Pages

Subscribe

Saturday 5 June 2010

အာရှလုံခြုံရေး ညီလာခံ မြန်မာ ဒုကာကွယ်ရေး ၀န်ကြီး တက်ရောက်ဖို့ ပျက်ကွက်

စင်ကာပူနိုင်ငံမှာ သောကြာနေ့ကစပြီး ကျင်းပနေတဲ့ ရှန်ဂရီလာ ဒိုင်ယာလော့ခ် လို့ လူသိများတဲ့ နိုင်ငံတကာ လုံခြုံရေးဆိုင်ရာ ဆွေးနွေးပွဲမှာ တောင်ကိုရီးယားနဲ့ မြောက်ကိုရီးယားနိုင်ငံအကြား ဖြစ်နေတဲ့ ပဋိပက္ခအပြင် မြောက်ကိုရီးယားနဲ့ ဆက်နွယ်နေတဲ့ မြန်မာစစ်အစိုးရ ရဲ့ အခြေအနေတွေကိုပါ ထည့်သွင်းပြောဆိုလာကြဖွယ် ရှိတယ်လို့ ခန့်မှန်းနေကြပါတယ်။ ဒါပေမဲ့လဲ မြန်မာစစ်အစိုးရ ဘက်က ကိုယ်စားလှယ်ခေါင်းဆောင်ကတော့ ဒီဆွေးနွေးပွဲကို တက်ရောက်လာခဲ့ခြင်း မရှိဘူးလို့ ဆွေးနွေးပွဲမှာရှိနေတဲ့ နိုင်ငံတကာ မဟာဗျူဟာနဲ့ လုံခြုံရေး သုတေသန ပညာရှင် ဒေါက်တာ မောင်ဇာနည်က ဗွီအိုအေကို ပြောပါတယ်။ ဦးသန်းလွင်ထွန်းက ဒေါက်တာဇာနည်ကို ဆက်သွယ်မေးမြန်းထားတာပါ။

ရှန်ဂရီလာ ဒိုင်ယာလော့ ဆွေးနွေးပွဲရဲ့အကြောင်းကို ဒေါက်တာ ဇာနည်က ပထမဆုံး ခုလို ရှင်းပြပါတယ်။

“အဓိကကတော့ ကျနော်တို့ အာရှပစိဖိတ်ဒေသမှာ သူတို့ နိုင်ငံတွေရဲ့ လုံခြုံရေး၊ နောက်တခါ WMD လို့ခေါ်တဲ့ Weapons of Mass Destruction၊ ဒီ လူသားတွေကို ထောင် သိန်းနဲ့သန်းနဲ့ချီပြီး သေတဲ့ နျူကလီးယားလို လက်နက်မျိုး၊ နောက်တခါ biological weapons တွေ၊ အဲဒီဟာမျိုး လက်နက်တွေ ထုတ်နိုင်တဲ့ နည်းပညာတွေ၊ အဲဒီလက်နက် ထုတ်နိုင်တဲ့ အစိတ်အပိုင်းတွေ ဆိုးတဲ့အစိုးရတွေ လက်ထဲ မရောက်ဖို့၊ နောက်တခါကျတော့ တခြား အကြမ်းဖက်အဖွဲ့အစည်းတွေရဲ့ လက်ထဲ မရောက်ဖို့။ ဘယ်လိုပြောရမလဲဗျာ၊ ကျနော်တို့ 9/11 နယူးယောက်မှာ လေယာဉ်ပျံနဲ့ attack လုပ်တဲ့ကိစ္စ နောက်ပိုင်းမှာစပြီးတော့ နိုင်ငံတွေ security ကိစ္စ၊ အပြည်ပြည်ဆိုင်ရာ လုံခြုံရေးကိစ္စကို ညှိနှိုင်းဖလှယ်ဖို့ သူတို့ စလုပ်ကြတာ။”

