တို့ သုံးသပ်ပါတယ်ခင်ဗျ။”

မြန်မာနိုင်ငံကို သွားမယ့်ခရီးစဉ်နဲ့ပတ်သက်ပြီး ထိုင်းဝန်ကြီးချုပ် အဘီဆစ်ကိုယ်တိုင် ဒီကနေ့ ပြောကြားခဲ့ကြောင်း AFP သတင်းတွေ ထဲမှာလဲ ဖော်ပြထားပါတယ်။ ဒါ့အပြင် ထိုင်းဝန်ကြီးချုပ်က အခြေအနေတွေဟာ မရေရာတာတွေ အများကြီး ရှိနေပေမဲ့ မြန်မာနိုင်ငံမှာ အားလုံးပါဝင်နိုင်တဲ့ ရွေးကောက်ပွဲ ဖြစ်တာကို မြင်ချင်ကြောင်းလဲ ပြောခဲ့ပါတယ်။ မြန်မာနိုင်ငံနဲ့ပတ်သက်ပြီး အနောက်နိုင်ငံတွေနဲ့ ထိုင်းနိုင်ငံတို့ဟာ ချဉ်းကပ်ပုံချဉ်းကပ်နည်း မတူကြပေမဲ့လို့ ရည်ရွယ်ချက်တွေ ချင်းတော့ တူညီကြောင်း ပြောခဲ့တာကိုလည်း AFP သတင်းမှာ ကိုးကားရေးသား ထားပါတယ်။

နိုင်ငံရေးပါတီတွေ လွတ်လပ်ခွင့် ဘာမှမရှိ

မြန်မာပြည်မှာဒီနှစ်အတွင်းကျင်းပမယ်ဆိုတဲ့ ရွေးကောက်ပွဲတွေမှာ ၀င်ပြိုင်ကြမယ့် တရားဝင် နိုင်ငံရေးပါတီ အများစုဟာ အာဏာပိုင်တွေရဲ့  စောင့်ကြည့်မေးမြန်းမှုတွေကို နေ့စဉ်လိုလိုရှိနေလို့ နိုင်ငံရေးလွတ်လပ်ခွင့်မရှိတဲ့ အခြေအနေတွေကို ညည်းညူနေကြပါတယ်။ ဒီလို စောင့်ကြည့်မှုတွေကြောင့် ပြည်သူတွေကလဲ ပါတီတွေရဲ့  လှုပ်ရှားမှုတွေမှာ ပါဝင်ပတ်သက်ဖို့ စိုးရိမ်နေကြတယ်လို့ ဆိုပါတယ်။ ဒီအကြောင်း ဘန်ကောက်မြို့ ကနေ ကိုကျော်အောင်လွင်က သတင်းပေးပို့ထားပါတယ်။တရားဝင်ပါတီအဖြစ် ရွေးကောက်ပွဲကော်မရှင်က အတည်ပြု သတ်မှတ်ပေးထားတဲ့ နိုင်ငံရေးပါတီတွေ ဖြစ်နေပေမဲ့လဲ နိုင်ငံရေး လုပ်ဆောင်မှုတွေမှာ အာဏာပိုင်တွေဘက်က တရားမ၀င် အဖွဲ့အစည်းလို ဆက်ဆံခံနေရတာတွေ အမြဲတန်းလိုလို စောင့်ကြည့်ခံနေရပြီး ပါတီလှုပ်ရှားမှုတွေကိုလဲ စုံစမ်းမေးမြန်းနေလို့ နိုင်ငံရေး လွတ်လပ်ခွင့်မရှိတဲ့ နိုင်ငံရေးပါတီတွေဘ၀ ရောက်နေရတဲ့အဖြစ်ကို တော်တော် စိတ်ညစ်နေကြပါတယ်။

“လွတ်လပ်မှုကတော့ ကျနော်တို့ လုံးဝ လွတ်လပ်မှုမရှိပါဘူး။ သက်ဆိုင်ရာ အာဏာပိုင်တွေကနေပြီးတော့ နေ့တိုင်းလာပြီးတော့ ဘာလုပ်နေလဲ၊ အစည်းအဝေး လုပ်နေသလား၊ ဘယ်သူလာလဲ စာရင်းပေးပါဆိုတော့ ဒါတွေက ကျမတို့မှာ လွတ်လပ်ခွင့်တွေကတော့ အင်မတန် ဆုံးရှုံးပါတယ်။ အနှောက်အယှက် ဖြစ်ပါတယ်။ ဘာမှ ကျမတို့ လျှို့ဝှက်လုပ်တာလဲ မရှိဘူးလေ။ ပါတီတခုထောင်ပြီး တည်ထောင်ခွင့်ရပြီဆိုရင် အဲဒီပါတီက ဘာလုပ်ရသလဲဆိုတာတော့ လူတိုင်းသိနေတဲ့ကိစ္စပဲ။ အဲဒီသိနေတဲ့ကိစ္စကိုပဲ ဘာလုပ်နေသလဲ၊ ဒီနေ့ အစည်းအဝေး ရှိသလား၊ အဲဒီအစည်းအဝေးရဲ့ မိနစ်လဲ ပေးရတယ်။ ဘယ်သူတွေတက်တယ်။ ဘာလုပ်တယ်ပေါ့နော်၊ ဒါတွေ အကုန်လုံး နေ့တိုင်း လာမေးနေတယ်၊ နောက်ပြီးတော့ ဧည့်သည်လာရင် ဓါတ်ပုံလာရိုက်တယ်။”

အဲဒါကတော့ ဒီမိုကရက်တစ်ပါတီရဲ့  အတွင်းရေးမှူးချုပ် ဒေါ်သန်းသန်းနုက ရှင်းပြခဲ့တာပါ။ အာဏာပိုင်တွေက အမြဲလိုလို စောင့်ကြည့်နေကြတာတွေကြောင့် သူတို့ရဲ့ ပါတီရုံးတွေဖွင့်တဲ့အခါ အိမ်ရှင်တွေက ကြာကြာမထားရဲလို့ အခုဆို သူတို့ပါတီရုံးခန်း ပြောင်းပြီးဖွင့်နေရတာ ၃ နေရာ ရှိသွားပြီလို့ဆိုပါတယ်။

“ဒါ တတိယမြောက်ရုံးပါ။ ဒီနှစ်မှ ကျမတို့ ဆိုင်းဘုတ်တင်ရပါတယ်။ အဲဒီလိုဟာလေးတွေကအစ ကျမတို့မှာ အခက်အခဲ ရှိပါတယ်။ အခက်အခဲ ရှိတယ်ဆိုတာ အိမ်ရှင်တွေကလဲ အိမ်မငှါးရဲဘူးပေါ့နော်။ မငှါးရဲတော့ ၆ လစေ့ရင် ထွက်ပါတော့ ဆိုတော့ ပထမ အိမ်က ထွက်ရတယ်။ နောက် ဒုတိယအိမ်ကျတော့ ၆ လတခါ ငှါးပြန်တော့ ၆ လမဟုတ်ဘူး၊ ၄ လပဲရှိသေးတယ်။ သူတို့က ငွေပြန်အမ်းပါ့မယ် ထွက်ပါတဲ့။ သူတို့ ဆက်မထားချင်ဘူးပေါ့လေ။ သူတို့ကိုယ်တိုင် မကြုံတွေ့ရတာတောင်ပဲ သူတို့ ပတ်ဝန်းကျင်မှာ တွေ့ကြုံရတဲ့ အဖြစ်အပျက်တွေ အပေါ်မှာမူတည်ပြီးတော့ သူတို့ ကြောက်ကြတာပေါ့လေ။ အရင်တုန်းကဆိုရင် ချိတ်ပိတ်ခံရတာတို့ ဘာတို့ ရှိတယ်မဟုတ်လား။”

အဲဒါကတော့ ဒီမိုကရက်တစ်ပါတီရဲ့  အတွင်းရေးမှူးချုပ် ဒေါ်သန်းသန်းနုက သူတို့ကြုံတွေ့နေရတဲ့ အခက်အခဲတွေကို ရှင်းပြခဲ့တာပါ။ တကယ်တော့ ဒေါ်သန်းသန်းနုတို့ ပါတီတခုတည်း အခုလို အခြေအနေတွေ ကြုံနေရတာ မဟုတ်ပါဘူး။ မတူကွဲပြားခြင်းနှင့် ငြိမ်းချမ်းရေးပါတီရဲ့  အတွင်းရေးမှူး ကိုနေမျိုးဝေ ကလဲ သူတို့အဖွဲ့ ရဲ့  အခြေအနေတွေကို ရှင်းပြပါတယ်။

“ညဘက် အိမ်ခါနီးတဲ့အချိန်ထိတောင်မှလဲ ဟိုက ဖုန်းဝင်လာပြီးတော့ လာတွေ့လို့ လက်ခံထားပြီး စကားပြောရတာ ရှိတယ်။ ဘိုကလေး ရောက်တုန်းက အဲဒီ စအဖ ကနေပြီးတော့ လာတွေ့တယ်။ အဲဒါမျိုး ရှိတယ်။ နောက်တခါ ထူးထူးခြားခြား ဗျာ၊ ဘိုကလေးဘက်ကို ဆင်းသွားတဲ့အခါမှာ ရဲက ၂ ယောက်လောက် အနားမှာရှိတော့ ၁၀ ယောက်လောက်ပဲ လာတယ်ဗျ။ ကျန်တဲ့သူတွေက မလာရဲတော့ဘူး။ အဲဒါမျိုး ရှိတယ်။ နောက်တခါ မြောက်ဥက္ကလာ၊ မြောက်ဥက္ကလာမှာ မြို့နယ်ရုံး မဖွဲ့ခင်မှာ ကျနော်တို့က လ္ဘက်ရည်ဝိုင်းလေး လုပ်ပြီးတော့ နိုင်ငံရေးနဲ့ပတ်သက်တာတွေ မေးကြပြောကြဖို့ လုပ်တော့ လူ ၃၀ လောက် လာတယ်ဗျ။ ရုံးခန်း တကယ်ဖွဲ့တဲ့နေ့ကျတော့ အာဏာပိုင် အဖွဲ့အစည်းက လူ ၂၀ လောက်လာတယ်။ SB တို့ ရဲတို့ စအဖ တို့ နေမှာပေါ့ဗျာ။ လာတော့ အဲဒီမှာ အခမ်းအနား တက်ရောက်သူ တယောက်မှ မရှိပါဘူးခင်ဗျာ။”

အာဏာပိုင်တွေကြောင့် ပါတီလုပ်ငန်း အနှောက်အယှက်တွေ ဖြစ်နေတယ်ဆိုပေမဲ့ ကိုနေမျိုးဝေက အာဏာပိုင်တွေကိုလဲ နိုင်ငံရေး ကိစ္စတွေမှာ ပါဝင်ဆွေးနွေး စေချင်နေတာပါ။

“ကြီးမားတဲ့ အနှောက်အယှက်ကတော့ ဖြစ်တယ်။ ဒါပေမဲ့ ကျနော်တို့က မကန့်ကွက်ဘူး။ အနာဂတ်လမ်းကြောင်း ဖန်တီးတည်ဆောက်ဖို့ ပြောဆိုဆွေးနွေးနေတာ။ သူ ပါဝင်ပတ်သက်လို့ရတယ်။ သူ ပါဝင် ဆွေးနွေးလို့ရတယ်။”

အခုဆိုရင် နိုင်ငံရေးပါတီအဖြစ် မှတ်ပုံတင်ခွင့် လျှောက်ထားတဲ့ပါတီ ၃၉ ပါတီ ရှိနေပြီး အဲဒီအထဲက ၃၆ ပါတီကို မှတ်ပုံခွင့် ပေးခဲ့ပြီးပြီလို့ စစ်အစိုးရပိုင် သတင်းစာတွေမှာ ဖော်ပြထားပါတယ်။ ပါတီတွေ တဖြည်းဖြည်း ပေါ်လာနေပေမဲ့ အခုချိန်ထိ လွတ်လွတ်လပ်လပ် နိုင်ငံရေး လုပ်ခွင့်မရဘဲ ဖြစ်နေတာကို ကိုနေမျိုးဝေကလဲ အားမရနိုင်ဘဲဖြစ်နေပါတယ်။

“အားမရပါဘူး။ အခုလက်ရှိ နိုင်ငံရေးပါတီ၊ ကျနော်အပါအ၀င် ကျန်တဲ့ နိုင်ငံရေးပါတီ အားလုံး လုပ်နေတဲ့ကိစ္စမှာ ရွေးကောက်ပွဲ အတွက် အားကောင်းမောင်းသန် နဲ့ ဖြတ်သန်းရတဲ့ အခြေအနေ ကျနော် မတွေ့ပါဘူး။”

ဒီနှစ်အတွင်း ကျင်းပမယ်ဆိုတဲ့ ရွေးကောက်ပွဲတွေဟာ အခုချိန်ထိ ဘယ်နေ့လုပ်မယ် ဆိုတာကို မြန်မာစစ်အစိုးရက မကြေညာသေးပါဘူး။ နိုင်ငံရေးပါတီတွေ အနေနဲ့လဲ ရွေးကောက်ပွဲမတိုင်ခင်မှာ အခု အခြေအနေထက် ပိုပြီးလွတ်လပ်တဲ့ အခွင့်အရေးတွေ ရဖို့လဲ သိပ်ပြီးတော့ မမျှော်လင့်ထားကြဘူးလို့ ဆိုပါတယ်။

ရွေးကောက်ပွဲပြီး လွှတ်တော်ခေါ်ဖို့ ဥပဒေမရှိ

၂၀၀၈ ဖွဲ့စည်းပုံအရ ရွေးကောက်ပွဲ လုပ်မယ်ဆိုရင် လွှတ်တော်ခေါ်လို့ရမှာ မဟုတ်ဘူးလို့ ပြည်ထောင်စု ဒီမိုကရေစီပါတီက ဆိုပါတယ်။ ဒါကြောင့်ပဲ ဒီပါတီက ဖွဲ့စည်းပုံနဲ့ ရွေးကောက်ပွဲ ကော်မရှင်တို့ရဲ့ လုပ်ပိုင်ခွင့်တွေကို ရှင်းရှင်းလင်းလင်း ထုတ်ပြန်ဖို့ မြန်မာစစ်ခေါင်းဆောင် ဗိုလ်ချုပ်မှူးကြီးဆီကို အိတ်ဖွင့်ပေးစာတစောင် ပေးခဲ့ပါတယ်။ အပြည့်အစုံကို ဆက်သွယ်စုံစမ်းထားတဲ့ ဗွီအိုအေ ထိုင်းအခြေစိုက် သတင်းထောက် ကိုကျော်ထင်က တင်ပြပေးထားပါတယ်။

ပြည်ထောင်စု ဒီမိုကရေစီပါတီက ၂၀၀၈ ဖွဲ့စည်းပုံနဲ့ ရွေးကောက်ပွဲ ကော်မရှင်ရဲ့ လုပ်ထုံးလုပ်နည်းတွေဟာ ရှင်းရှင်းလင်းလင်း မရှိတာကြောင့် ဒါကို ရှင်းရှင်းလင်းလင်း ထုတ်ပြန်ပေးဖို့ ပြီးခဲ့တဲ့ တနင်္လာနေ့မှာ ဗိုလ်ချုပ်မှူးကြီးသန်းရွှေဆီ လိပ်မူပြီး အိတ်ဖွင့်ပေးစာ ပေးခဲ့တာ ဖြစ်ပါတယ်။

ဒီစာမှာ ၂၀၀၈ ဖွဲ့စည်းပုံ အာဏာတည်တဲ့နေ့ မတိုင်မီ ပြည်သူ့လွှတ်တော် အပါအ၀င် လွှတ်တော်အဆင့်ဆင့်ရဲ့ ပထမအကြိမ် အစည်းအဝေး ခေါ်ယူနိုင်ဖို့အတွက် နအဖအနေနဲ့ ဘယ်လို ဆောင်ရွက်မယ်ဆိုတာ ရှင်းရှင်းလင်းလင်း ထုတ်ပြန်ဖို့ လိုတယ်လို့ တိုက်တွန်းထားပါတယ်။

