ကမ္ဘာ့ဖလား ဖွင့်ပွဲ မင်ဒဲလား မတက်နိုင်

တောင်အာဖရိက နိုင်ငံတွင် ယနေ့စတင် ကျင်းပသည့် ၂၀၁၀ ကမ္ဘာ့ဖလား ဘောလုံး ပြိုင်ပွဲ၏ ဖွင့်ပွဲ အခမ်းအနားသို့ နိုင်ငံ၏ အကြီးအကဲဖြစ်သူ နယ်လ်ဆင် မင်ဒဲလားသည် ၎င်း၏ မြေးမလေး သေဆုံးသွားသောကြောင့် တက်ရောက်နိုင်မည် မဟုတ် ကြောင်း သိရှိရသည်။

ဇီနာနီ မင်ဒဲလား အသက် ၁၃ နှစ်သည် ယမန်နေ့ညက ဂျိုဟန်နက်စ်ဘတ်မြို့ရှိ ဆူဝီတို အရပ်တွင် ကျင်းပခဲ့သော ကမ္ဘာ့ဖလား ကဇာတ်ပွဲမှ အပြန် ယာဉ်တိုက်မှု ဖြစ်ပွားခဲ့သောကြောင့် သေဆုံးသွားခဲ့ရခြင်းဖြစ်သည်။ ယင်း ကဇာတ်ပွဲတွင် နာမည်ကြီးအဆိုတော် Shakira နှင့် Black Eyed Peas တို့မှ အသီးသီး ဖျော်ဖြေခဲ့သည်။

ဂျိုဟန်နက်စ်ဘတ်မြို့ရဲတပ်ဖွဲ့မှ ပြောရေးဆိုခွင့်ရှိသူ မစ္စတာ အဒ်နာ မာမွန်ယိန်း က ယာဉ်တိုက်မှု ဖြစ်ချိန်တွင် ဇီနာနီ တို့၏ ကားကို မောင်းနှင်သော ယာဉ်မောင်းသည် အရက်မူးနေကြောင်း၊ အရက်သေစာ သောက်သုံးထား၍ မော်တော်ကားကို မထိန်းနိုင်ဘဲ အတားအဆီး တခုခုဖြင့် တိုက်မိခဲ့ကြောင်း၊ အဆိုပါ ယာဉ်မောင်းကို ဖမ်းဆီးထားကြောင်း ပြောကြား သွား သည်ဟု အေပီ သတင်းဌာနက ရေးသားသည်။

ယာဉ်တိုက်မှုတွင် ဇီနာနီ တဦးတည်းသာ သေဆုံးခဲ့ရပြီး အခြားသူများ ထိခိုက်ဒဏ်ရာရမှု မရှိခဲ့ကြောင်း သိရသည်။

နယ်လ်ဆင် မင်ဒဲလား၏ ဇနီးဟောင်းဖြစ်သူ ဝင်နီ မာဒီကီဇဲလား မင်ဒဲလားသည် အဆိုပါ ယာဉ်တိုက်မှုကြောင့် ထိတ်လန့်မှု ဖြစ်ကာ ဆေးရုံသို့ ပို့ဆောင်၍ ကုသမှု ခံယူရသည်ဟု မီဒီယာ အများစုက ဖော်ပြကြသော်လည်း နယ်လ်ဆင် မင်ဒဲလား ဖောင်ဒေးရှင်းမှ ပြောရေးဆိုခွင့်ရှိသူ ဆယ်လို ဟာတန် က“အဲဒီအချိန်မှာ သူမဟာ ကားထဲမှာ ရှိမနေပါဘူး”ဟု ငြင်းဆို လိုက်သည်။

သေဆုံးသွားသော ဇီနာနီ မင်ဒဲလားသည် အသက် ၁၃ ပြည့်ပြီး နှစ်ရက်အကြာတွင် ယခုကဲ့သို့ သေဆုံးသွားခဲ့ရခြင်း ဖြစ်သည်။