အခု ဒီဆွေးနွေးပွဲနဲ့ အချိန်ကိုက်ပဲပေါ့နော်။ တချိန်တည်းမှာ မြန်မာပြည်နဲ့ မြောက်ကိုရီးယား လက်နက်နည်းပညာ ဖလှယ်နေတဲ့ကိစ္စတွေ၊ ပူးပေါင်းဆောင်ရွက်တဲ့ ကိစ္စတွေကလဲ သတင်းတွေ ထွက်ပေါ်နေတော့ ဒီအစည်းအဝေးပွဲမှာ မြန်မာနိုင်ငံဘက်ကရော၊ မြန်မာစစ်တပ်ဘက်ကရော လာရောက်ပြီးတော့ တက်ရောက်တဲ့သူတွေ တွေ့ခဲ့လားခင်ဗျ။ -

“ဒီနှစ်တော့ အစိုးရရဲ့ ကိုယ်စားလှယ် ဆိုပြီးတော့ ဗိုလ်ချုပ်အေးမြင့် ရယ်၊ နောက်တခါ ဒီနိုင်ငံမှာရှိတဲ့ နအဖ သံအမတ်ကြီး ဦးဝင်းမြင့်၊ အရင်တုန်းက ဗိုလ်မှူးချုပ်ဟောင်းပေါ့လေ။ သူတို့နှစ်ယောက် နံမည်တော့ တွေ့တယ်။ စစ်တပ်အစိုးရနဲ့ပတ်သက်လို့ရှိရင် သူတို့နှစ်ယောက် နံမည်တော့ တွေ့တယ်။ ဒါပေမဲ့ ကိုယ့်မြန်မာအချင်းချင်း ဆိုတော့ ဦးဝင်းမြင့် နဲ့ ကျနော်နဲ့တွေ့တော့ နုတ်ဆက်လိုက်ပြီးတော့ မေးကြည့်တာ။ အဲန်ကယ်လ် နေကောင်းလား မေးပြီးတော့ ဗိုလ်ချုပ် အေးမြင့် နံမည်တွေ့တယ်၊ လာမှာလား၊ ကျနော် မတွေ့လို့လို့ မေးတော့ သူက မလာဘူးတဲ့။ လာခါနီးလေးမှ ခရီးစဉ်ကို ဖျက်လိုက်တယ်တဲ့။ ဆိုတော့ ကျနော် ထင်တာက အယ်လ်ဂျာဇီးယား (Aljazeera) က ထုတ်လိုက်တဲ့ မြန်မာပြည်နဲ့ မြောက်ကိုရီးယားနဲ့ ပူးပေါင်းပြီးတော့ ဒုံးကျည်လုပ်တဲ့ကိစ္စရယ်၊ နောက်ပြီးတော့ နျူကလီးယား လက်နက်ကို ထုတ်ဖို့ မြန်မာစစ်တပ်က ထုတ်ဖို့ အကြီးအကျယ် ကြံနေတယ်၊ အဲဒီဟာက သတင်းပေါက်သွားတဲ့အခါမှာ ကျနော်ထင်တယ် ဗိုလ်ချုပ် အေးမြင့်က ဒီမှာလာမယ်ဆိုရင် သူ့ကို ၀ိုင်းပြီးတော့ မေးကြပြုကြမှာ၊ ဘယ်လိုပြောမလဲ အဲဒီလို အခြေအနေရှိလို့ မလာဘူးလို့ ကျနော် ထင်တယ်။”

လောလောဆယ်က ဒီနေ့ဖွင့်ပွဲအခမ်းအနားမှာက ထူးခြားတဲ့အကြောင်းအရာတွေ ဘာတွေ ရှိသေးလဲ။ ကျနော်တို့ သိသလောက်တော့ တောင်ကိုရီးယား သမ္မတကနေ တက်ပြီးတော့ မိန့်ခွန်းပြောတယ်။ တောင်ကိုရီးယားနဲ့ မြောက်ကိုရီးယား ကိစ္စတွေကို ပိုပြီးတော့ အလေးပေးပြောသွားတယ်လို့ ကြားရပါတယ်။ မြန်မာနိုင်ငံနဲ့ မြောက်ကိုရီးယား ကိစ္စတွေကိုရော တစုံတရာ ထည့်ပြီးတော့ ပြောသွားတာတွေ ရှိလား။ -