ပြည်ထောင်စု ဒီမိုကရေစီပါတီ ဥက္ကဋ္ဌ ဦးဖြိုးမင်းသိမ်းက ၂၀၀၈ ဖွဲ့စည်းပုံနဲ့ ရွေးကောက်ပွဲ လုပ်မယ်ဆိုရင် လွှတ်တော်ခေါ်ဖို့ ခက်မယ်လို့ ဆိုပါတယ်။

“အဓိက အချက်ကတော့ ၂၀၀၈ ဖွဲ့စည်းပုံနဲ့ ရွေးကောက်ပွဲ လုပ်မယ်ဆို လွှတ်တော်ခေါ်လို့ မရဘူး။ မရတဲ့ အကြောင်းရင်းက ၂၀၀၈ ဖွဲ့စည်းပုံမှာ ဖွဲ့စည်းပုံ အခြေခံဥပဒေကို အာဏာတည်မယ့်ရက်ကို ပထမအကြိမ် ပြည်သူ့လွှတ်တော် ခေါ်ယူတဲ့ အချိန်ကျမှ အာဏာတည်မှာ၊ ခေါ်ဖို့အတွက် ဖွဲ့စည်းပုံ အခြေခံဥပဒေနဲ့ အညီ ဆောင်ရွက်ရမယ့် လုပ်ထုံးလုပ်နည်းတွေ ပါတယ်၊ ကျနော်တို့စာမှာ ဖော်ပြထားတယ်။ ဒါတွေကို လုပ်ဖို့ ၂၀၀၈ ဖွဲ့စည်းပုံက အတည်ပြုပြီးမှ ဖြစ်မှာ။ Referendum လုပ်ပြီးတဲ့အချိန်မှာ အာဏာမတည်ဘဲ ပထမအကြိမ် ပြည်သူ့လွှတ်တော်ခေါ်မှ အာဏာတည်ရမယ် ဆိုတဲ့အတွက် ပြောင်းပြန်ဖြစ်သွားတယ်။

“ဘယ်လိုဖြစ်သွားလဲဆိုတော့ ပြည်သူ့လွှတ်တော် ခေါ်ယူရေးအတွက် ၂၀၀၈ ဖွဲ့စည်းပုံနဲ့အညီ ဆောင်ရွက်ရမယ့် ကိစ္စတွေက ဆောင်ရွက်လို့ မရဘူး ဖြစ်နေတယ်၊ ဘာလို့ဆိုတော့ အာဏာမတည်သေးလို့။ အမျိုးသား ညီလာခံက ချမှတ်လိုက်တဲ့မူမှာ အဲဒီအတိုင်း ပါတယ်၊ Referendum လုပ်ပြီးရင် အာဏာတည်စေရမယ်လို့ ပါတယ်။ ဒါပေမဲ့ ဖွဲ့စည်းပုံကို ၂၀၀၈ မှာ အတည်ပြုထားရင် ၂၀၁၀ အထိ လက်ရှိ စစ်အစိုးရက ဖွဲ့စည်းပုံအောက်ကို ရောက်မှာ၊ အဲဒီ ဖွဲ့စည်းပုံအောက် ရောက်မှာစိုးလို့ သူက နောက်ကို ရွှေ့လိုက်တာ။”

၂၀၀၈ ဖွဲ့စည်းပုံမှာတော့ ပြည်သူ့လွှတ်တော်ကို အထွေထွေ ရွေးကောက်ပွဲ ကျင်းပပြီး ရက် ၉၀ အတွင်း ခေါ်ယူရမှာဖြစ်ပြီး ပြည်သူ့လွှတ်တော် ခေါ်ယူတဲ့နေ့မှာပဲ ဖွဲ့စည်းပုံအာဏာ တည်တယ်လို့ ပါရှိပါတယ်။

NLD ဥပဒေ အထောက်အကူပြု အဖွဲ့ဝင် ရှေ့နေ ဦးအောင်သိန်းကလည်း ၂၀၀၈ ဖွဲ့စည်းပုံမှာ လွှတ်တော်အဆင့်ဆင့် ခေါ်ယူရေး အချိန်ကာလကို တိတိကျကျ မဖော်ပြထားဘူးလို့ ဆိုပါတယ်။

“အဲဒါကတော့ မှန်တယ်ဗျ၊ သူက လွှတ်တော်ပေါ်ပြီးတဲ့ နောက်မှာက နအဖက နေပြီးတော့ သူ အာဏာလွှဲပေးမယ်ပေါ့။ အာဏာလွှဲပေးမယ်ဆိုတာ ပထမအကြိမ် ပြည်သူ့လွှတ်တော် ခေါ်ပြီးတဲ့ နောက်ပိုင်းမှာ အာဏာလွှဲပေးမယ်ဆိုတာ ဘယ်ကာလလဲဆိုတော့ ပထမအကြိမ် ပြည်သူ့လွှတ်တော်ကလည်း ဘယ်လို အချိန်အခါမျိုးကျမှ လုပ်မလဲဆိုတဲ့ ကိစ္စရပ်တွေတော့ ရှိတာပေါ့ဗျာ။ ဒါက တဘက်က မြှုပ်ထားတဲ့ အကွက်တကွက် ဖြစ်ကောင်း ဖြစ်နိုင်ပါတယ်။

“ရက်ပေါင်း ၉၀ အတွင်း ခေါ်ပေးမယ်ဆိုတာ ရွေးကောက်ပွဲပြီး ပြည်သူ့လွှတ်တော် ခေါ်မယ်ဆိုတာ ရွေးကောက်ပွဲ ပြီးတာနဲ့ ပြည်သူ့လွှတ်တော် တန်းခေါ်လို့ မရနိုင်သေးဘူးခင်ဗျ။ ဒါတွေက သူတို့ ကိုယ်စားလှယ် စိစစ်တာတို့၊ ဘာတို့၊ ညာတို့ ရှိဦးမှာပေါ့။ အဲဒီကိစ္စတွေ ပြီးမှသာလျှင် သူတို့ဘက်က အဆုံးအဖြတ်ပေးမယ့် ဟာတခု ဖြစ်ပေါ်လိမ့်မယ် ထင်ပါတယ်။”

အခုလို တိတိကျကျ မဖော်ပြတဲ့အတွက် ၉၀ ခု ရွေးကောက်ပွဲရလဒ်လို ဖြစ်လာနိုင်တယ်လို့ ဦးဖြိုးမင်းသိမ်းက ဆက်ပြောပါတယ်။

“ဘာထိခိုက်နစ်နာမလဲဆိုရင် ၂၀၁၀ ရွေးကောက်ပွဲပြီးရင် လွှတ်တော်ခေါ်ယူလို့ မရဘူးဆိုရင် ဒီရွေးကောက်ပွဲဝင်တာ ဘာအဓိပ္ပာယ်မှ မရှိနိုင်ဘူးလေ။ ၂၀၀၈ ဖွဲ့စည်းပုံရဲ့ ဖော်ပြထားချက်အရ၊ ရွေးကောက်ပွဲ ဥပဒေရဲ့ ဖော်ပြထားချက်တွေ အရဆိုရင် ၂၀၁၀ ရွေးကောက်ပွဲ အပြီးမှာ လွှတ်တော်ခေါ်ယူဖို့အတွက် ခိုင်မာတဲ့ ဥပဒေတရပ် မရှိဘူး။

“၉၀ ခုနှစ်တုန်းကလည်း အဲဒီလို ပြဿနာမျိုး ပေါ်ခဲ့ဖူးတယ်။ ၉၀ ရွေးကောက်ပွဲအပြီး လွှတ်တော်ခေါ်ယူရေး အစီအစဉ်တွေ မပါလာတဲ့အတွက် အခု နှစ် ၂၀ လုံးလုံး လွှတ်တော်မခေါ်နိုင်ခဲ့ဘူး။ အခုတကြိမ်မှာလည်း ၂၀၁၀ ရွေးကောက်ပွဲအပြီးမှာ ၂၀၀၈ ဖွဲ့စည်းပုံနဲ့အညီ လွှတ်တော်ခေါ်လို့ မရဘူးဆိုရင် ဒီတကြိမ်မှာလည်း ရွေးကောက်ပွဲဝင်လို့ အဖြေမှန်တွေ မထွက်လာမှာကို ကျနော်တို့က စိုးရိမ်တယ်။”

ဒီအခြေအနေအပေါ် အခြား နိုင်ငံရေးပါတီတွေနဲ့လည်း ဆွေးနွေးသွားမယ်လို့ ပြည်ထောင်စု ဒီမိုကရေစီပါတီက ဆိုပါတယ်။

နေပြည်တော်ကြွက်မှာ ပလိပ်ရောဂါတွေ့

နေပြည်တော်မှာ ပုလိပ်ရောဂါကြောင့် သေဆုံးနေတဲ့ ကြွက်သေတွေကို တွေ့ရှိခဲ့တဲ့အတွက် အစိုးရက သက်ဆိုင်ရာ ဌာနတွေကို သတိထားဖို့ ညွှန်ကြားချက် ထုတ်ပြန်ထားတယ်လို့ ရိုက်တာသတင်းဌာနက ဖော်ပြရေးသားပါတယ်။ ပုလိပ်ရောဂါနဲ့ အလှမ်းဝေးခဲ့ပြီ ဖြစ်တဲ့ မြန်မာပြည်သူတွ အနေနဲ့ ဒီကိစ္စကို သတိထားပြီး စောင့်ကြည်ဖို့ လိုတယ်လို့လည်း နေပြည်တော်ဝန်းကျင်က ကျန်းမာရေးဆိုင်ရာ ၀န်ထမ်းတွေကလည်း ပြောပါတယ်။ ဒီအခြေအနေ အပြည့်အစုံကို မသင်းသီရိက တင်ပြပေးထားပါတယ်။

ပြီးခဲ့တဲ့ ရက်သတ္တပတ် အတွင်းမှာပဲ ရန်ကုန်-နေပြည်တော် ကားလမ်းမပေါ်က မှတ်တိုင်အမှတ် ၄၅ ၀န်းကျင်လောက်မှာ ကြွက်အုပ်ကြီးတွေ ဖြတ်သန်းသွားလာခဲ့တဲ့ သတင်းတွေ ထွက်လာခဲ့သလို ပဲခူးတိုင်း၊ ရန်ကုန်-နေပြည်တော် ၈ လမ်းသွား အမြန်လမ်းမပေါ်က ဒိုက်ဦးမြို့နယ်ပိုင် ဘာနီကျေးရွာ၊ ကျောက်တလုံးနဲ့ မရမ်းချောင်းကျေးရွာ အနီးမှာ ကြွက်တွေ အများအပြား ဖြတ်သန်းဝင်ရောက်ခဲ့တဲ့ သတင်းတွေကို ပြည်တွင်းထုတ် သတင်းဂျာနယ်တွေမှာ ရေးသားကြပါတယ်။ အဲဒီနောက်ပိုင်း ကြွက်ရောဂါ ကာကွယ်ရေး နှိုးဆော်ချက်တွေလည်း အစိုးရပိုင် သတင်းစာတွေမှာ ဖော်ပြလာကြပါတယ်။

တခါ စစ်အစိုးရ ရုံးစိုက်ရာ နေပြည်တော်က ၀န်ကြီးဌာန ရုံးတခုမှာ ပလိပ်ရောဂါ ကူးစက်နေတဲ့ ကြွက်သေ ၆ ကောင်လောက် တွေ့ရှိတဲ့အကြောင်း အမည်မဖော်လိုသူ ၀န်ထမ်းတယောက်ရဲ့ ပြောဆိုချက်ကို ရိုက်တာသတင်းက ဖော်ပြပါတယ်။ ဒါကြောင့် နေပြည်တော် ကျန်းမာရေး ၀န်ကြီးဌာနက ပုလိပ်ရောဂါ ကာကွယ်ရေး သတိပေးချက်တွေ ထုတ်ပြန်ထားတယ်လို့လည်း ရိုက်တာက ဆိုပါတယ်။ အခုလို ကြွက်အများအပြား တွေ့ရတာဟာ ကြွက်နဲ့ပတ်သက်တဲ့ ပလိပ်ရောဂါတွေကို ဒီအချိန်မှာ အထူး သတိထားသင့်တယ်လို့ နေပြည်တော်အနီး ပျဉ်းမနားမြို့က ကျန်းမာရေးဆိုင်ရာ ဆရာဝန်တဦးက ဆိုပါတယ်။

“မဖြစ်ဘူးလို့တော့ ပြောလို့မရဘူး။ ကြွက်နဲ့ပတ်သက်တဲ့ ပလိပ်ရောဂါတို့ ဘာတို့ ဖြစ်နိုင်တာပဲလေ။ ကြွက်နဲ့ပတ်သက်တာ များလာရင်တော့ ဖြစ်မယ်ဆိုရင် ဖြစ်နိုင်တာပေါ့။ မဖြစ်နိုင်ဘူးလို့တော့ ပြောလို့မရဘူး။ ဘယ်လောက် အတိုင်းအတာအထိ ဖြစ်လာမယ်ဆိုတာတော့ ကျနော် တခါမှ ဒီလို ကြွက်တွေ အလုံးအရင်းနဲ့ မကြုံဘူးတော့ သေချာတော့ မသိဘူး။”

အထူးသဖြင့် ဒီအချိန်မှာ ဒေသခံလူထုနဲ့ ကျန်းမာရေးဌာနတွေကြား အချိတ်အဆက်မိမိ ကြွက်ရောဂါ အန္တရာယ်ကို သတိထား စောင့်ကြည့်ဖို့ လိုအပ်တယ်လို့လည်း သူက တိုက်တွန်းပါတယ်။

“ကြွက်တွေ သေတာတို့၊ ကျတာတို့ ရှိရင် စောစောစီးစီး နီးရာဌာနတွေကို အသိပေးရမှာပေါ့။ တကိုယ်ရေ သန့်ရှင်းတာတို့၊ ကြွက်က ကူးစက်နိုင်တဲ့ ပလိပ်ရောဂါတို့ ဘာတို့ ရှိနေတဲ့အခါကြတော့ ပြည်သူလူထု အနေနဲ့ကတော့ စောင့်ကြည့်နေရမှာပေါ့။ ကျန်းမာရေးဌာနကလည်း သူတို့ အမြဲတမ်း သတိပေးပါတယ်။ သတိပေးတဲ့အတိုင်း လိုက်နာဖို့ပါပဲ။

“အဓိကကတော့ ကိုယ့်အနီးအနားမှာ ကြွက်ကျတယ်၊ သေတယ်ဆိုရင် အနည်းနဲ့ အများတော့ တဦးနဲ့တဦး ကျန်းမာရေးဆိုင်ရာ ဌာနတွေကို အသိပေးမယ်၊ ကာကွယ်ဖို့တို့၊ ရောဂါမပြန့်ပွားအောင်တို့ ဒါတွေလုပ်ဖို့တော့ ရှိမှာပေါ့။ ပလိပ်ကလည်း မဖြစ်တာ ကြာပြီဆိုတော့ လူတွေကလည်း အဲဒါနဲ့ ပတ်သက်လို့တော့ နည်းနည်း အလှမ်းဝေးမှာပေါ့။ အဲဒါတွေကို ပြန်ပြီးတော့ ကျန်းမာရေးနဲ့ ပတ်သက်တဲ့လူတွေက တဆင့်တဆင့် ပိုပြီးတော့ နားလည်လာအောင်လို့ ဖြန့်ဝေပေးဖို့ပါပဲ။”