စစ်အစိုးရ နျူကလီးယား စီမံကိန်း အမေရိကန် စုံစမ်း

အမေရိကန် နိုင်ငံ၏ အာဆီယံရေးရာ သံအမတ် မစ္စတာ စကော့ မာရှယ်က နျူကလီးယား အရေးနှင့် ပတ်သက်ပြီး မြန်မာနိုင်ငံ အပေါ် အမေရိကန် အစိုးရက ဆက်လက်၍ လေ့လာ စုံစမ်းနေကြောင်း ပြောကြားလိုက်သည်။

“အဓိကထားပြီး စောင့်ကြည့်ရမယ့် အချက်နှစ်ချက် ရှိပါတယ်၊ ပထမ တချက်က အများ ပြောနေတဲ့ အတိုင်း ဒေသတွင်း တည်ငြိမ်မှုကို ခြိမ်းခြောက် နိုင်တဲ့ နျူကလီးယား စီမံကိန်း တကယ် ရှိ၊ မရှိ ဆိုတာနဲ့ တခြား စစ်လက်နက် ပစ္စည်းတွေ ပိုင်ဆိုင်နေမှု ရှိ၊ မရှိ ဆိုတာပါပဲ”ဟု မစ္စတာ စကော့ မာရှယ်က ယမန်နေ့တွင် အေအက်ဖ်ပီ သတင်းဌာနသို့ ပြောသည်။

ထိုသို့ သံသယ ဖြစ်နိုင်သည် ဆိုသည့် အချက်နှစ်ချက်ကို အမေရိကန် အစိုးရက အနီးကပ် စောင့်ကြည့်မည် ဖြစ်ကြောင်း လည်း ၎င်းက ဆိုသည်။
ဒုံးပျံ အင်ဂျင် အထူးပြုဘာသာရပ်နှင့် ရုရှားမှ ဘွဲ့ရခဲ့သူ ဗိုလ်မှူး စိုင်းသိန်းဝင်း က စစ်အစိုးရ၏ လျှို့ဝှက် နျူကလီးယား၊ ဒုံးကျည် နှင့် ဥမင်လိုဏ်ခေါင်း စီမံကိန်းများကို ဖော်ထုတ်ခဲ့ပြီးနောက် မြန်မာနိုင်ငံအပေါ်ကို နိုင်ငံတကာမှ ယခုကဲ့သို့ စောင့်ကြည့် လေ့လာမှုများ ဖြစ်ပေါ်လာသည်။

စစ်အစိုးရက လျှို့ဝှက် နျူကလီးယား စီမံကိန်း၊ ဒုံးကျည်နှင့် ဥမင်လိုဏ်ခေါင်း စီမံကိန်းများကို မြောက်ကိုရီးယား နိုင်ငံမှ အကူအညီများဖြင့် အကောင်အထည်ဖော်နေခြင်းဖြစ်ကြောင်း အများက ပြောဆိုနေကြသည်။

မြန်မာဒုက္ခသည် အရေး အမေရိကန် ၀န်ကြီး အထူး စိုးရိမ်

အမေရိကန် လူဝင်မှု ကြီးကြပ်ရေးနှင့် ဒုက္ခသည်များ ဆိုင်ရာ ဒုတိယ လက်ထောက် နိုင်ငံခြားရေး ၀န်ကြီး အဲရစ် ရှဝပ် (ဇ်) က မြန်မာ စစ်အစိုးရ အနေဖြင့် ၂၀၁၀ ရွေးကောက်ပွဲကို ကျင်းပရန် စီစဉ်နေ ချိန်၌ ထိုင်း-မြန်မာနယ်စပ်ရှိ ဒုက္ခသည် တသိန်း လေးသောင်း ကျော်၏ အရေးကို အထူး စိုးရိမ်မိကြောင်း ယမန်နေ့က ပြောကြားခဲ့သည်။