“အဲဒီကိစ္စကိုတော့ သူက လုံးဝ ထည့်မပြောသွားဘူး။ သူက ဒီ အာရှတိုက်မှာ အာရှတိုက်ရဲ့ လုံခြုံရေးကို အဓိကပေါ့လေ စိုးရိမ်မှုဖြစ်စေတာကတော့ ဒါ မြောက်ကိုရီးယားဖြစ်တယ်။ မြောက်ကိုရီးယားက တောင်ကိုရီးယားရဲ့ ရန်သူလို တဖက်နဲ့တဖက် လောလောဆယ် သတ်မှတ်ထားပြီးတော့ တော်တော်လေး ပြင်းပြင်းထန်ထန် စကားစစ်ထိုးနေတဲ့ အနေအထားမှာ ရောက်လာတယ်လေ။ အဲဒီတော့ မြန်မာပြည်ကိစ္စမှာတော့ သူက မြန်မာပြည်နဲ့ပတ်သက်လို့ ၁၉၈၃ ခုနှစ်နဲ့ မဆလ ဦးနေ၀င်းခေတ်က သမ္မတ ချန်ဒူးဝမ် လာတဲ့အချိန်မှာ အာဇာနည်ကုန်းမှာ ဗုံးခွဲပြီးတော့ တောင်ကိုရီးယား ခေါင်းဆောင် ၁၇ ယောက်လောက် ဒုတိယ ၀န်ကြီးချုပ် အပါအ၀င် သူတို့ အသတ်ခံလိုက်ရတယ်။ အဲဒီကိစ္စကို သူက ထည့်ပြောသွားတယ်။ အဲဒီကိစ္စကစပြီးတော့ ၁၉၈၃ ခုနှစ်ကစပြီးတော့ မြောက်ကိုရီးယားက တောင်ကိုရီးယား နိုင်ငံကို ရန်လိုပြီးတော့ အမျိုးမျိုး လုပ်လာတာပေါ့လေ။ အဲဒါတွေ ပြောတယ်။ တခြား ပြောသွားတာကတော့ နျူကလီးယား လက်နက်တွေ အကြမ်းဖက်အဖွဲ့တွေလက်ထဲ မရောက်ဖို့ဆိုတာ အဓိက တချက်ပေါ့။”

ဒီနေရာမှာ ထူးဆန်းနေတာတခုက မြောက်ကိုရီးယားနိုင်ငံက နိုင်ငံတကာရဲ့ စောင့်ကြည့်နေတဲ့ကိစ္စတွေ၊ စွပ်စွဲနေတဲ့ကိစ္စတွေအရဆိုရင် မြန်မာနိုင်ငံကို နျူကလီးယား လက်နက် ထုတ်လုပ်ရေးကိစ္စ၊ နျူကလီးယား အရေးကိစ္စတွေမှာ စစ်ရေးကိစ္စတွေမှာ ကူညီနေတယ်။ တောင်ကိုရီးယား နိုင်ငံကကျတော့ မြန်မာစစ်အစိုးရနဲ့ စီးပွားရေး ပူးပေါင်းဆောင်ရွက်မှုတွေ လုပ်နေတယ်၊ မြန်မာနိုင်ငံမှာ ရင်းနှီးမြှုပ်နှံမှုတွေ ဖြစ်နေတော့ ဒီ ကိုရီးယား နှစ်နိုင်ငံစလုံးနဲ့ မြန်မာနိုင်ငံနဲ့ပတ်သက်နေမှုက စိတ်ဝင်စားစရာ ဖြစ်မနေဘူးလား။ -