ပျဉ်းမနားမြို့ခံ ဆရာဝန်တဦး ပြောပြခဲ့တာ ဖြစ်ပါတယ်။

မြန်မာနိုင်ငံ အလယ်ပိုင်းက ကြွက်တွေဟာ ပဲခူးတိုင်းအတွင်းကို အုပ်နဲ့ချီ ရွှေ့ပြောင်းပြီး ၀ါးတောတွေထဲ ၀င်သွားကြတယ်လို့လည်း သတင်းတွေမှာ ဖော်ပြထားပါတယ်။ ညဘက်အချိန် အုပ်စုနဲ့ လမ်းမတွေပေါ် ဖြတ်ပြေးကြတဲ့ ကြွက်တွေကို ကားတွေက ရှောင်တိမ်းမရ နင်းကြိတ်ခဲ့ရတဲ့အထိ များပြားသလို ဒေသခံတွေကတော့ စပါးနဲ့ သီးနှံစိုက်ခင်းတွေ ပျက်စီးမယ့်အရေးလည်း တွေးပူနေကြပါတယ်။ အခုလို ကြွက်တွေ အစုလိုက် အပြုံလိုက် ရွှေ့ပြောင်းလာတာ ဒါ ပထမဦးဆုံးအကြိမ် တွေ့ရတာ ဖြစ်တယ်လို့ ဒေသခံတွေက ပြောသလို ကြွက်တွေက ၀မ်းဗိုက်ဖြူ ကြွက်အမျိုးအစားများ ဖြစ်တယ်လို့လည်း ပြည်တွင်းထုတ် သတင်းတွေမှာ ဖော်ပြ ရေးသားထားကြပါတယ်။

သမဂ္ဂနေရာ သမိုင်းဝင်ပြတိုက် ထားဖို့ ကျောင်းသားဟောင်းတွေ အဆိုပြု

လွန်ခဲ့တဲ့ ၄၈ နှစ်က မိုင်းခွဲဖျက်ဆီးတာ ခံခဲ့ရတဲ့ ကျောင်းသားသမဂ္ဂ အဆောက်အဦး မြေနေရာမှာ လွတ်လပ်တဲ့ တချိန်ကျရင် သမိုင်းဝင် ကျောင်းသားသမဂ္ဂ ပုံစံအတိုင်း ပြန်လည်တည်ဆောက်ပြီး သမိုင်းဝင် နေရာတခုအဖြစ် ထားရှိသွားဖို့ ၆၀ ပြည့်လွန်၊ ၇၀ ကျောင်းသားခေါင်းဆောင်တွေ တိုင်ပင် ဆုံးဖြတ်ထားကြပါတယ်။ ဘာကြောင့် ဒီလို ဆုံးဖြတ်ခဲ့တယ်၊ ဘယ်လို ကျောင်းသားသမဂ္ဂ အဆောက်အဦးကို ပြန်လည်တည်ဆောက်မယ် ဆိုတာတွေကို ကိုသားညွန့်ဦးက ဆက်သွယ်မေးမြန်းပြီး တင်ပြပေးထားပါတယ်။

ကျောင်းသားသမဂ္ဂကို ၆၂ အာဏာသိမ်း စစ်ခေါင်းဆောင်တွေက မိုင်းခွဲဖျက်ဆီးခဲ့တဲ့ ဖြစ်ရပ်ကြောင့် ၆၂ ခုနှစ် အာဏာသိမ်း စစ်တပ်ဟာ စစ်အာဏာရှင်တွေ ဖြစ်တယ်ဆိုတဲ့ သရုပ်သကန် ပိုပြီးတော့ ပေါ်လွင်သွားစေခဲ့တယ်လို့ သမိုင်းလေ့လာသူတွေက ထောက်ပြခဲ့ကြပါတယ်။ ကျောင်းဆောင်စည်းမျဉ်းဆိုင်ရာ တင်းကျပ်မှုတွေကို အကြမ်းမဖက်ဘဲ ငြိမ်းငြိမ်းချမ်းချမ်း ဆန္ဒပြခဲ့တဲ့ ကျောင်းသားတွေကို ၁၉၆၂ ခုနှစ်၊ ဇူလိုင်လ ၇ ရက်နေ့မှာ စစ်အစိုးရက သူပုန်တွေ၊ ဆူပူရေးသမားတွေ တံဆိပ်ကပ်ပြီး အင်အားသုံး ဖိနှိပ်ခဲ့သလိုပဲ ဇူလိုင် ၈ ရက် မနက်အစောပိုင်းမှာတော့ သမိုင်းဝင် ကျောင်းသားသမဂ္ဂ အဆောက်အဦးကိုလည်း မိုင်းခွဲ ဖျက်ဆီးလိုက်ပါတယ်။

အဲဒီကစပြီး စစ်အစိုးရ အဆက်ဆက်ဟာ ကျောင်းသားလှုပ်ရှားမှုတွေနဲ့ ဆက်တိုက်ပဲ ထိပ်တိုက် တွေ့ခဲ့ရပါတယ်။ ဒါကြောင့်လည်း အခု ကျောင်းသားသမဂ္ဂ အဆောက်အဦး ဖျက်ဆီးခံရတဲ့ နေရာဟာ ကျောင်းသားလှုပ်ရှားမှုသက်သက် မဟုတ်ဘဲ အမျိုးသား လွတ်လပ်ရေးနဲ့ စစ်အာဏာရှင်စနစ် ဆန့်ကျင်ရေး သမိုင်းကြောင်းရဲ့ ပြယုဂ်နေရာ ဖြစ်တယ်လို့ ၇၀ ခုနှစ်ကာလ ကျောင်းသားဟောင်း၊ မြန်မာ့သမိုင်းဆိုင်ရာ လေ့လာသူ ဦးအောင်စောဦးက ပြောပါတယ်။

“ကျောင်းသားသမဂ္ဂနဲ့ ဒီကိစ္စတွေက ဗမာပြည်ရဲ့ နယ်ချဲ့ဆန့်ကျင်ရေးနဲ့ လွတ်လပ်ရေး ထိန်းသိမ်းရေးအတွက် တိုက်ပွဲနဲ့ ဆက်စပ်နေတဲ့နေရာ ဖြစ်တယ်။ ပြည်တွင်းစစ် ရပ်စဲရေးနဲ့ ပြည်တွင်းငြိမ်းချမ်းရေး တိုက်ပွဲနဲ့ ဆက်စပ်တဲ့နေရာ ဖြစ်တယ်။ စစ်အာဏာရှင်စနစ် ဆန့်ကျင်ရေး၊ ဒီမိုကရေစီနဲ့ လူ့အခွင့်အရေး တိုက်ပွဲတွေကို ဆင်နွှဲနေတဲ့နေရာ ဖြစ်တယ်။ သူတို့အနေနဲ့ကတော့ ဒါကို လက်စတုံးပို့တယ်။ ကျောင်းသားသမဂ္ဂ၊ ကျောင်းသားလှုပ်ရှားမှု၊ ကျောင်းသားခေါင်းဆောင်တွေကို အပြီးတိုင် ချေမှုန်းမယ်ဆိုတဲ့ သဘောနဲ့ လက်စတုံး ဖျောက်ဖျက်ပစ်တယ်လို့ ကျနော်ကတော့ မြင်ပါတယ်။”

ကျောင်းသားသမဂ္ဂက အဲဒီကာလကတည်းက ဆိုရင် တကယ်တမ်း တရားဝင် ပုံစံမျိုးနဲ့ နောက်ပိုင်းမှာ ရပ်တည်လို့ မရတော့တဲ့ အနေအထား ဖြစ်နေတော့ ကျောင်းသားသမဂ္ဂ အဆောက်အဦး ပြန်ဆောက်ပေးမယ် ဆိုပြီးတော့ ၁၉၈၈ ခုနှစ်တုန်းကတော့ ဒေါက်တာမောင်မောင်က ပြောဖူးပါတယ်။ အဲတော့ ကျောင်းသားသမဂ္ဂ ပြန်ပေါ်ပေါက်လာရေး အလားအလာ၊ အခြေအနေနဲ့ ပတ်သက်လို့ ဦးအောင်စောဦးအမြင် ပြောပြပေးပါ။

“ဒီအပေါ်မှာ ကျနော်တို့ ၆၀ ပြည့်လွန်၊ ၇၀ ပြည့်လွန် ကျောင်းသားတွေ ဆွေးနွေးခဲ့ဖူးတာ ရှိပါတယ်။ ဒီနေရာက စစ်အာဏာရှင်စနစ် ဆန့်ကျင်ရေး တိုက်ပွဲအတွက် အထင်ကရ နေရာကြီး ဖြစ်ခဲ့တဲ့အတွက် တချိန်မှာ ကျနော်တို့က မူလ သမဂ္ဂ အဆောက်အဦးရဲ့ Blue Print အတိုင်းပဲ ပြန်လည်တည်ဆောက်ဖို့ သဘောထား ရှိတယ်။ ပြီးရင် အဲဒီနေရာကို နယ်ချဲ့ဆန့်ကျင်ရေး၊ ဖက်ဆစ်တော်လှန်ရေးနဲ့ စစ်အာဏာရှင်စနစ် ဆန့်ကျင်ရေး တိုက်ပွဲအတွက် ကျောင်းသားတို့ရဲ့ လှုပ်ရှားခဲ့တဲ့ သမိုင်းဆိုင်ရာ၊ သမိုင်းဝင်နေရာ၊ သမိုင်းပြတိုက်အဖြစ်နဲ့ ကျနော်တို့ ထားရှိဖို့ သဘောထားရှိတယ်။

“ဒီနေရာမှာ အရေးအကြီးဆုံး တချက်က ပြန်လည်တည်ဆောက်မယ့် အဲဒီ သမဂ္ဂ အဆောက်အဦး နေရာမှာ တခြား ဘယ်လို အဆောက်အဦးမျိုးကိုမှ တည်ဆောက်ခွင့် မပြုဖို့ ကျနော်တို့ တားဆီးသွားဖို့ သဘောထားတွေ ရှိသလို သမဂ္ဂ အဆောက်အဦး တည်ဆောက်တဲ့ နေရာမှာ ဘယ်စစ်အာဏာရှင် တကောင်တမြီးရဲ့ လက်နဲ့မှ အုတ်မြစ်ချခွင့် မပြုနိုင်ဘူးဆိုတဲ့ အချက်တွေကို ကျနော်တို့ စဉ်းစားခဲ့ကြပါတယ်။”

အဲဒါဆိုရင် နောက်ပိုင်း ကျောင်းသားတွေအတွက် ကျောင်းသားသမဂ္ဂ ပြန်လည် တည်ဆောက်မယ် ဆိုရင်ရော။

“အဲဒီအခါကျရင် နောင် ပေါ်ပေါက်လာမယ့် ကျောင်းသားသမဂ္ဂ ခေါင်းဆောင်တွေက သူတို့စိတ်ကြိုက်၊ သူတို့ကြိုက်တဲ့ နေရာမှာ သူတို့အတွက် သင့်တော်မယ့် သမဂ္ဂ အဆောက်အဦးမျိုးကို သူတို့ တည်ဆောက်သွားဖို့ အကြံပြုချင်ပါတယ်။”

အခုက 7 July နဲ့ ပတ်သက်လို့ပေါ့၊ ကျောင်းသားသမဂ္ဂ ပြန်လည်တည်ရှိခွင့်နဲ့ ပတ်သက်လို့ အခုနောက်ပိုင်း အခြေအနေက စစ်အစိုးရကတော့ ရွေးကောက်ပွဲ လုပ်ပေးမယ်၊ ဒီမိုကရေစီ လမ်းကြောင်းကို ခင်းပေးမယ်၊ နိုင်ငံရေးပါတီတွေလည်း တစုံတရာ ဖွဲ့စည်းခွင့်တွေလည်း ပေးနေပါတယ်။ အဲဒီတော့ နောက်ပိုင်း အလားအလာမှာ ကျောင်းသားသမဂ္ဂ တရားဝင် ရပ်တည်လာနိုင်မယ့် အလားအလာရော ဘယ်လိုမြင်လဲခင်ဗျ။

“လောလောဆယ်တော့ ကျနော်တို့ အဲဒီလို မမြင်သေးပါဘူး။ ကျနော်တို့ တိုက်ပွဲတွေ ဆက်တိုက်ရဦးမှာ ဖြစ်ပါတယ်။ အခု သူတို့ လုပ်ပေးနေတယ်ဆိုတဲ့ ရွေးကောက်ပွဲတို့၊ ဘာတို့ဆိုတာ အလကား အပေါ်ယံ ဟန်ပြတွေပဲ ဖြစ်တယ်။ ဘာတခုမှ အနှစ်သာရရှိရှိ ပြောင်းလဲမှာ မဟုတ်ပါဘူး။ ဒါကြောင့်မို့ ကျနော်တို့က တိုက်ပွဲနဲ့ပဲ ဆက်ပြီး သွားရမှာပဲလို့ မြင်ပါတယ်။”

ကျောင်းသားသမဂ္ဂ ပြန်လည်ရပ်တည်ခွင့်နဲ့ ပတ်သက်ပြီးတော့ ၁၉၈၈ ခုနှစ် ဒီမိုကရေစီရေး လှုပ်ရှားမှုကာလ အတွင်းကတော့ ၀န်ကြီးချုပ် ဒေါက်တာမောင်မောင်က ပြန်လည် တည်ဆောက်ပေးမယ်ဆိုပြီး ကမ်းလှမ်းခဲ့ဖူးပါတယ်။ ဒါပေမဲ့လည်း ကျောင်းသားအဖွဲ့အစည်းတွေက တညီတည်းလိုလို အဲဒီအဆိုကို ပြက်ရယ်ပြုခဲ့ကြပါတယ်၊ လက်မခံဘဲ ငြင်းပယ်ခဲ့ကြပါတယ်။

အခုနောက်ပိုင်းမှာတော့ စစ်အစိုးရက ကျောင်းသားသမဂ္ဂ တည်ရှိခွင့် ကိစ္စကို စကားမစပ်သလိုဘဲ သမဂ္ဂ လှုပ်ရှားသူတွေကိုလည်း ပုဒ်မအမျိုးမျိုးနဲ့ ဖမ်းဆီး အရေးယူခဲ့ပါတယ်။ စစ်အစိုးရ အဆက်ဆက် အနေနဲ့ ကျောင်းသားသမဂ္ဂ တည်ရှိမှုကို လက်မခံပေမဲ့ အရင် ဖျက်ဆီးခံခဲ့ရတဲ့ ကျောင်းသားသမဂ္ဂ မြေနေရာမှာတော့ ဘာအဆောက်အဦးမှ ဆောက်လုပ်ခြင်း မရှိသေးဘဲ ဒီအတိုင်း မြေကွက်လပ်၊ နေရာလပ် ထားရှိခဲ့ပါတယ်။

သင်္ကြန်ဗုံးခွဲမှုနဲ့ ဖမ်းဆီးခံရသူအပေါ် လူသတ်မှု စွဲချက်တင်

ရန်ကုန်မြို့မှာ သင်္ကြန်ကာလတွင်းက ဗုံးပေါက်ကွဲမူနဲ့ ပတ်သက်လို့ စွပ်စွဲပြီး ဖမ်းဆီးခံထားရတဲ့ အင်ဂျင်နီယာ ကိုဖြိုးဝေအောင်ကို မကြာသေးခင် ရက်ပိုင်းကပဲ ဗုံးဖောက်ခွဲမှု၊ လူသတ်မှု အပါအ၀င် ပုဒ်မ ၄ ခုနဲ့ တရားစွဲဆိုလိုက်ပြီလို့ သူ့ရဲ့ ရှေ့နေဖြစ်သူက ပြောပါတယ်။ ဒါနဲ့ပတ်သက်ပြီး ဆက်သွယ်မေးမြန်းထားတဲ့ ထိုင်းအခြေစိုက် ဗွီအိုအေ သတင်းထောက် မအေးအေးမာက တင်ပြပေးထားပါတယ်။