ထိုင်းနိုင်ငံ ဘန်ကောက်မြို့တွင် ပြုလုပ်ခဲ့သော ထိုင်းအစိုးရ တာဝန်ရှိသူများနှင့် တွေ့ဆုံ ဆွေးနွေးပွဲ၌ ၀န်ကြီး အဲရစ် ရှဝပ်(ဇ်) က သတင်းထောက်များကို ပြောကြားခဲ့ခြင်း ဖြစ်သည်။

ထိုင်း-မြန်မာ နယ်စပ် တလျှောက်တွင် ဒုက္ခသည် စခန်း ၉ ခုရှိသည်။ ယင်း ဒုက္ခသည်များသည် ၁၉၈၃ မှ စတင်၍ မြန်မာ စစ်အစိုးရတပ်များ ၏ ထိုးစစ်ဆင်မှုကြောင့် ထိုင်းနိုင်ငံသို့ ယနေ့အထိ ထွက်ပြေးလာကြသူများ ရှိနေကြောင်း သိရသည်။

အဲရစ် ရှဝပ်(ဇ်)က လာမည့် ရွေးကောက်ပွဲ လုပ်ငန်းစဉ်များနှင့် ပတ်သက်၍ စစ်အစိုးရက ဆက်လုပ်နေသည့် ဖိနှိပ်မှုနှင့် တင်းကျပ်မှု များသည် ပြည်တွင်း အခြေအနေကို ပြောင်းလဲစေနိုင်ရန် အခွင့်အရေး မဆို စလောက်သာ ရှိစေမည်ဟု ပြောသည်။

“တကယ်လို့သာ ဖြစ်လာမယ်ဆိုရင် ဒီရွေးကောက်ပွဲဟာ ဖိနှိပ်ခံရမှုကို ကြောက်နေရတဲ့ မြန်မာ နိုင်ငံသားတွေနဲ့ အကာအကွယ်မဲ့ နေတဲ့ နိုင်ငံပြင်ပမှာရောက်နေသူတွေအတွက် လိုအပ်တဲ့ ပြောင်းလဲမှုတွေ ဖြစ်လာမှာ မဟုတ်ပါဘူး”ဟု ၎င်းက ဆိုသည်။

တချိန်တည်းမှာပင် အဲရစ် ရှဝပ်(ဇ်) အပါအ၀င် ဘန်ကောက်သံရုံးမှ တာဝန်ရှိသူ ၇ ဦးခန့်သည် မယ်လ ဒုက္ခသည်စခန်းသို့ ယနေ့ ရောက်ရှိလာပြီး စခန်းတာဝန်ရှိသူများက လိုအပ်သော အကူအညီများကို တင်ပြခဲ့ကြသည်ဟု မယ်လ ဒုက္ခသည်စခန်း ဥက္ကဌ စောထွန်းထွန်းက ဧရာဝတီသို့ ပြောသည်။

ဒုက္ခသည်စခန်းတွင် ယခုလတ်တလော သွေးလွန်တုပ်ကွေးနှင့် ၀မ်းပျက်ဝမ်းလျှောရောဂါ ဖြစ်ပွားနေသော အခြေအနေများကို တင်ပြ ကြောင်း စောထွန်းထွန်းက ဆိုသည်။

အဲရစ် ရှဝပ်(ဇ်)သည် ထိုင်းနိုင်ငံ မဲဆောက်မြို့ အခြေစိုက် နိုင်ငံရေး အကျဉ်းသားများ ကူညီ စောင့်ရှောက်ရေး အသင်း (AAPP)နှင့် မြန်မာ ဒီမိုကရေစီ အင်အားစု (Forum for Democracy in Burma) အပါအ၀င် မြန်မာ့အရေး လှုပ်ရှားသည့် အဖွဲ့ ၁၅ဖွဲ့မှ တာဝန်ရှိ သူများကို စနေနေ့တွင် တွေ့ဆုံရန်ရှိကြောင်း သိရသည်။