စစ်ဘက်က ပုဂ္ဂိုလ်တွေ အပါအ၀င် လူ ၁၀ ဦး သေဆုံးပြီး ၁၆၀ ကျော် ဒဏ်ရာရရှိခဲ့တဲ့ ရန်ကုန်မြို့ သင်္ကြန်ကာလက ဗုံးပေါက်ကွဲမူနဲ့ ပတ်သက်ပြီး အင်ဂျင်နီယာ ကိုဖြိုးဝေအောင်ကို ပြီးခဲ့တဲ့ ၃၀ ရက်နေ့က ရှေ့နေမပါဘဲ ထောင်တွင်းတရားရုံးမှာပဲ တရားစွဲခဲ့ကြောင်း သူ့ရဲ့ရှေ့နေ ဦးကျော်ဟိုးက အခုလို ပြောပြပါတယ်။

“မတရားအသင်း အက်ဥပဒေပုဒ်မ ၁၇(၁)၊ နောက်တခုက လူဝင်မှုကြီးကြပ်ရေး ပြဋ္ဌာန်းချက် အက်ဥပဒေ ပုဒ်မ ၁၃(၁)၊ နောက် ဖောက်ခွဲပုဒ်မ ၃၆၊ ပြစ်မှုဆိုင်ရာ ဥပဒေပုဒ်မ ၃၀၂၊ ၃၀၄၊ ၃၂၆၊ ကြိုတင်ကြံစည်ပြီး လူသတ်တာပေါ့။ ဗုံးခွဲပြီး လူသတ်တာပေါ့ဗျာ။ ၃၀၄ ကတော့ လူသေမှုပေါ့။ ၃၂၆ က ဒဏ်ရာရတဲ့လူတွေပေါ့။ အပြင်းအထန် နာကျင်စေမှုပေါ့။”

ရှေ့နေအနေနဲ့ တရားစွဲဆိုချိန်ကို သိလိုက်ခြင်း မရှိသလို အမှုတွဲတွေကို ပြန်လည်ကူးယူခွင့် မပေးတာကြောင့် အမှုကို ရှေ့ဆက်ပြီး ချေပသွားနိုင်ဖို့ ပြင်ဆင်မှုတွေ မရခဲ့ဘူးလို့ ဆိုပါတယ်။

“ဘာမှ ကြိုတင် ပြင်ဆင်မှု မရဘူးပေါ့။ ကြိုတင် ပြင်ဆင်မှု မရတော့ အဲဒီ ၁၄ ရက်နေ့ကျမှပဲ တရားသူကြီးကို ပြောပြီးတော့ အမှုတွဲ ကူးရမှာပေါ့။ အခုက ဖြိုးဝေအောင် ပြောပြချက်အရ ပုဒ်မတွေပဲ သိတယ်။ အမှုအခြေအနေကတော့ ၁၇(၁) တို့၊ ၁၃(၁) တို့က ဘယ်တုန်းက ဖြစ်တဲ့ ကိစ္စမှန်းလည်း မသိဘူး။ ကျနော်တို့သိတာက သူ့ကို ဗုံးခွဲမှုနဲ့ ပတ်သက်ပြီး စွဲတာလို့ပဲ သိတာကိုး။ ဗုံးခွဲမှုနဲ့ ပတ်သက်ပြီး သူ့ကို ဖမ်းတယ်၊ ဆီးတယ်၊ စစ်ဆေးတယ်၊ ဒါပဲသိတယ်။ ၁၇(၁) တို့၊ နယ်စပ်ဖြတ်ကျော်တဲ့ ကိစ္စတွေက ဘယ်တုန်းကဖြစ်လို့ ဘာကြောင့်စွဲလဲဆိုတာ အမှုတွဲကြည့်ပြီးမှ ပြောလို့ရမယ်။

“စွဲထားတယ်ဆိုတာလည်း ကျနော်က အခြေအနေ မသိလိုက်ဘူး။ ကျနော်တို့ကိုလည်း အကြောင်းမကြားဘူး။ မကြားတော့ ပထမရုံးချိန်းက ကျနော်တို့ မသွားလိုက်ရဘူး။ ထောင်ထဲမှာ ရုံးချိန်း ချိန်းသေးတာကိုး။ မသွားလိုက်ရတော့ ဒီရုံးချိန်းပြီးတော့ ကျနော် ဖြိုးဝေအောင်ကို သွားတွေ့တဲ့အခါကျတော့ ဒီလိုပဲ အမှုကို စွဲတင်လိုက်တယ်တဲ့။ မြောက်ပိုင်းခရိုင် တရားရုံးကို ၄ မှုနဲ့ စွဲတင်တယ်လို့ ပြောတယ်။ ပြောတော့ နောက်ရက်မှာ ကျနော် အမှုတွဲ သွားကူးတယ်။ သွားကူးပေမဲ့ အမှုတွဲကို ကူးခွင့်မပေးဘူး၊ တရားသူကြီးက။”

အခုလို တရားဥပဒေကြောင်းအရ နစ်နာမှုတွေ ရှိနေတဲ့အတွက် ဒီအမှုက နောက်ထပ် နိုင်ဖို့ အခွင့်အလမ်းတွေရော ရှိနိုင်ပါ့မလားလို့ မေးတဲ့အခါမှာတော့ ဗုံးပေါက်ကွဲမှုနဲ့ ဖမ်းဆီးခဲ့တာ ဖြစ်တဲ့အတွက် ဗုံးပေါက်မှုမှာ ပါဝင်ပတ်သက်မှု မရှိတာကို သက်သေ ခိုင်ခိုင်လုံလုံ ရှိတယ်ဆိုတဲ့အကြောင်း ရှေ့နေက ပြောပါတယ်။

“ဖြစ်တဲ့အချိန်မှာ ဗုံးပေါက်ကွဲတဲ့ နေရာကို သူ မရောက်ဘူး။ သူက သူ့အလုပ်ခွင်ထဲမှာပဲ ရှိတာကိုး။ သူ့အလုပ်ခွင်မှာ ရှိတဲ့သူတွေကို သူက သက်သေ ခေါ်ပြမှာပေါ့လေ။ တရားလိုဘက်က နေပြီးတော့ သူ ဗုံးခွဲတဲ့ကိစ္စမှာ ပါတယ်ဆိုတာ အထောက်အထား ခိုင်ခိုင်လုံလုံ ပြနိုင်မှ သူ့ဘက်ကနေ ထုချေရမှာပေါ့။”

ရန်ကုန်သင်္ကြန်ကာလအတွင်း ပေါက်ကွဲမှု ဖြစ်ပြီးနောက် သင်္ကာမကင်းသူများကို ဖမ်းဆီးမှုတွေ ဆက်လုပ်နေပေမဲ့လည်း ပြန်လည်လွှတ်ပေးတာမျိုး မဟုတ်ဘဲ အမှု တခုမဟုတ် တခုနဲ့ အရေးယူနေတာ၊ တရားစွဲနေတာကို အာဏာပိုင်တွေဘက်က ပြုလုပ်နေပါတယ်။ ဖမ်းဆီးထိန်းသိမ်းတဲ့ ကာလမှာလည်း အတင်းအကျပ် ၀န်ခံခိုင်းမှုတွေ လုပ်တဲ့အတွက် တရားလိုတွေရဲ့ တင်ပြချက်တွေကို သက်သေတွေနဲ့ ပြန်လည်ချေပသွားဖို့အတွက် လုပ်ဆောင်သွားမယ်လို့ စွပ်စွဲခံရသူတွေရဲ့ မိသားစုတွေက ဆိုပါတယ်။

ပဲခူးဘက်မှာ စပါးပျိုးခင်းတွေကို ကြွက်တွေ ဖျက်ဆီး

လွန်ခဲ့တဲ့ သီတင်းပတ်က ဒိုက်ဦးမြို့နယ်အတွင်း ဖြတ်သန်းသွားတဲ့ ကြွက်အုပ်တွေဟာ အခုအခါမှာ ပဲခူးတိုင်း ဘုရားကြီးမြို့အနီးထိ ပျံ့နှံ့ရောက်ရှိလာပြီး စပါးပျိုးခင်းတွေကို စားသောက် ဖျက်ဆီးတာတွေ ရှိနေတယ်လို့ ဒေသခံတွေက ပြောပါတယ်။ ဒီကြွက်အုပ်တွေဟာ ပဲခူးရိုးမဘက်က ဆင်းလာတာ ဖြစ်တယ်လို့ ဒေသခံ အများစုက ယူဆပြီး ဒီလိုဖြစ်တာဟာ တောင်ပေါ်ဒေသမှာ ကျွန်းနဲ့ ရာဘာပင်တွေ စိုက်ဖို့ အကြီးအကျယ် တောရှင်းတာကြောင့် ဖြစ်နိုင်တယ်လို့ သုံးသပ်တာတွေလည်း ရှိနေပါတယ်။ ဒီအကြောင်းနဲ့ ပတ်သက်လို့ ထိုင်းအခြေစိုက် သတင်းထောက် ကိုမိုးဇော်က တင်ပြပေးထားပါတယ်။

အခုလို ကြွက်တွေ အုပ်စုလိုက် ပြောင်းရွှေ့နေကြတာကတော့ ညအချိန်တွေမှာ ဖြစ်လေ့ရှိပြီး ရန်ကုန်၊ မန္တလေး အမြန်လမ်းမကြီးပေါ် ဖြတ်သန်းတဲ့အခါ ကားကြိတ်မိလို့ သေတာတွေလည်း အများအပြား ရှိနေပါတယ်။ လွန်ခဲ့တဲ့ အပတ်တွေက သောင်းချီတဲ့ ကြွက်တွေဟာ ဒိုက်ဦးမြို့နယ် မရမ်းချောင်းကျေးရွာ အုပ်စုဘက်ကို ဖြတ်သန်းသွားခဲ့ရာက အခုအခါ ပဲခူးမြို့နယ် ဘုရားကြီးမြို့အနီးထိ ပျံ့နှံ့လာနေတယ်လို့ ဒေသခံတယောက်က အခုလို ပြောပါတယ်။

“ကြွက်တွေက ဒီ ပဲခူးမြစ် ချောင်းကြီးကို ဖြတ်ပြီးတော့ ကူးလာကြတယ်။ အကောင်ရေကတော့ သူတို့မှန်းတာ ၆၀၀,၀၀၀ နဲ့ ၁,၀၀၀,၀၀၀ အကြား မှန်းတယ်။ အဲဒီကောင်တွေက ပြီးခဲ့တဲ့ ၁၅ ရက်၊ ရက် ၂၀ လောက်က ဒီ ရန်ကုန်၊ မန္တလေး အမြန်လမ်းပေါ့နော် အသစ်ပေါ့၊ ကွန်ကရစ်လမ်းကြီးကို ဖြတ်ပြီးတော့ အခု ဒီဘက်ကို ရောက်လာတာပေါ့နော်။ ကျနော်တို့ ဘုရားကြီးနဲ့ဆိုရင် အရင်တုန်းက ၁၄-၅မိုင်လောက်ဝေးတဲ့ ဘောနီတို့ ဘာတို့ကို ဖြတ်လာတာက အခု တမိုင်လောက် အနီးနားထိ ရောက်လာပြီပေါ့။ ပဲသီးကုန်းတို့၊ သပြေရိုးတို့၊ ၀င်္ကဘော်တို့ အဲဒီကျေးရွာတွေ ရောက်လာပြီခင်ဗျ။”

ကားလမ်းမတွေပေါ် ဖြတ်သန်းတဲ့အခါ ကြွက်တွေ များပြားလွန်းတာကြောင့် တချို့ကားတွေက ဖြတ်မသွားရဲဘဲ ရပ်ဆိုင်း စောင့်ကြည့်နေရတာ ရှိသလို တချို့ကားတွေက ကြွက်တွေကို ဖြတ်ကြိတ်သွားပါတယ်။ အဲဒီကြွက်သေ သွားရောက်ကောက်ယူတဲ့ သူတွေဟာ ဂုံနီအိတ်နဲ့ ၃-၄လုံးလောက် ရကြတယ်လို့လည်း ပြောပါတယ်။ ဒေသခံတွေကတော့ လွန်ခဲ့တဲ့ နှစ်ပတ်လောက်ကတည်းက နေ့စဉ်လို ဖြတ်သွားတဲ့ ကြွက်တွေဟာ မရှိဘူးဆိုရင် ၅၀၀,၀၀၀ နဲ့ ၁,၀၀၀,၀၀၀ ကြားထိ ရှိနိုင်မယ်လို့ ခန့်မှန်းပါတယ်။

အခုအခါ ကြွက်တွေ ရောက်လာတာကြောင့် ဘုရားကြီးမြို့အနီးက လယ်တွေ ပျက်ဆီးကုန်တယ်လို့ အဲဒီဒေသခံက ဆက်ပြောပါတယ်။

“ကျနော်တို့ ဒီမှာ စပါးကျဲခင်းတွေ ရှိတာပေါ့။ ဒီစပါးကျဲခင်းတွေကို ကြွက်တွေက ၀င်ရောက် ဖျက်ဆီးတာပေါ့။ အကုန်လုံး စားသွားတာပေါ့။ စပါးကျဲခင်းတွေဆို စပါးတစေ့မှ မကျန်ဘူး စားသွားတယ်ခင်ဗျ။ အခုဆိုရင် ဘုရားလေး ကျေးရွာနားက ရထားလမ်းဘေးက ကျဲခင်းတွေဆို ကုန်သလောက် ဖြစ်သွားပါပြီ။”

ဒေသခံတွေက ကြွက်တွေကို ရိုက်နှက်သတ်ဖြတ်တာ၊ အဆိပ်ကျွေး သတ်တာတွေ ရှိပေမဲ့ နှိမ်နင်းလို့ မနိုင်အောင် ဖြစ်နေပြီး အခုအခါ ဒိုက်ဦးနဲ့ ပဲခူးကြားက ကျေးရွာတွေမှာ ပျံ့နှံ့ ရောက်ရှိနေတယ်လို့ ပြောပါတယ်။ ကျောက်တံခါး၊ ဖြူး စတဲ့ မြို့ဘက်တွေမှာလည်း ပဲခူးရိုးမဘက်ကနေ ကားလမ်းကို ဖြတ်ပြီး ကြွက်တွေ ပြောင်းရွှေ့တာ ရှိနေတယ်လို့ ဒေသခံတွေက ပြောပါတယ်။ ဒီလို ကြွက်တွေ ပြောင်းရွှေ့တာဟာ ပဲခူးရိုးမနဲ့နီးတဲ့ ဒေသတွေမှာ အဖြစ်များပြီး ညောင်လေးပင်ဘက်မှာတော့ ကြွက်တွေ ရောက်လာတာ မရှိဘူးလို့ ညောင်လေးပင် ဒေသခံတယောက်က ပြောပါတယ်။

“ကျနော်သတိထားမိတာက ပဲခူးရိုးမနဲ့ နီးတဲ့ မြို့နယ်တွေမှာ ဖြစ်တာဗျ။ ပဲခူးဆိုရင်လည်း အင်းတကော်ဘက်က ပဲခူးရိုးမရဲ့ တောင်ဘက် အဖျားပေါ့နော်။ ဒိုက်ဦးဆိုရင်လည်း ဒိုက်ဦးမြို့နယ်ရဲ့ အနောက်ဘက်အစွန် ရွာလေးတွေက ပဲခူးရိုးမနဲ့ ကပ်နေတယ်။ ကျနော်တို့ မြို့နယ်ကျ ပဲခူးရိုးမနဲ့ သွားမကပ်ဘူး။ ကျနော်တို့ မြောက်ဘက်ကျတဲ့ ကျောက်တံခါးမြို့နယ်ကျ ပဲခူးရိုးမနဲ့ သွားကပ်တယ်။ အဲဒီကြွက်တွေက ဆင်းလာတယ်လို့ပဲ ပြောရမယ်။ တောင်ပေါ်က ဆင်းလာတာဗျ။ ကျနော်တို့ ညောင်လေးပင် မြို့နယ်ထဲမှာတော့ အဲဒါမျိုး မတွေ့ရဘူးဗျ။”

ဒိုက်ဦးမြို့နယ်က စိုက်ပျိုးရေးဌာန အရာရှိကတော့ ဒီလို ကြွက်တွေ အစုလိုက် အပြုံလိုက် ပြောင်းရွှေ့တဲ့သတင်းကို ကြားသိရတယ်လို့ ပြောဆိုပြီး သူတို့အဖွဲ့တွေ ကွင်းဆင်းစစ်ဆေးနေတာ ၄-၅ ရက်ရှိပေမဲ့ ကြွက်တွေကို အများအပြား မတွေ့ရဘူးလို့ ဆိုပါတယ်။ အခုအခါ မြန်မာ့စိုက်ပျိုးရေးဌာန ရုံးချုပ်အပြင် တိုင်းနဲ့ မြို့နယ်ရုံးတွေကပါ ပူးပေါင်း စစ်ဆေးတာတွေ ပြုလုပ်နေပြီး ကြွက်နှိမ်နင်းရေး လုပ်ငန်းအတွက်လည်း ပြင်ဆင်ထားတယ်လို့ ဆိုပါတယ်။

အခုလို ကြွက်တွေ အစုလိုက် ပြောင်းရွှေ့တာကတော့ ပဲခူးရိုးမ တောင်ပေါ်မှာ ကျွန်းနဲ့ ရာဘာစိုက်ခင်းတွေ အများအပြား စိုက်ပျိုးဖို့အတွက် တောရှင်းနေတာကြောင့် ကြွက်တွေ နေစရာ၊ စားစရာ ခက်ခဲပြီး အခုလို ပြောင်းရွှေ့တာ ဖြစ်နိုင်တယ်လို့ စိုက်ပျိုးရေးဌာနက အရာရှိက သုံးသပ်ပါတယ်။

၂၀၀၆ ခုနှစ် အတွင်းကတော့ ချင်းပြည်နယ်တောင်ပိုင်း ဒေသဘက်မှာ ၀ါးသုဉ်းတာကြောင့် ကြွက်တွေ အများအပြား လာရောက်ပြီး ဒေသခံ ပြည်သူတွေ အငတ်ဘေးနဲ့ ရင်ဆိုင်ခဲ့ရဖူးသလို လွန်ခဲ့တဲ့နှစ် စပါးရိပ်သိမ်းချိန်မှာ နာဂစ်ဒဏ်ခံခဲ့ရတဲ့ မြစ်ဝကျွန်းပေါ် ဒေသဘက်မှာလည်း ကြွက်အုပ်တွေ ကျတာကြောင့် စပါးတွေ ပျက်စီးခဲ့ရပါတယ်။

ဒီမိုကရေစီ ညီလာခံမှာ ၀န်ကြီး ကလင်တန် မြန်မာကို ဝေဖန်

လူသားချင်း စာနာကူညီနေတဲ့ လူထုအခြေပြု အဖွဲ့အစည်းတွေနဲ့ အဲဒီ လူသားစိတ်ဓာတ်တွေကို ဖိနှိပ် ချိုးနှိမ်ထားတဲ့အထဲမှာ မြန်မာနိုင်ငံလည်း ပါဝင်တယ်လို့ အမေရိကန် နိုင်ငံခြားရေးဝန်ကြီး ဟီလာရင် ကလင်တန် (Hillary Clinton) က ဝေဖန်လိုက်ပါတယ်။ လူသားချင်း စာနာကူညီရေး လုပ်ငန်းတွေ လုပ်နေတဲ့ လူထုအခြေပြု အဖွဲ့အစည်းဟာ ဒီမိုကရေစီ လူ့အဖွဲ့အစည်းရဲ့ ဒေါက်တိုင်တခု ဖြစ်တယ်လို့ မစ်စ် ကလင်တန်က ပြောခဲ့ပါတယ်။ အပြည့်အစုံကို ကိုသားညွန့်ဦးက တင်ပြပေးထားပါတယ်။

ဒီမိုကရေစီ ဖွံ့ဖြိုးတိုးတက်တဲ့ လူ့အဖွဲ့အစည်း တရပ်အတွက် နိုင်ငံရေးနဲ့ ဈေးကွက်လွတ်လပ်မှု အရေးပါသလို လူထုအခြေပြု အဖွဲ့အစည်းတွေရဲ့ အရေးပါမှုကို မေ့လို့မရဘူးလို့ ပိုလန်နိုင်ငံမှာ လုပ်တဲ့ နိုင်ငံတကာ ဒီမိုကရေစီဖိုရမ်မှာ နိုင်ငံခြားရေးဝန်ကြီး ကလင်တန်က ပြောခဲ့တာပါ။ ကမ္ဘာ့ ဒီမိုကရေစီ အသိုင်းအ၀ိုင်း Community of Democracies ဆိုတဲ့ ပိုလန်အခြေစိုက် နိုင်ငံတကာ ဒီမိုကရေစီရေးဆိုင်ရာ အဖွဲ့အစည်းက ဦးဆောင်ကျင်းပတဲ့ ဆွေးနွေးပွဲ ဖြစ်ပါတယ်။ ဒီနှစ်မှာတော့ လူထုအခြေပြု လူ့အဖွဲ့အစည်းတွေ အရေးကို အဓိက ဆွေးနွေးခဲ့ကြတာပါ။

မြန်မာနိုင်ငံ အပါအ၀င် ဒီမိုကရေစီနဲ့ လူ့အခွင့်အရေးဆိုင်ရာ ချိုးဖောက်မှုတွေ ရှိနေတဲ့ နိုင်ငံတွေမှာ လူထုအခြေပြု အဖွဲ့အစည်းတွေအပေါ် သက်ရောက်မှု ရှိနေတဲ့ အနှောင့်အတားတွေကို ဆွေးနွေးခဲ့ကြပါတယ်။ အမေရိကန် နိုင်ငံခြားရေးဝန်ကြီး ကလင်တန်ကတော့ ကမ္ဘာ့နေရာ အတော်များများမှာ လူသားချင်း စာနာကူညီမှု လုပ်ငန်းတွေကို လုပ်ကိုင်နေကြသူတွေဟာ ခြိမ်းခြောက်ခံရတာ၊ ဖမ်းဆီးခံရတာ၊ တချို့နေရာတွေမှာ အသတ်ခံရတာတွေတောင် ရှိတယ်လို့ ပြောသွားပါတယ်။

“တချို့ဟာ အုပ်ချုပ်မှု အပြောင်းအလဲလုပ်ဖို့ ကြိုးစားသူတွေ မဟုတ်ပါဘူး။ အများစုဟာ ပြည်သူလူထု လိုအပ်ချက်တွေကို ကူညီဖို့ သက်သက်ပါပဲ။ ဥပမာ မြန်မာနိုင်ငံမှာ နာဂစ် ဆိုင်ကလုံးမုန်တိုင်း ကယ်ဆယ်ရေး လုပ်ငန်းတွေမှာ ပါဝင်လုပ်ကိုင်တဲ့ မြန်မာ တက်ကြွလှုပ်ရှားသူတွေ ဖမ်းဆီး ထောင်ချခံရတာမျိုးပါ။ တချို့ကတော့ အစိုးရကိုယ်တိုင်က တိုက်ဖျက်ရမယ် ပြောနေတဲ့ အဂတိ လိုက်စားမှုတွေလို ပြဿနာတွေကို ဖော်ထုတ်ပြရုံပါပဲ။”

အခု ဒီဆွေးနွေးပွဲကြီး တခုလုံးကို မြန်မာနိုင်ငံက လူထုအခြေပြု အဖွဲ့တွေက တာဝန်ရှိသူအချို့ တက်ရောက်ခဲ့ပါတယ်။ Burma Campaign UK က ဇိုရာဖန်းလည်း ပါဝင် တက်ရောက်ခဲ့ပါတယ်။

“High Level Democracy Meeting တဲ့၊ ဒီမိုကရေစီကို တိုးချဲ့နိုင်ဖို့အတွက် လိုအပ်တဲ့ အရာတွေပေါ့၊ Civil Society လည်း လိုအပ်တယ်၊ New Technology လည်း လိုအပ်တယ်၊ The Respect of Human Rights တွေလည်း လိုအပ်တယ်၊ အမျိုးမျိုးပေါ့။ အဲဒါကြောင့် သူတို့ အကုန်လုံး ဆွေးနွေးကြတယ်။”

အခု ဆွေးနွေးပွဲအတွင်း မြန်မာနိုင်ငံကိစ္စကိုလည်း ပြောဆိုခဲ့ကြပါတယ်။ အထူးသဖြင့် လွန်ခဲ့တဲ့ ၁၀ နှစ်က ၀ါဆောမြို့မှာ လုပ်တဲ့ အလားတူ နိုင်ငံတကာ အစည်းအဝေးကို ဒေါ်အောင်ဆန်းစုကြည်က မိန့်ခွန်းသ၀ဏ်လွှာ ပို့နိုင်ပေမဲ့ အခုတကြိမ်မှာတော့ ၁၀ နှစ်တာ ကျော်သွားတယ်၊ ဒေါ်အောင်ဆန်းစုကြည်လည်း အထိန်းသိမ်းခံရပြီး မြန်မာနိုင်ငံ အခြေအနေလည်း ဘာမှ မထူးခြားသေးတာကို ပိုလန် နိုင်ငံခြားရေးဝန်ကြီးက ထောက်ပြခဲ့တယ်လို့ ဇိုရာဖန်းက ပြောပါတယ်။

မြန်မာနိုင်ငံနဲ့ ပတ်သက်လို့ အစိုးရက မကြာခင် ရွေးကောက်ပွဲ ကျင်းပပေးမယ် ဆိုတာကြောင့် တစုံတရာ အပြောင်းအလဲ ရှိလာမလားလို့ ဆွေးနွေးပွဲအတွင်း မျှော်လင့်ခဲ့ကြသူတွေကိုလည်း တွေ့ရတယ်လို့ ဇိုရာဖန်းက ပြောပြပါတယ်။ ဒါပေမဲ့ သူ့ဘက်ကတော့ ဒါကို သဘောမတူပါဘူး။

“လူ့အခွင့်အရေး ချိုးဖောက်မှုတွေကလည်း အမြဲတမ်း ရှိနေဆဲ ဖြစ်ပါတယ်။ ဒီမိုကရေစီခေါင်းဆောင် ဒေါ်အောင်ဆန်းစုကြည်လည်း နေအိမ်အကျယ်ချုပ်ထဲမှာပဲ ရှိနေသေးတယ်။ ပြီးတော့ နိုင်ငံရေး အကျဉ်းသား ၂,၀၀၀ ကျော်လည်း သူတို့ အခုထက်ထိ မလွှတ်သေးပါဘူး။ အဲဒါကြောင့် ကျမအမြင်မှာတော့ မြန်မာပြည် အခြေအနေ ပြောင်းလဲနေတယ်ဆိုတာ မဟုတ်သေးဘူး။”

အမေရိကန် နိုင်ငံခြားရေးဝန်ကြီး ကလင်တန်လည်း ဒီမိုကရေစီစနစ်ရဲ့ အခြေခံ ဒေါက်တိုင်တွေကို အုပ်ချုပ်မှု ဈေးကွက်နဲ့ လူထုအခြေပြု အဖွဲ့အစည်းတွေကို စံနှုန်းထား ပြောခဲ့ပေမဲ့ ရွေးကောက်ပွဲတရပ် ရှိရုံနဲ့ ဒီမိုကရေစီစနစ်လို့ မဆိုနိုင်ဘူးလို့ အခု ဒီဆွေးနွေးပွဲမှာပဲ ပြောခဲ့ပါတယ်။

“တချို့တိုင်းပြည်တွေဟာ ရွေးကောက်ပွဲ လုပ်ပေးတာကို အကြောင်းပြပြီး ဒီမိုကရေစီ ရှိနေပြီဆိုတဲ့ ပုံစံမျိုး လုပ်နေကြပါတယ်။ ဒါပေမဲ့ ဒီမိုကရေစီဆိုတာ ရွေးကောက်ပွဲထက် ပိုပါတယ်။ အစိုးရတွေ၊ နိုင်ငံသားတွေ အနေနဲ့ ဒီမိုကရေစီရဲ့ အခြေခံ သဘောတရားတွေနဲ့ နိစ္စဓူဝ ရှင်သန်နေထိုင်နိုင်ပြီး အစိုးရ အုပ်ချုပ်မှုရဲ့ တာဝန်ဝတ္တရားတွေကိုလည်း လက်ခံဖို့ လိုပါတယ်။ ပြည်သူတွေ ကြောက်ရွံ့စေတာမျိုးဟာ ဒီမိုကရေစီ မဟုတ်ပါဘူး။”

ဒီဆွေးနွေးပွဲကို ဇူလိုင် ၂ ရက်နေ့ကနေ ၄ ရက်နေ့အထိ ပိုလန်မှာ ကျင်းပခဲ့တာပါ။ ဒီမိုကရေစီ နိုင်ငံတွေနဲ့ အခြား ဒီမိုကရေစီ ပေါ်ထွန်းစ နိုင်ငံတွေက နိုင်ငံခြားရေး ၀န်ကြီးတွေနဲ့ အဆင့်မြင့် အာဏာပိုင်တွေ တက်ရောက်ပြီး သီးခြားဆွေးနွေးမှုတွေ လုပ်ခဲ့ပါတယ်။ ဒီမိုကရေစီ စနစ်တရပ်အတွက် လူထုအခြေပြု အဖွဲ့အစည်းတွေ အားကောင်းလာရေး ကိစ္စကို ဆွေးနွေးခဲ့ကြသလို ဒီအတွက် ဒီမိုကရေစီ ဖွံ့ဖြိုးပြီး နိုင်ငံတွေက ကူညီနိုင်မယ့် အခြေအနေတွေကိုလည်း ၀ိုင်းဝန်း စဉ်းစားခဲ့ကြတယ်လို့ သိရပါတယ်။

အမေရိကန်ပြည်ထောင်စု အနေနဲ့ကတော့ ဒီအတွက် တဦးတည်း ဆောင်ရွက်မှာ မဟုတ်ဘဲ အခြား ကုလသမဂ္ဂ အသင်းအဖွဲ့တွေ၊ ဒေသတွင်းဆိုင်ရာ အစိုးရ အဖွဲ့အစည်းတွေနဲ့ အခြား စိတ်တူကိုယ်တူ နိုင်ငံတွေနဲ့ လက်တွဲ ဆောင်ရွက်သွားမယ်လို့ နိုင်ငံခြားရေးဝန်ကြီး ကလင်တန်က ပြောခဲ့ပါတယ်။ အကျပ်အတည်း ကြုံနေတဲ့ အစိုးရမဟုတ်တဲ့ အဖွဲ့အစည်းတွေကို ကူညီနိုင်ဖို့ အမေရိကန် ပြည်ထောင်စု အနေနဲ့ ဒေါ်လာ ၂,၀၀၀,၀၀၀ မတည်ပြီး ရန်ပုံငွေတရပ် ထားကြောင်းလည်း ဒီဆွေးနွေးပွဲမှာပဲ မစ်စ် ကလင်တန်က ကြေညာခဲ့ပါတယ်။

ဓာတ်ငွေ့ရောင်းရငွေ နျူကလီးယား စီမံကိန်းမှာ အသုံးပြု

မြန်မာအစိုးရဟာ သဘာဝဓာတ်ငွေ့ကရတဲ့ အခွန်ဘဏ္ဍာငွေတွေကို လျှို့ဝှက် နျူကလီးယား စီမံကိန်းအတွက် အသုံးပြုနေတယ်လို့ လူ့အခွင့်အရေးနဲ့ ပတ်ဝန်းကျင်ရေးရာ အဖွဲ့တခုက ပြောဆိုလိုက်ပါတယ်။ ဒါ့အပြင် ဒီဘဏ္ဍာငွေတွေကို သုံးစွဲတဲ့နေရာမှာ ပွင့်လင်းမြင်သာမှု မရှိတာကြောင့် တိုင်းပြည်နစ်နာရတယ်လို့ ပြည်ပအခြေစိုက် Earth Rights International (ERI) အဖွဲ့က ပြောပါတယ်။ အပြည့်အစုံကို ဗွီအိုအေ ထိုင်းအခြေစိုက် သတင်းထောက် ကိုကျော်ထင်က တင်ပြပေးထားပါတယ်။