ရေခဲစက် ဓာတ်ငွေ့ပိုက် ပေါက်ကွဲ၊ ၄ ဦး သေဆုံး

ရန်ကုန်တိုင်း ကမာရွတ် မြို့နယ် ရန်ကုန် အင်းစိန် လမ်းမပေါ်ရှိ နှင်းတောင် ရေခဲစက် လုပ်ငန်းတွင် ယမန်နေ့ ညနေပိုင်းက ဓာတ်ငွေ့ ပိုက်လိုင်း ပေါက်ကွဲသည့် အတွက် အလုပ်သမား ၄ ဦး သေဆုံးပြီး ဓာတ်ငွေ့ ပျံ့နှံ့မှုကြောင့် လူ ၄၀ ကျော် လဲကျ သတိမေ့မျော ခဲ့ကြောင်း စက်ရုံအနီး နေထိုင်သူ မျက်မြင် သက်သေများက ပြောသည်။

“အုံးဆိုတဲ့ အသံက တော်တော် ကျယ်တယ်၊ အဲဒီ အသံနဲ့ အတူတူ မီးခိုးလုံးကြီးက မြင့်တက်သွားတယ်၊ မကြာဘူး လူတွေ လမ်းမ ပေါ်မှာ ပစ်လဲ ကုန်ကြတာ”ဟု အဆိုပါ ဓာတ်ငွေ့ပိုက်ပေါက်ကွဲမှုကို ကြုံတွေ့ခဲ့သူ တဦးကပြောသည်။


ယင်း ပေါက်ကွဲသည့် ဓာတ်ငွေ့ပိုက်မှာ အချင်း ၄ လက်မခန့်ရှိ အမိုးနီးယား ဓာတ်ငွေ့ပိုက်ဖြစ်ပြီး ပေါက်ကွဲချိန်မှာ လျှပ်စစ်မီး လာ ချိန် ညနေ ၆ နာရီ ၀န်းကျင်ခန့်က ဖြစ်သည်ဟုလည်း ပေါက်ကွဲမှုဖြစ်စဉ် မေ့လဲကျသွားသော လူနာများကို လိုက်လံ ကူညီပေး သည့် အင်းစိန်မြို့နယ်နေ အမျိုးသားတဦးက ပြောသည်။

ပေါက်ကွဲမှုဖြစ်ပွားပြီး ည ၈ နာရီဝန်းကျင်အထိ ဓာတ်ငွေ့များ ပျံ့နှံ့နေ၍ စက်ရုံအနီးနေထိုင်သူများ အဝေးသို့ သွားရောက် နေထိုင် ရကြောင်းလည်း သိရသည်။

အမိုးနီးယားဓာတ်ငွေ့ပေါက်ကွဲသော ရေခဲစက်ရုံသည် ငါးပုစွန်စက်ရုံ နှင့် တွဲလျက်ရှိပြီး စက်ရုံပိုင်ရှင်များမှာ ဦးမြင့်သိန်း၊ ဦးမြင့်စိုး ဆိုသူများဖြစ်ကြောင်း၊ ၎င်းတို့သည် အစိုးရနှင့် နီးစပ်ပြီး လုပ်ပိုင်ခွင့်ရရှိထားသူများဖြစ်ကြောင်း ယင်းစက်ရုံရှေ့တွင် နေထိုင်သူ တဦးက ဆိုသည်။

အဆိုပါ စက်ရုံသည် လွန်ခဲ့သောလေးလခန့်ကလည်း အမိုးနီးယား ဓာတ်ငွေ့ပိုက် ပေါက်ကွဲမှု ဖြစ်ပွားခဲ့ပြီး ယခုကဲ့သို့ ပြင်းထန်မှု မရှိခဲ့ကြောင်း သိရသည်။

ဆိုင်ကယ်များ ဇွန်လကုန် အထိ တရားဝင် မှတ်ပုံ တင်ခွင့် ပြုမည် ဖြစ်ကြောင်း ကြေညာ

စစ်အစိုးရမှ တရားမ၀င် တင်သွင်း လာသည့် ဆိုင်ကယ် များကို ၂၀၀၉ ခုနှစ် ဒီဇင်ဘာ ၁ ရက်မှ ၂၀၁၀ ခုနှစ် ဇန်န၀ါရီ ၃၁ ရက် အထိ အခွန် အခများ ပေးချေ၍ တရားဝင် မှတ်ပုံတင်များ ထုတ်ပေး ခဲ့ပြီး ဖြစ်သည်။ ယခုအခါ တရားဝင် မှတ်ပုံတင် ပြုလုပ် ရေးကို အချိန်ကာလ တိုးမြှင့်ပြီး ၂၀၁၀ ခုနှစ် ဇွန် ၃၀ ရက်အထိ ဆောင်ရွက် ပေးသွားမည် ဖြစ်ကြောင်း သိရ ပါသည်။ ထို့ပြင် ၂၀၁၀ ခုနှစ် ဇူလိုင် ၁ ရက်မှ စတင်ပြီး မှတ်ပုံ တင်မဲ့ ဆိုင်ကယ် များကို တရား ဥပဒေ နှင့် အညီ နိုင်ငံပိုင် သိမ်းဆည်း သွားမည် ဖြစ်ကြောင်း သိရသည်။ အကယ်၍ နိုင်ငံပိုင် သိမ်းဆည်း ထားသော ဆိုင်ကယ် များကို ပိုင်ရှင် ဖြစ်သူက ပြန်ရယူ လိုကြောင်း လျှောက်ထား လာလျှင် ဆိုင်ကယ်၏ တန်ဖိုး နှင့် ကျသင့်သည့် အခွန် ငွေများကို ပေးဆောင် ရမည် ဖြစ်ပြီး နိုင်ငံတော်က တရားဝင် အဖြစ် သတ်မှတ် မှတ်ပုံ တင်ပေး မည်ဟု ရထား ပို့ဆောင်ရေး ၀န်ကြီးဌာန ကုန်းလမ်း ပို့ဆောင်ရေး ညွှန်ကြားမှု ဦးစီးဌာနက သတင်း ထုတ်ပြန် ထားကြောင်း သတင်း ရရှိပါသည်။

ရန်ကုန်မြို့တွင် မီးသတ် နည်းပညာ ကောလိပ် ဖွင့်လှစ်မည်

မီးသတ် ပညာရပ်များကို သင်ကြား ပို့ချမည့် မီးသတ် နည်းပညာ ကောလိပ် ကို ရန်ကုန်မြို့၊ စမ်းချောင်း မြို့နယ်တွင် မကြာမီ ဖွင့်လှစ်ရန် မီးသတ်ဦးစီးဌာန ရုံးချုပ်က စီစဉ်လျက် ရှိသည်ဟု ရန်ကုန်တိုင်း မီးသတ် ဦးစီးဌာန တိုင်းဦးစီးမှူး ဦးသင်းဌေးရွှေက ပြောသည်။ “မီးသတ် နည်းပညာ တွေကို ကျယ်ကျယ် ပြန့်ပြန့် သိရှိ လာအောင် ဆောင်ရွက်တဲ့ အနေနဲ့ မီးသတ် နည်းပညာ ကောလိပ်ကို ဖွင့်လှစ်ဖို့ စီစဉ်နေ ပါတယ်။ ၁၀ တန်းအောင် ကျောင်းသား တွေကို လက်ခံ မှာပါ ”ဟု ၄င်းက ပြောသည်။ စမ်းချောင်း မြို့နယ်၊ မြေနီကုန်းရှိ မစိုးရိမ် ကျောင်းတိုက် အနီးတွင် ကောလိပ် အဆောက် အအုံကို တည်ဆောက်လျက်ရှိပြီး ဖွင့်လှစ်မည့် ရက်ကို မသတ်မှတ် ရသေးကြောင်း ဦးသင်းဌေးရွှေက ပြောသည်။ “လာမယ့် ၁၀ တန်းအောင်တွေ ကနေ စပြီး လက်ခံ နိုင်မယ်လို့ ခန့်မှန်း ပါတယ်။ ဒီပလိုမာ ပေးမှာပါ။ ပညာရေး ဝန်ကြီးဌာန စတဲ့ သက်ဆိုင်ရာ ဝန်ကြီး ဌာန တွေနဲ့ ညှိနှိုင်းဆဲ ဖြစ်တဲ့ အတွက် ဖွင့်လှစ်မယ့် အချိန် အတိ အကျကို မပြောနိုင် သေးပါဘူး ”ဟု ဦးသင်းဌေးရွှေ က ပြောသည်။