မြန်မာစစ်အစိုးရဟာ ၁၉၉၈ ကနေ ၂၀၀၉ ခုနှစ်အထိ တိုတယ် (Total)၊ ချက်ဗရွန် (Chevron) နဲ့ PTTEP ကုမ္ပဏီတွေဆီကနေ ဒေါ်လာသန်း ၅,၀၀၀ နီးပါး ရခဲ့တယ်လို့ ဒီကနေ့ ထုတ်ပြန်တဲ့ ERI ရဲ့ အစီရင်ခံစာမှာ ပါရှိပါတယ်။

ရဲတံခွန် သဘာဝဓာတ်ငွေ့တွေ ရောင်းလို့ရတဲ့ ဒီငွေအားလုံးနီးပါးကို နျူကလီးယား စီမံကိန်းနဲ့ စစ်အင်အား တိုးချဲ့ရာမှာ အသုံးပြုခဲ့တယ်လို့ အစီရင်ခံစာမှာ ဖော်ပြထားပါတယ်။

ERI ရဲ့ မြန်မာနိုင်ငံ စီမံကိန်းဒါရိုက်တာ ကိုနိုင်ထူးက မြန်မာအစိုးရဟာ သဘာဝဓာတ်ငွေ့ ရောင်းရငွေတွေကို နျူကလီးယား စီမံကိန်းအတွက် သုံးနေတယ်လို့ ဆိုပါတယ်။

“ဒီ နျူကလီးယား အစီအစဉ်တွေ လုပ်နိုင်ဖို့က အပြင်ကငွေရမှ လုပ်နိုင်မယ်ထင်တယ်။ အပြင်ကငွေကို ပြန်ကြည့်လိုက်ရင် ကျနော်တို့ရဲ့ တွက်ချက်ထားတဲ့ စာရင်းဇယားအရ နိုင်ငံရဲ့ဝင်ငွေ ထက်ဝက်နီးပါးက ဒီ ဂက်စ်ရောင်းရတဲ့ငွေလေ၊ ပြီးတော့ DVB တို့ ထုတ်ဖော်ထားတဲ့ သတင်းအချက်အလက် အရပေါ့နော်၊ ကျနော်တို့ လက်တွေ့ရနေတဲ့ အချက်အရ ဒီငွေတွေက ပြည်သူတွေအတွက် သွားတာမဟုတ်ဘဲ ဒီစီမံကိန်းအတွက် သွားနေတာ။ ဘာဖြစ်လို့လဲဆိုတော့ နာဂစ်လို အခြေအနေမျိုး၊ ချင်းပြည်နယ်မှာဖြစ်ခဲ့တဲ့ အစာငတ်မွတ် ခေါင်းပါးမှု အချိန်တွေမှာ အစိုးရက ပိုက်ဆံထောက်ပံ့တာ မရှိခဲ့ဘူး။ မရှိတဲ့အချိန်မှာ နျူကလီးယားလုပ်ဖို့၊ ဂူတွေဆောက်ဖို့ ပိုက်ဆံတွေ အများကြီး ထွက်လာတယ်။ ဒီပိုက်ဆံတွေ ဘယ်ကထွက်လာတယ်ဆိုတာ ပြန်လိုက်ကြည့်တဲ့အခါမှာ သူတို့ရဲ့ဝင်ငွေက ဒါပဲရှိတယ်လို့ ပြောလို့ရပါတယ်။”

မြန်မာနိုင်ငံမှာ ရင်းနှီးမြှုပ်နှံတဲ့ ကုမ္ပဏီတွေ လိုက်နာသင့်တဲ့ စည်းမျဉ်းစည်းကမ်းတွေကို တိုတယ်၊ ချက်ဗရွန်နဲ့ PTTEP တို့က အလေးအနက်ထား စဉ်းစားဖို့လည်း ERI က တိုက်တွန်းထားပါတယ်။

တိုတယ်နဲ့ ချက်ဗရွန်တို့ဟာ နိုင်ငံအများအပြားမှာ ရေနံနဲ့ သဘာဝဓာတ်ငွေ့ကဏ္ဍ ရင်းနှီးမြှုပ်နှံမှုတွေ ရှိပါတယ်။ အဲဒီ ရင်းနှီးမြှုပ်နှံမှုတွေမှာ အခွန်ဘဏ္ဍာ ခွဲဝေသုံးစွဲမှုအတွက် ပွင့်လင်းမြင်သာမှုကို ဦးစားပေး ဆောင်ရွက်လေ့ ရှိပေမဲ့ မြန်မာနိုင်ငံမှာတော့ ဒီလိုလုပ်ဆောင်မှု မရှိပါဘူး။ ပွင့်လင်းမြင်သာမှုရှိဖို့ တိုက်တွန်းပြောဆိုရင်လည်း ဒီကုမ္ပဏီတွေက ငြင်းပယ်တယ်လို့ ကိုနိုင်ထူးက ပြောပါတယ်။

“ကျနော်တို့ အရင်တခေါက် ပြီးခဲ့တဲ့ စက်တင်ဘာလကထုတ်တဲ့ ရီပို့အပေါ်မှာ တိုတယ်လ်က ပြောခဲ့တယ်၊ သူတို့က ထုတ်ဖော်လို့မရဘူး၊ ထုတ်ဖော်ခဲ့မယ်ဆိုရင် နအဖက လက်ခံမှာ မဟုတ်ဘူး၊ တဆက်တည်းမှာလည်း ချက်ဗရွန်ပြောတာက လုံးဝ ထုတ်ဖော်လို့ မရဘူးတဲ့။ ဒါပေမဲ့ ကျနော်တို့ ပြီးခဲ့တဲ့ ယူနိုကယ်ကို တရားစွဲတုန်းက ရထားတဲ့ အထောက်အထား (ကန်ထရိုက်စာချုပ်) မှာကျတော့ ထုတ်ဖော်ပြောပြလို့ မရဘူးဆိုတာ မရှိဘူး၊ ထုတ်ဖော်လို့ ရတယ်။ ကျနော်တို့ရဲ့ အဓိက ရည်ရွယ်ချက်က ဒီကုမ္ပဏီဟာ သူတို့သွားလုပ်တဲ့နေရာမှာ Transparency ရှိဖို့ပေါ့နော်၊ မရှိဘူးဆိုရင် သူတို့ ဘာတွေလုပ်လဲဆိုတာ လူတွေက မသိဘူး၊ ဒုတိယတချက်ကလည်း ဒီ Transparency က ဗမာပြည်အတွက် ရေးကြီးနေတဲ့ အချိန်ကာလလည်း ဖြစ်ပါတယ်။”

မြန်မာစစ်အစိုးရဟာ သဘာဝဓာတ်ငွေ့ကရတဲ့ ဒေါ်လာသန်း ၅,၀၀၀ နီးပါးကို စင်ကာပူက OCBC နဲ့ DBS ဘဏ်တွေမှာ အပ်နှံထားတယ်လို့ ပြီးခဲ့တဲ့နှစ်မှာ ERI က စွပ်စွဲခဲ့ပြီး OCBC နဲ့ DBS ဘဏ်တွေကတော့ ငြင်းဆိုခဲ့ပါတယ်။

အခွန်ဘဏ္ဍာ ခွဲဝေသုံးစွဲမှုနဲ့ ပတ်သက်လို့ စောင့်ကြည့်လေ့လာနေတဲ့ ရွှေ သဘာဝဓာတ်ငွေ့ လှုပ်ရှားမှုအဖွဲ့က ကိုဝင်းအောင်က မြန်မာစစ်အစိုးရဟာ ပြင်သစ်ဘဏ်တခုမှာလည်း အလားတူ ငွေအပ်နှံထားတယ်လို့ ဒီကနေ့ ပြင်သစ်နိုင်ငံမှာ ပြုလုပ်တဲ့ သတင်းစာရှင်းလင်းပွဲမှာ ပြောဆိုသွားပါတယ်။

“နောက်ပိုင်း ကျနော်တို့ ထပ်သိရတာကတော့ ပြင်သစ်ဘဏ်တခုဖြစ်တဲ့ BMP ဆိုတဲ့ ဘဏ်မှာလည်း နအဖစစ်အုပ်စုနဲ့ ပြင်သစ် တိုတယ်လ်ကုမ္ပဏီတို့ရဲ့ ငွေတွေကလည်း ထဲထဲဝင်ဝင် ဆက်စပ်လုပ်နေတာ တွေ့ရတယ်။ အဲဒီဘဏ်မှာ ၂၀၀၃ ပတ်ဝန်းကျင်လောက်ကနေ တနှစ်ချင်း ပေးတဲ့ငွေက ၄၅ သန်း၊ ၄၆ သန်းလောက် အနည်းဆုံး ကျနော်တို့ တွေ့ရတာပေါ့နော်။ ဒီနောက်ပိုင်း ၂၀၀၉- ၁၀ ဆိုရင် အဲဒီထက် အဆပိုပြီးတော့ အပ်နှံထားတယ်လို့ ခန့်မှန်းလို့ရတယ်။”

တိုတယ်လ်၊ ချက်ဗရွန်နဲ့ PTTEP ကုမ္ပဏီတွေဟာ ဒေါ်လာသန်း ၉,၀၀၀ ကျော်ဖိုး ရင်းနှီးမြှုပ်နှံခဲ့ပြီး စုစုပေါင်း ရင်းနှီးမြှုပ်နှံမှုရဲ့ ၁၀% ကျော်ကိုပဲ ပြည်တွင်း သဘာဝဓာတ်ငွေ့ သုံးစွဲဖို့အတွက် အသုံးပြုခဲ့တယ်လို့ သိရပါတယ်။

မြန်မာစစ်အစိုးရဟာ ရွှေသဘာဝဓာတ်ငွေ့သိုက်က ထွက်တဲ့ ဓာတ်ငွေ့ကို ၂၀၁၃ ခုနှစ်မှာ တရုတ်နိုင်ငံသို့ စတင်ရောင်းချမှာဖြစ်ပြီး တနှစ်ကို ဒေါ်လာသန်း ၁,၂၀၀ ကျော်နှုန်းနဲ့ အနှစ် ၂၀ ကျော် ရောင်းချမှာ ဖြစ်ပါတယ်။

ခမောက်ကိစ္စ ရွေးကောက်ပွဲ ကော်မရှင်ထံ NLD တိုင်ကြား

ရွေးကောက်ပွဲဝင်ဖို့ ပြင်ဆင်နေတဲ့ အမျိုးသားဒီမိုကရေစီ အင်အားစု (NDF) ပါတီက ခမောက်ပုံတံဆိပ်ကို ပါတီ အမှတ်တံဆိပ်အဖြစ် အသုံးပြုခွင့် ရွေးကောက်ပွဲ ကော်မရှင်ထံမှာ တင်ပြထားတာကို NLD အမျိုးသားဒီမိုကရေစီ အဖွဲ့ချုပ်က တရားဝင် ကန့်ကွက်လိုက်ပါတယ်။ NLD နဲ့ ခမောက်ကို နှစ်ပေါင်းများစွာ တွဲပြီး သိလာကြတာဖြစ်လို့ ပြည်သူတွေ ထင်ယောင်ထင်မှား ဖြစ်နိုင်တဲ့အတွက် ကန့်ကွက်ကြောင်း ရွေးကောက်ပွဲ ကော်မရှင်မှာ တရားဝင် စာတင်လိုက်တာ ဖြစ်ပါတယ်။ NDF ပါတီကတော့ ခမောက်တံဆိပ်ဟာ ပြည်သူအများကို ကိုယ်စားပြုတဲ့အတွက် ခမောက်တံဆိပ်ကို အသုံးပြုတာလို့ ပြောပါတယ်။ အခုလို ခမောက်ပုံတံဆိပ်နဲ့ ပတ်သက်ပြီး အငြင်းပွားနေတဲ့ နောက်ဆုံး အခြေအနေကို မသင်းသီရိက တင်ပြပေးထားပါတယ်။

NLD အမျိုးသားဒီမိုကရေစီ အဖွဲ့ချုပ်က ဦးဆောင်အဖွဲ့ဝင်တွေ ဖြစ်ကြတဲ့ ဒေါ်မေ၀င်းမြင့်နဲ့ ဒေါ်ခင်ဌေးကြွယ်တို့ နှစ်ယောက်ဟာ NLD ပါတီရဲ့ကိုယ်စား ကန့်ကွက်စာကို ဒီနေ့ နေပြည်တော်က ရွေးကောက်ပွဲ ကော်မရှင်ရုံးမှာ တင်သွင်းခဲ့တယ်လို့ NLD ပါတီရဲ့ ပြောရေးဆိုခွင့်ရှိသူ ဦးဉာဏ်ဝင်းက ပြောပါတယ်။

“ဒီနေ့မနက် သူတို့ဆီက ဖုန်းရတာကတော့ ဒီနေ့မနက်ပိုင်းမှာ ဦးစီးအရာရှိက ကန့်ကွက်ချက် တင်တာကို လက်ခံ ရယူထားပါတယ်။ ကျနော်တို့ အခု ကန့်ကွက်ချက် တင်တဲ့နေရာမှာ ဒီခမောက်က NLD ရဲ့ မူပိုင်လို့ ကျနော်တို့ မပြောပါဘူး။ ကျနော်တို့ ပြောတာက NLD နဲ့ ခမောက်ဟာ ခွဲခြားလို့ မရလောက်အောင်ကို ရှိခဲ့တယ်။ ဒီလို အထောက်အထားတွေကို ကျနော်တို့ တင်ပါတယ်။

“နောက် ဒီခမောက်နဲ့ NLD ရဲ့ခမောက်နဲ့ ဆင်တူယိုးမှားလုပ်တာဟာ ဥပဒေအရ အတုပြုလုပ်မှု ဖြစ်ပါတယ်။ ဒါကြောင့် ကန့်ကွက်တာလို့ ကျနော်တို့ အဲဒီလို ဖော်ပြထားပါတယ်။ ကျနော်တို့ ပြောချင်တာကတော့ အဖွဲ့ချုပ်နဲ့ ဆင်တူရိုးမှား၊ အဖွဲ့ချုပ်ယောင်ယောင် သဘောမျိုးတွေတော့ မလုပ်သင့်ဘူးလို့လည်း ထင်ပါတယ်။ ဒီလို ပြည်သူလူထုကို ထင်ယောင်ထင်မှား ဖြစ်စေမယ့် ဟာမျိုးကို ရှောင်ကျဉ်သင့်တယ်လို့လည်း ထင်ပါတယ်။”

အခု NLD ပါတီက ကန့်ကွက်သလိုမျိုး တခြား မြို့နယ် အဖွဲ့ဝင်တွေကလည်း သူတို့သဘောနဲ့ သူတို့ လက်မှတ်ရေးထိုး ကောက်ခံပြီး ကန့်ကွက်လွှာပို့ဖို့ စီစဉ်နေကြတာ ရှိတယ်လို့လည်း ဦးဉာဏ်ဝင်းက ပြောပါတယ်။ ဒီနေ့ဆိုရင် မကွေးတိုင်း အတွင်းက စုပေါင်း လက်မှတ်ရေးထိုးထားတဲ့ ကန့်ကွက်လွှာကို ကော်မရှင်ရုံးမှာ တင်သွင်းခဲ့တာ ရှိတယ်လို့လည်း ပြောပါတယ်။

“မကွေးတိုင်းက ကိုနေမျိုးကျော်ကလည်း မကွေးတိုင်းထဲက လက်မှတ်တွေ ရယူပြီးတော့ ကန့်ကွက်စာကို သူကိုယ်တိုင် လာတင်ပါတယ်လို့ အဲဒီလို သိရပါတယ်။”

NLD ပါတီ ဗဟိုအလုပ်အမှုဆောင် အဖွဲ့ဝင် ဦးဉာဏ်ဝင်း ပြောပြခဲ့တာ ဖြစ်ပါတယ်။

အခုလို NLD ပါတီက ကန့်ကွက်ပေမဲ့ အမျိုးသားဒီမိုကရေစီ အင်အားစု (NDF) ပါတီကတော့ NLD ပါတီနဲ့ ထင်ယောင်ထင်မှား ဖြစ်စေတယ်၊ တုပမှုတွေ ဖြစ်နေတယ်ဆိုတဲ့ ပြောဆိုချက်တွေ အပေါ်မှာ ငြင်းဆိုပါတယ်။ ၂၀၁၀ ရွေးကောက်ပွဲ ၀င်ကြမယ့် နိုင်ငံရေးပါတီတွေရဲ့ အမှတ်တံဆိပ်တွေ ကြားမှာ ခမောက်ပုံတံဆိပ် မပါသေးသလို ခမောက်တံဆိပ်ဟာ တခြားတံဆိပ်တွေထက်စာရင် ထင်သာမြင်သာ ရှိတာမို့ အခုလို ရွေးချယ်တာ ဖြစ်တယ်လို့ NDF ပါတီရဲ့ တာဝန်ရှိသူ ဦးခင်မောင်ဆွေက ပြောပါတယ်။

“NLD ပိုင်တဲ့ ခမောက်ဆိုရင် အန်ကယ်တို့ကိုယ်တိုင် NLD အဟောင်းတွေပဲလေ။ အန်ကယ်တို့မှာရော သုံးခွင့် မရှိဘူးလား။ အန်ကယ်တို့ကတော့ ခမောက်ဆိုတာဟာ တခြား တင်ပြီးသား ပါတီတွေရဲ့ မှတ်ပုံတင် တံဆိပ်တွေနဲ့ လုံးဝ ကွဲပြားတဲ့အတွက်ကြောင့် ခမောက်ဟာ ထင်သာမြင်သာရှိတယ်၊ ရွေးကောက်ပွဲ ကာလကြရင် ပြည်သူတွေဟာ ခမောက်နဲ့ အခြားအခြားသော တံဆိပ်တွေနဲ့ ယှဉ်ရင် ခမောက်က တသီးတသန့် ဖြစ်နေတဲ့ အတွက်ကြောင့် ပြည်သူတွေ ရှင်းရှင်းလင်းလင်း သိနိုင်အောင်၊ ပြီးတော့ မြန်မာနိုင်ငံ လူများစုကြီးကို ကိုယ်စားပြုတဲ့ ခမောက်မို့လို့ အန်ကယ်တို့ ခမောက်ကို ရွေးခြင်းဖြစ်ပါတယ်။ NLD ကို တုပခြင်း မဟုတ်သလို NLD ကို အရိပ်ခိုခြင်းလည်း မဟုတ်ပါဘူး။ NLD အရှိန်အ၀ါကို ဆွဲငင် သုံးစွဲခြင်းလည်း မဟုတ်ဘူးဆိုတာ NDF အဖွဲ့ဝင်တွေ အားလုံးက သဘောပေါက်ပါတယ်။”

NDF ပါတီ တာဝန်ရှိသူ ဦးခင်မောင်ဆွေ ပြောပြခဲ့တာ ဖြစ်ပါတယ်။

ရွေးကောက်ပွဲ ကော်မရှင်က ထုတ်ပြန်ထားတဲ့ ဥပဒေအရ ကန့်ကွက်လွှာကို ၇ ရက်အတွင်း တင်သွင်းရမှာမို့ ရန်ကုန်တိုင်း အပါအ၀င် ပဲခူးတိုင်း အနောက်ဘက်ခြမ်းက မြို့နယ် တော်တော်များများကလည်း အချိန်မီ ကန့်ကွက်စာ တင်သွင်းဖို့ စီစဉ်နေတယ်လို့ ဇီးကုန်းမြို့က NLD အဖွဲ့ဝင် ဒေါ်ခင်ဝိုင်းက ပြောပါတယ်။

“သာယာဝတီ၊ လက်ပံတန်း၊ ကြို့ပင်ကောက်၊ ဇီးကုန်း၊ နတ်တလင်း၊ ပြည်ဘက်ခြမ်းကလည်း ပါမှာပါ၊ ဒါ ပဲခူးတိုင်း အနောက်ခြမ်းကပေါ့၊ ၂ ခရိုင်က သာယာဝတီခရိုင်ကပေါ့။ မဲပေးထားတဲ့ ပြည်သူလူထုကလည်း ဒါကို လက်မခံကြဘူး။ ပြည်သူတွေကြားမှာ ပြောနေကြတာပေါ့။ ဒါကြောင့် အချိန်က မရလို့ အန်တီတို့က အမြန်ဆုံး ပို့ချင်တာပါ။”

ဒါ့အပြင် NLD ပါတီဝင် မဟုတ်ပေမဲ့ ခမောက်နဲ့စု အမှတ်တံဆိပ်က ခွဲမရအောင် အများရင်ထဲ စွဲပြီးသားမို့ ကြို့ပင်ကောက်မြို့က တောင်သူဦးကြီးတွေကလည်း ဒီကန့်ကွက်လွှာကို ပေးဖို့ စီစဉ်နေပါတယ်လို့ ကြို့ပင်ကောက်မြို့ခံ ဦးမိုးဆေးက ပြောပါတယ်။

“ဦးတို့ တောသူတောင်သား တောင်သူလယ်သမားတွေကြတော့ ဒီမိုကရေစီတို့ NLD တို့ကို သိပ်နားမလည်ဘူး။ ခမောက်ဆိုရင် သူက ပြီးရောလေ။ ခမောက်ဆိုတာ ဒေါ်အောင်ဆန်းစုကြည်ရဲ့ ပြည်သူထဲမှာထားတဲ့ ရင်ထဲက အသည်းနှလုံးပဲလေ။ တောင်သူလယ်သမားနဲ့ ရပ်သူရွာသားတွေနဲ့ ရဟန်းသံဃာတွေနဲ့ ပေါင်းပြီးတော့ တင်ဖို့ စီစဉ်နေပါတယ်။”

ကြို့ပင်ကောက်မြို့ခံ ပြောပြခဲ့တာ ဖြစ်ပါတယ်။

အခု ပါတီအမှတ်တံဆိပ် ရွေးချယ် အသုံးပြုမှုနဲ့ ပတ်သက်ပြီး အငြင်းပွားတာကတော့ ပထမဦးဆုံးအကြိမ် မဟုတ်ပါဘူး။ ၈၈ မျိုးဆက် ကျောင်းသားလူငယ်များ (ပြည်ထောင်စုမြန်မာနိုင်ငံ) က ခွပ်ဒေါင်းကို သူတို့ရဲ့ ပါတီအလံမှာ အသုံးပြုဖို့ တောင်းခံတဲ့ အပေါ်မှာ ၀ိုင်းဝန်း ကန့်ကွက်ခဲ့တာမျိုးလည်း ဖြစ်ခဲ့ဖူးပါတယ်။ အဲဒီတုန်းကတော့ ရွေးကောက်ပွဲ ကော်မရှင်က ပြန်ပြောင်းဖို့ ပြောလာတဲ့အတွက် သက်ဆိုင်ရာ ပါတီက သူတို့ရဲ့အလံကို ပြောင်းလဲပေးခဲ့ရတာမျိုးလည်း ရှိပါတယ်။

KNU နဲ့ DKBA ငြိမ်းချမ်းရေး ဆွေးနွေး

လက်နက်ကိုင် ကရင်အဖွဲ့ ၂ ခုကြားမှာ အပစ်အခတ် ရပ်စဲကြဖို့အတွက် ဒီရက်ပိုင်းအတွင်းမှာပဲ နှစ်ဘက် အောက်ခြေတပ်တွေကြားမှာ ဆွေးနွေးမှုတွေ စတင်နေပါတယ်။ ဗဟိုရဲ့ ညွှန်ကြားချက်နဲ့ အောက်ခြေတပ်တွေ စတင်ဆွေးနွေးတာ ဖြစ်ပါတယ်။ အပစ်အခတ် ရပ်စဲရေး သဘောတူနိုင်ခဲ့ရင် ကရင်အမျိုးသားတွေအတွက် အကျိုးများလာနိုင်တယ်လို့ သုံးသပ်သူတွေက ပြောနေကြပေမဲ့ လက်တွေ့မှာ သဘောတူညီမှု ရနိုင်ဖို့ ဘယ်လောက် ဖြစ်နိုင်ပါသလဲ။ အပြည့်အစုံကို ထိုင်းအခြေစိုက် သတင်းထောက် ကိုနိုင်ကွန်းအိန်က တင်ပြပေးထားပါတယ်။

KNU ခေါ် ကရင်အမျိုးသား အစည်းအရုံးနဲ့ DKBA ခေါ် တိုးတက်သော ကရင်ဗုဒ္ဓဘာသာ ဒီမိုကရက်တစ် အဖွဲ့တို့ဟာ ဇွန်လ နောက်ဆုံးပတ် ထိုင်းနယ်စပ် တနေရာမှာ အပစ်အခတ် ရပ်စဲရေးအတွက် တွေ့ဆုံဆွေးနွေးခဲ့တယ်လို့ KNU ခေါင်းဆောင်တဦးက ပြောပါတယ်။ အဲဒီဆွေးနွေးမှုဟာဆိုရင် KNU ဗဟိုဌာနချုပ်ရဲ့ လမ်းညွှန်ချက်အရ အောက်ခြေတပ်များကနေ ဆွေးနွေးခဲ့တယ်လို့ ကရင်အမျိုးသား အစည်းအရုံးရဲ့ ဒု-ဥက္ကဋ္ဌဖြစ်သူ ပဒို ဒေးဗစ်သာကပေါက အခုလို အတည်ပြု ပြောပြခဲ့ပါတယ်။

“ဒါ အောက်ခြေအဆင့်ပဲ၊ လျှို့ဝှက်ပြီး လုပ်နေတယ်လို့ထင်တယ်။ ဗဟိုက လမ်းညွှန်ပေးထားတယ်လေ။ အဲဒါ အကျိုးရှိမယ်၊ တကယ်တမ်း တိုးတက်မှုရှိမယ်ဆိုမှ ဗဟိုက ဝင်ကိုင်ပါမယ်။ ကျနော်တို့ စောင့်ကြည့်ရမယ့် အခြေအနေမှာပဲ ရှိပါတယ်။”

အလားတူ DKBA အဖွဲ့က တာဝန်ရှိသူများကို ဆက်သွယ်မေးမြန်းခဲ့ပေမဲ့ ဖြေကြားခြင်း မပြုခဲ့ပါဘူး။ KNU အဖွဲ့နဲ့ DKBA အဖွဲ့တို့ အနေနဲ့ အခုလို အပစ်အခတ် ရပ်စဲရေး ဆွေးနွေးတာဟာ ကရင်တမျိုးသားလုံးအတွက် အကျိုးရှိနိုင်မယ်လို့ ကရင့်အရေး လှုပ်ရှားသူ ဆရာထူးဂလိက အခုလို ပြောပါတယ်။

“အပစ်အခတ် ရပ်စဲနိုင်မယ် ဆိုတော့ ကျနော့်အနေနဲ့ ဝမ်းသာစရာ တခုပဲပေါ့။ ဘာဖြစ်လို့လဲဆိုတော့ ကျနော်တို့ ပြည်သူတွေအတွက် ပြေလည်မှု ရှိတာပေါ့ခင်ဗျာ။ ကျနော်တို့ ပိုပြီးတော့ အင်အားကြီးတာပေါ့၊ တော်လှန်ရေးအတွက်။ ကျနော့်ရဲ့ အမြင်ပေါ့လေ။”

၂ဝ၁ဝ နှစ်ဆန်းပိုင်းတုန်းကလည်း မြိုင်ကြီးငူ ဆရာတော် ဦးသုဇန ဦးဆောင်ပြီး KNU နဲ့ DKBA အဖွဲ့တို့ တွေ့ဆုံ ဆွေးနွေးခဲ့ပါသေးတယ်။ ဒါပေမဲ့ အဲဒီဆွေးနွေးပွဲကို အပြီးမသတ်နိုင်ခဲ့ဘူးလို့ KNU တပ်မဟာ ၆ ဒေသမှ စစ်ဘက်အရာရှိတဦးက ပြောပါတယ်။

DKBA တပ်ဖွဲ့ဟာ ၁၉၉၅ ခုနှစ် ဇန်နဝါရီလလောက်မှာ ဘာသာရေး ခွဲခြားမှုကို အကြောင်းပြပြီး KNU ကနေ ခွဲထွက်ခဲ့ပါတယ်။ မြန်မာစစ်အစိုးရနဲ့ ပူးပေါင်းပြီးတော့ KNU နဲ့ လက်နက်ကိုင် ပဋိပက္ခ ပြင်းထန်စွာ ဖြစ်ပွားခဲ့ပါတယ်။ နှစ်ဘက်လုံးမှာ ထိခိုက် ကျဆုံးတာတွေ များပြားခဲ့တယ်လို့လည်း KNU အရာရှိတဦးက ပြောပါတယ်။

အခုလို KNU နဲ့ DKBA တို့ အောက်ခြေအဆင့်ကနေပြီး တဖွဲ့နဲ့တဖွဲ့ နားလည်မှု ရှိလာတဲ့အပေါ်မှာ စစ်အစိုးရက ဘယ်လိုသဘောထားဦးမယ် ဆိုတာ မသိသေးဘူးလို့ အမည်မဖော်လိုသူ ကရင်အမျိုးသားအရေး လှုပ်ရှားသူတဦးက ဆိုပါတယ်။

အခုလို တဖွဲ့နဲ့တဖွဲ့ နားလည်မှု ရှိလာတာဟာ ကောင်းမွန်တဲ့ အသွင်လက္ခဏာ ဆောင်လာတယ်လို့ ဆိုပေမဲ့ စစ်အစိုးရကနေ ကြိုးကိုင်ထားတဲ့ DKBA က ထိပ်ပိုင်းခေါင်းဆောင်တွေ အနေနဲ့ စစ်အစိုးရရဲ့ ဆန္ဒတွေကို ငြင်းဆန် ပယ်ရှားဖို့တော့ အချိန်ယူရမှာဖြစ်ပြီး ညီညွတ်ရေး တည်ဆောက်နိုင်ဖို့ကတော့ မရေရာမှုတွေနဲ့ ပြည့်နေဆဲပဲလို့ ကရင်အမျိုးသားအရေး လှုပ်ရှားသူများက သုံးသပ်ထားပါတယ်။

အကျဉ်းကျ မွန် ဦးဇင်း ကျန်းမာရေးအခြေအနေဆိုး

၂ဝ၁ဝ အထွေထွေရွေးကောက်ပွဲကို ဆန့်ကျင်မှုနဲ့ အင်းစိန်ထောင်စစ်ကြောရေးစခန်းမှာ ထိန်းသိမ်းခံနေရတဲ့ ဦးဇင်း ဇော်လတ် ခေါ် အရှင်ဥက္ကံသဟာ ကျောက်ကပ်ယောင် ရောဂါ ဝေဒနာ ခံစားနေရပေမယ့်လဲ ဆေးဝါးကုသမှု မခံရဘူးလို့ဆိုပါတယ်။ ဒါ့အပြင် စစ်အာဏာ ပိုင်တွေကနေ ပုဒ်မသုံးခုနဲ့ စွဲချက်တင်ထားပြီး တရားစစ်ဆေးတာမှာ မိသားစုတွေကို တက်ရောက်နားထောင်ခွင့် မပြုဘူးလို့လည်း ဆိုပါတယ်။ ဒီအကြောင်းတွေကို ထိုင်း အခြေစိုက်သတင်းထောက် နိုင်ကွန်းအိန်ကနေ အခုလို သတင်းပေးပို့ထားပါတယ်။