ကျောင်းသား လက်ခံမည့် ပုံစံ၊ သင်ရိုးညွှန်းတမ်း စသည့် ကိစ္စ ရပ်များကို စီစဉ် နေဆဲ ဖြစ်ကြောင်း ၄င်းက ပြောသည်။ “မီးသတ် ပညာတွေကို လူတွေက အထင် သေးတယ်။ မီးသတ် ပညာဟာ အင်ဂျင်နီယာ ပညာရပ်တွေ ကိုလည်း သိရတယ်။ လက်သမား ပညာရပ်တွေကိုလည်း သိရတယ်။ ဓာတု ပစ္စည်းတွေ အကြောင်း၊ စက် ယန္တရားတွေ အကြောင်း၊ မီးငြှိမ်းသတ်နည်း မှာလည်း လျှပ်စစ်ကြောင့် လောင်တဲ့မီး၊ သစ်သား၊ ဝါး စတဲ့ ကာဗွန်ဒြပ်ပေါင်း တွေကို လောင်တဲ့ မီး၊ သတ္တုကို လောင်တဲ့မီး စတဲ့ လောင်စာ အလိုက ငြှိမ်းသတ် နည်းလမ်းတွေ ရှိပြီး ဖြစ်တယ် ”ဟု ၄င်းကေ ပြာသည်။ မီးသတ် နည်းပညာ ကောလိပ်မှ ဒီပလိုမာ ရရှိသူများ သည် မြန်မာနိုင်ငံ မီးသတ်ဦးစီးဌာန အောက်ရှိ မီးသတ် စခန်းများတွင် ရာထူး အဆင့်ဆင့် မီးသတ် သမားများ အဖြစ် လည်းကောင်း၊ မီးသတ် ပညာ ဖြန့်ဖြူးရေး ဝန်ထမ်းများ အဖြစ် လည်းကောင်း၊ ဟိုတယ်များ၊ ကုမ္ပဏီများ၊ အဖွဲ့အစည်း များတွင် မီးသတ် အကြံပေးများ အဖြစ် လည်းကောင်း အလုပ် အကိုင် ရရှိနိုင်မည် ဖြစ်ကြောင်း ဦးသင်းဌေးရွှေက ပြောကြားကြောင်း မြန်မာတိုင်း(မ်) ဂျာနယ်တွင် ဖော်ပြထား ပါသည်။