အင်းစိန်ထောင်မှာအထိန်းသိမ်းခံထားရတဲ့ ဦးဇင်းဇော်လတ် ခေါ် အရှင်ဥက္ကံသဟာ အခုဆိုရင် စစ်ကြောရေးစခန်းမှာ နှိပ်စက်ခံခဲ့ရတဲ့ဒဏ်ကြောင့် ကျောက်ကပ်ယောင်တဲ့ ဝေဒနာ ခံစားနေရပေမယ့်လဲ ထောင်အာဏာပိုင်တွေက ဆေးရုံမှာ ဆေးဝါးကုသခွင့် မပြုသေးဘူးလို့ မိသားစုတွေကပြောပါတယ်။

ရှင်ဥက္ကံသရဲ့ ကျန်းမာရေးနဲ့ပတ်သက်ပြီး မေးမြန်းစုံစမ်းထားတဲ့ လွတ်လပ်သော မွန် သတင်းအေဂျင်စီရဲ့အယ်ဒီတာ နိုင်အာကာကို မေးမြန်းခဲ့တာမှာ အခုလိုပြောပါတယ်။

“သူ့ညီမက တပတ်ကိုနှစ်ကြိမ် သူ့ကိုထောင်ဝင်စာသွားတွေ့တယ်။ အဲဒီအခါမှာ သူ့ညီမကို သူပြောပြထားတာရှိတယ်။ သူက ကြာကြာထိုင်လို့လည်းမရဘူးပေါ့။ စစ်ကြောရေးစခန်းမှာ ရိုက်နှက်ထားတာ။ အဲဒီဒဏ်တွေကိုခံနေရတာပေါ့။ သူ့ရောဂါအခြေအနေက ကျောက်ကပ် ယောင်တာ ခါးနာတာရှိတယ်ပေါ့။ ဆေးပဲ သောက်နေရသေးတယ်။ ဆေးရုံတော့ လောလောဆယ် တင်ခွင့်မရသေးဘူးပေါ့။”

၂ဝ၁ဝ နှစ်ဆန်းစမှာ အထွေထွေရွေးကောက်ပွဲကို ဆန့်ကျင်တဲ့စာရွက်တွေ လက်ဝယ် တွေ့ရှိမှုနဲ့ အရှင်ဥက္ကံသ အဖမ်းခံခဲ့ရတာဖြစ်ပြီး လက်ရှိ အမှုရင်ဆိုင်နေရတဲ့အကြောင်းကို လည်း နိုင်အာကာက အခုလို ပြောပြပါတယ်။

“ထောင်ဝင်စာတွေ့တာက သူ့ညီမတစ်ယောက်ပဲ တွေ့တယ်။ တခြား ဘယ်သူမှ တွေ့ခွင့် မရှိဘူး။ သူ့အနားမှာတော့ နိုင်ငံရေးအကျဉ်းသားတွေရှိတယ်။ သူ့ကိုရုံးတင်တာ ၇ ခါ လောက်ရှိတယ်ပေါ့။ ဒေါ်ခင်ဌေးကြွယ်ကနေ သူ့အမှုကို လိုက်ပေးနေတယ်။ အမှု ၃ မှုနဲ့ သူ့ကိုစွပ်စွဲထားတယ်။ တခုက Electronic ပုဒ်မရယ်။ နောက်တခုက တရားမဝင်ပုံနှိပ်တဲ့ ဥပဒေပုဒ်မရယ်။ နိုင်ငံတော်အကြည်ညိုပျက်စေတဲ့ ဥပဒေပုဒ်မ သုံးခုနဲ့ သူ့ကိုစွဲထားတယ်။”

အရှင်ဥက္ကံသကို မေလ ၁၄ ရက်နေ့ကနေစပြီး အင်းစိန်ထောင် တရားရုံးမှာ ၆ ကြိမ်တိုင် ရုံးတင် စစ်ဆေးပြီးဖြစ်ပေမယ့်လည်း ပြစ်ဒဏ်ချမှတ်ခြင်းမရှိသေးပါဘူး။ မိသားစုဝင်တွေကိုလည်း တရားရုံးမှာ ဝင်ရောက် နားထောင်ခွင့် မပြုဘူးလို့ နိုင်အာကာက ပြောပါတယ်။

၂ဝ၁ဝ ခုနှစ် ဇန်နဝါရီလ ၇ ရက်နေ့မှာ အရှင်ဥက္ကံသကို သံဖြူဇရပ်မြို့ ကြံ့ခိုင်ရေးရပ်ကွက် အတွင်းမှာ မြို့နယ်ရဲများကနေ ဖမ်းဆီးခဲ့ပြီး ယခုအချိန်ထိ အင်းစိန်အကျဉ်းထောင် တိုက် (၂)၊ အခန်း (၁) မှာ ချုပ်နှောင်ထားဆဲဖြစ်ပါတယ်။

မွန်ပြည်နယ်၊ ချောင်းဆုံမြို့နယ်၊ မုဒွန်းရွာဇာတိ သက်တော် ၂၈ နှစ်ရှိ အရှင်ဥက္ကံသဟာ မွန်ပြည်နယ် မုဒုံမြို့နယ် နိုင်လှုံကျေးရွာ အောင်ဇေယျ ပရိယတ္တိစာသင်တိုက်မှာ လက်ထောက် စာချဆရာတော်တပါးဖြစ်ပြီး အဲဒီကျောင်းမှာ ၅ နှစ်ကျော် သီတင်းသုံးခဲ့ ပါတယ်။
အခုလတ်တလောအခြေအနေအရ မွန်ပြည်နယ်အတွင်းမှာဆိုယင် အရှင်ဥက္ကံသနဲ့ ပက်သက်နေတဲ့သူတွေကို စစ်အာဏာပိုင်တွေက စုံစမ်းစစ်ဆေးနေပြီး ဦးဇင်းနဲ့နီးစပ်တဲ့ သူတွေလည်း ထွက်ပြေးတိမ်းရှာင်နေရတယ်လို့ဆိုပါတယ်။

စစ်အစိုးရအနေနဲ့ ၂ဝဝ၈ ရွှေဝါရောင်တော်လှန်ရေးအပြီးမှာ ရဟန်းသံဃာတော်တွေရဲ့ လှုပ်ရှားမှုတွေကို အမြဲတမ်း စောင့်ကြည့်နေပြီး လာမယ့်အထွေထွေရွေးကောက်ပွဲကို ဆန့်ကျင်သွားမှာကိုလည်း အထူး စိုးရိမ်နေတယ်လို့ မွန်ရဟန်းပျိုတစ်ပါးကမိန့်ပါတယ်။

ဖားကန့် ရေကြီး

မြန်မာနိုင်ငံရဲ့ ကျောက်စိမ်းထွက်ရာ ကချင်ပြည်နယ် ဖားကန့်မြို့မှာ မိုးမပြတ် ရွာနေတာကြောင့် ရပ်ကွက် အတော်များများဟာ ရေလွှမ်းမိုးနေပြီး အနီးအနား ဒေသတွေနဲ့ ဆက်သွယ်ဖို့ အခက်အခဲတွေ တွေ့ကြုံနေရပါတယ်။ ဆက်လက်ပြီး မိုးကြီး ရေလျှံမယ်ဆိုရင် အရင်နှစ်တွေလို မြေစာပုံတွေ ပြိုမှာ၊ ပိမှာကို ဒေသခံတွေ စိုးရိမ်နေကြရပါတယ်။ ဖားကန့်ဒေသမှာ စက်ယန္တရားတွေနဲ့ ကျောက်စိမ်းတူးဖော်တာကြောင့် ဖြစ်ပေါ်လာတဲ့ သဘာဝပတ်ဝန်းကျင် ပျက်စီးမှုရဲ့ နောက်ဆက်တွဲ အခြေအနေတွေကို ထိုင်းအခြေစိုက် သတင်းထောက် ကိုမိုးဇော်က တင်ပြပေးထားပါတယ်။

ကချင်ပြည်နယ် ဖားကန့်ဒေသမှာ နေ့စဉ်ရက်ဆက် မိုးကြီးပြီဆိုရင် ရေလွှမ်းမိုးတာ၊ မြေပြိုတာတွေဟာ နှစ်တိုင်းလို ဖြစ်ပျက်နေခဲ့တာ ဖြစ်ပါတယ်။ ဒီရက်ပိုင်းမှာလည်း မိုးဆက်တိုက်ရွာတာကြောင့် ဖားကန့်မြို့က ရပ်ကွက် အတော်များများဟာ ရေလွှမ်းမိုးခဲ့ရတယ်လို့ ဒေသခံတယောက်က ပြောပါတယ်။

“မိုးကလည်း ကျနော်တို့ဆီက မပြတ်တာကို ၁၀ ရက်ကျော်လောက် ရှိနေပြီဆိုတော့ တက်လိုက်ကျလိုက်၊ တက်လိုက်ကျလိုက်နဲ့ ၁၀ ရက်ကျော်လောက် ရှိနေပြီလေ။ မိုးက များတာနဲ့ ချောင်းက ကောနေတာနဲ့ ရေက မဆင်းနိုင်ဘူး ဖြစ်နေတာလေ။ အခုထိကိုပဲ တက်နေတယ် ရေက။ ကျနော့်အိမ်အောက် ရေပြန်ရောက်နေပြီ။ ဖားကန့်၊ လုံးခင်း၊ ဆိတ်မူ ဒါ့အပြင်ကို မြို့ပေါ်ရပ်ကွက်တွေကတော့ အကုန်မြုပ်ပဲလေ။”

စက်ယန္တရားတွေနဲ့ ကျောက်စိမ်းတူးဖော်ရာက ထွက်ရှိတဲ့ မြေစာတွေကို ဖားကန့်မြို့အနီးမှာ စွန့်ပစ်ထားတာကြောင့် ဒီထက် မိုးများလာရင် မြေပြိုမှာကိုလည်း စိုးရိမ်နေကြရတယ်လို့ သူက ဆက်ပြောပါတယ်။

“နွေပိုင်းတုန်းက ပစ်ထားတဲ့ မြေစာတွေက ကျနော်တို့ ဖားကန့်မြို့နဲ့ ပတ်ပတ်လည် အများကြီးလေ။ မြေစာတွေကလည်း နည်းတာတွေ မဟုတ်ဘူး၊ ကားတွေနဲ့ ပစ်ထားတာလေ။ နောက် မိုးက များဦးမှာ၊ ဒီ့ထက်များပြီ ဆိုတဲ့အခါကျ အဲဒါတွေ လျှောကျတာတွေတို့၊ ကမ်းပါးမှာ နေတဲ့ဟာတွေက ဘာဖြစ်တာ ညာဖြစ်တာတွေက လာဦးမှာ။ လူထုကတော့ အခြေအနေအရပဲ ကြည့်နေရတာပေါ့။ ရေလေး နည်းနည်းတက်လာပြီတဲ့၊ မိုးများပြီတဲ့ဆို လွတ်ရာကျွတ်ရာ သွားနေ ရှောင်နေ အဲလို လုပ်ရတာပေါ့။”

အခုလို ဖားကန့်ဒေသမှာ ရေကြီးနေတာကြောင့် ဆိုင်းတောင်နဲ့ လုံးခင်းဘက် သွားတဲ့ ကားလမ်းတွေလည်း ရေလွှမ်းတာတွေ ရှိနေပြီး တချို့နေရာတွေမှာ စက်လှေနဲ့ သွားလာနေရပါတယ်။

ဒီအခြေအနေတွေကြောင့် ကြုံတွေ့ရတဲ့ အခက်အခဲကိုတော့ ဒေသခံ အမျိုးသမီး တယောက်က အခုလို ပြောပါတယ်။

“ကျောင်းသူ ကျောင်းသားတွေအတွက်၊ ပြောမယ်ဆို မှော်ကနေ လာတဲ့သူတွေ အတွက်က အခက်အခဲ ရှိပါတယ်။ ရေတအားကြီးတဲ့ အချိန်တော့ ထွက်လို့ မရဘူးပေါ့။ ကုန်ဈေးနှုန်းတွေကတော့ အခုတလော ဈေးတက်နေပါတယ်။ ဆီဈေးတွေနဲ့ ကုန်ခြောက်ဈေးတွေကတော့ ကားလမ်းတွေ အသွားအလာ နည်းနည်းခက်တော့ တက်ပါတယ်။”

ကချင်လူမှုဖွံ့ဖြိုးရေး ကွန်ယက်အဖွဲ့က ကိုဆားဂျီးကတော့ ဖားကန့်ဒေသမှာ ကျောက်စိမ်းကို စက်ယန္တရားတွေနဲ့ အကြီးအကျယ် တူးဖော်တာကြောင့် သဘာဝပတ်ဝန်းကျင် ပျက်စီးပြီး အခုလို ရေကြီးတာ ဖြစ်တယ်လို့ သုံးသပ်ပါတယ်။

“ဖားကန့်ဒေသမှာ ကျောက်စိမ်း တူးဖော်ရေးလုပ်ငန်း လုပ်တဲ့ဟာက အရင်တုန်းက တပိုင်တနိုင်လုပ်တဲ့ အချိန်မှာ သိပ်ကိစ္စမရှိဘူး။ အခု စက်ယန္တရားကြီးနဲ့ လုပ်လိုက်တဲ့ အချိန်မှာ သဘာဝပတ်ဝန်းကျင် ပျက်စီးမှုက အင်မတန်မှ များပြားနေတယ်။ တောင်တွေက မြေပြန့်ဖြစ်သွားတာ၊ မြေပြန့်နေရာမှာက ဒီချိုင့်ခွက်ပေ့ါ၊ တောင်ချိုင့်နေရာမှာက မြေစာပုံတွေနဲ့ ပြန်ပြည့်သွားတယ်။ သွားလာတဲ့ ရေလမ်းကြောင်းတွေလည်း ပိတ်သွားတယ်။ သဘာဝဆိုတာ ဘာမှ မရှိတော့ဘူးလေ။ အဲဒါကြောင့် တောင်ပြိုခြင်း၊ ကမ်းပါးပြိုခြင်း၊ ရေကြီးခြင်း ဒါမျိုးက အမြဲတမ်း ဖြစ်နေတာပဲ ဖားကန့်ဒေသမှာ။”

ဒေသခံတွေကလည်း မိုးများများရွာရင် ကျောက်တွင်းကထွက်တဲ့ မြေစာတွေက ရေနဲ့အတူ ဥရုချောင်းအတွင်း မျောကျလာတာမို့ ချောင်းကောပြီး ရေမစီးဆင်းနိုင်တာကြောင့် ရေကြီး ရေလျှံတာ၊ ကမ်းပါးပြိုတာတွေ ဖြစ်တာလို့ ပြောကြပါတယ်။

ဖားကန့်ဒေသမှာ ရေကြီးပြီး မြေပြိုတာကြောင့် ၂၀၀၈ ခုနှစ်မှာ အနည်းဆုံး လူ ၁၄ ယောက် သေဆုံးခဲ့ရပြီး အရင်နှစ်ကတော့ ၂၄ ယောက် သေဆုံးခဲ့တယ်လို့ နိုင်ငံပိုင် သတင်းစာတွေမှာ ဖော်ပြခဲ့ပါတယ်။ ဒေသခံတွေကတော့ ၂၄ ယောက်ထက် မကနိုင်ဘူးလို့လည်း အဲဒီအချိန်က သုံးသပ်ပါတယ်။ ဒီလို အသေအပျောက် များခဲ့တဲ့ အရင်နှစ် ဇူလိုင်လ ၅ ရက်နေ့က ဖားကန့်မြို့ရဲ့ မိုးရေချိန်ဟာ ၁၄.၆၄ လက်မအထိ ရွာသွန်းခဲ့တာ ဖြစ်ပါတယ်။ ဒီနှစ် ဖားကန့်မှာ ရေကြီးတာကတော့ မနှစ်ကလောက် မဆိုးဝါးသလို အပျက်အစီး၊ အထိအခိုက်လည်း မရှိပါဘူး။