မုတ္တမကမ်းလွန်မှ ဓါတ်ငွေ့များ ရန်ကုန်သို့ ၂၄ လက်မ ပိုက်ဖြင့် ပို့

မြန်မာနိုင်ငံ မုတ္တမ ကမ်းလွန်ရှိ ရတနာ ဓါတ်ငွေ့ ထုတ်လုပ်ရေး စီမံကိန်းမှ ဓါတ်ငွေ့များကို ရန်ကုန်မြို့သို့ ၂၄ လက်မ ပိုက်သစ်ကြီး အသုံးပြုလျက် ပို့ဆောင်နေပြီဟု သိရှိရပါသည်။ ယင်းသို့ ပို့ဆောင်ခြင်းဖြင့် လျှပ်စစ် ဓါတ်အား ပြတ်တောက်မှု လျော့ကျသွားမည် ဖြစ်ပါသည်။ ယင်း ပိတ်လိုင်းမှ တစ်နေ့လျှင် ဓါတ်ငွေ့ ကုဗပေ သန်း ၁၅၀ ပို့လွှတ်မည် ဖြစ်ပြီး ရတနာ ဓါတ်ငွေ့ ထုတ်လုပ်ရေးမှ ဖိအား ၁၄၀၀ ပီအက်စ်အိုင်ဖြင့် ပို့လွှတ် လိုက်ခြင်းကို ထိန်းချုပ်ရေး စခန်းဖြစ်သော ဖျာပုံခရိုင် ဒေါ်ငြိမ်း ကျေးရွာရှိ ပိုက်လိုင်း စင်တာမှ ဖိအား ၈၀၀ ပီအက်စ်အိုင်ဖြင့် အင်းစိန်ရွာမ ဓါတ်ငွေ့ ဖြန့်ဖြူးရေး စခန်းသို့ ထိန်းချုပ် ပို့လွှတ်မည် ဖြစ်ပါသည်။ ယင်း ပိုက်လိုင်းမှာ ကုန်းတွင်းပိုင်းတွင် ၁၃၆ ကီလိုမီတာ ရှည်လျားပြီး ပင်လယ်ကြမ်းပြင် ရေအောက်တွင် ၁၅၁ ကီလိုမီတာ ရှည်လျားမည် ဖြစ်ပါသည်။ ရန်ကုန်မြို့တွင် ရတနာ ဓါတ်ငွေ့ ထုတ်လုပ်ရေးမှ လျှပ်စစ်ဓါတ်အား ဖြန့်ဖြူးရေး စက်ရုံများသို့ ပို့လွှတ်နေသော ဓါတ်ငွေ့ ပိုက်အဟောင်းမှာ ယိုစိမ့် ခဲ့သည့်အတွက် ဓါတ်အားများ လျော့ကျ ပြတ်တောက် ခဲ့ရပါသည်။

မေလ အလယ်လောက်တွင် လူနေအိမ်များကို ဓါတ်အား ပေးနိုင်ရေး အတွက် အိမ်တွင်း စက်မှု လုပ်ငန်းများကို ယာယီ လျှပ်စစ် ဖြတ်တောက်ခြင်းများ ဆောင်ရွက် ခဲ့ပါသည်။ ယင်းယာယီ ဖြတ်တောက် ထားမှုများကို လွန်ခဲ့သော အပတ်က စက်မှုဇုံ များမှလွဲလျှင် ပြန်လည် တပ်ဆင်ပေးခဲ့ပြီး ဖြစ်ပါသည်။ မြန်မာနိုင်ငံ အနေဖြင့် ဓါတ်ငွေ့နှင့် ရေအားလျှပ်စစ်မှ လျှပ်စစ် ထုတ်လုပ်မှု မာဂါဝပ် ၆၆၀ ရှိပြီး ယင်း၏ ထက်ဝက် ဖြစ်သော ၃၃၀ မီဂါဝပ်ကို ရန်ကုန်မြို့တွင် ဖြန့်ဖြူး ပေးလျက် ရှိပါသည်။ သို့သော် ရန်ကုန်မြို့၏ လျှပ်စစ် လိုအပ်ချက်မှာ ၆၆၀ မီဂါဝပ် ဖြစ်သဖြင့် လျှပ်စစ် ဓါတ်အား ပြတ်တောက် လျော့ကျမှုများ ရှိနေခြင်း ဖြစ်ကြောင်း သတင်း ဖော်ပြချက် များအရ သိရှိရပါသည်။