“ဒီလိုဗျ။ တောင်ကိုရီးယားက မြန်မာပြည်မှာ သူက သဘာဝဓာတ်ငွေ့တွေ ၀ယ်ပြီးတော့ ဒါမှမဟုတ်ရင် သဘာဝဓာတ်ငွေ့မှာပဲ ရင်းနှီး မြှုပ်နှံမှုမှာ အမြတ်ထုတ်ဖို့ ကြံနေတာမဟုတ်ဘူး။ သူက ၁၉၉၃-၉၄ ခုနှစ်လောက် ကတည်းက တောင်ကိုရီးယား နိုင်ငံမှာ အထူးသဖြင့် ဒေ၀ူး ကုမ္ပဏီက ဒီမှာလာပြီးတော့ လက်နက်ငယ်နဲ့ လက်နက်လတ်တွေ ထုတ်တာကို ကျနော်တို့ ကပစ မှာ အကြီးအကျယ် မြန်မာ့တပ်မတော်ရဲ့ လက်နက်ထုတ်ယူ လုပ်ငန်းတွေကို သူတို့ကိုယ်တိုင်က ကြပ်ကြပ်မတ်မတ်နဲ့ လာပြီးတော့ လုပ်ပေးနေတာပဲ။ ဒါကြောင့်မိုလို့လဲ ကျနော်တို့ ရေနံ သဘာဝဓာတ်ငွေ့ ကိစ္စတွေမှာ ဒေ၀ူးက တော်တော်ကို အကျိုးအမြတ်လဲ ရနေတယ်။ ဒါပေမဲ့ စိတ်ဝင်စားစရာ ကောင်းတာက ဒီ ဒေ၀ူးက ရလာတဲ့ပိုက်ဆံတွေက ဒီအထဲမှာ ရင်းနှီးမြှုပ်နှံတဲ့ ပိုက်ဆံတွေက မြောက်ကိုရီးယားနဲ့ ပတ်သက်ပြီးတော့ လက်နက်ထုတ်လုပ်ရေး လုပ်ငန်းတွေ၊ နျူကလီးယားတို့ ဒုံးကျည်တို့ အဲဒီအထဲမှာ ပိုက်ဆံတွေဝင်သွားတယ်။ ဒါပေမဲ့ တောင်ကိုရီးယားနဲ့ မြောက်ကိုရီးယားက ကိုရီးယားချင်း ဖြစ်ပေမဲ့ စစ်ဖြစ်မယ့်အနေအထားမျိုး၊ အဲဒီ အနေအထားမှာ ကျနော်တို့နိုင်ငံမှာ ဒီ နှစ်နိုင်ငံစလုံးပေါ့လေ ၀င်ပြီးတော့ အလွန်ဆိုးရွားတဲ့ တပ်မတော် အစိုးရကို ငွေရေးကြေးရေး အရရော နည်းပညာအရရော ကူညီနေတယ်။ အဲဒီကိစ္စကတော့ အနှေးနဲ့အမြန် ကမ္ဘာအစိုးရတွေ အနေနဲ့ လူသားပြုန်းတီးမယ့် လက်နက်တွေ မပြန့်ပွားရေး ဆိုတဲ့ အဖွဲ့အစည်းတွေ သိလာမယ့်အနေအထားမှာ ရှိတယ်လို့ ကျနော် ထင်တယ်။”

ရှန်ဂရီလာ ဒိုင်ယာလော့ခ် ဒုတိယနေ့ ဆွေးနွေးပွဲမှာ အမေရိကန် ကာကွယ်ရေးဝန်ကြီး တက်ရောက်ပြီး မြန်မာ့အရေး ဆွေးနွေးမှုမှာလဲ ပါဝင်လာဖွယ်ရှိတယ်လို့ ဒေါက်တာ ဇာနည်က ပြောသွားပါတယ်။

ထိုင်းနိုင်ငံရှိ လူကုန်ကူးခံရသူ အများစုမှာ မြန်မာများဖြစ်

ချင်းမိုင် (မဇ္ဈိမ) ။ ။ ထိုင်းနိုင်ငံရှိ လူကုန်ကူးခံရသူ အများဆုံးမှာ မြန်မာလုပ်သားများဖြစ်ပြီး ထိုင်းနိုင်ငံ၏ တနေ့တခြား ကြီးထွားကျယ်ပြန့်လာသော ငါးဖမ်းလုပ်ငန်းတွင် အလုပ်သမားများ ပြတ်လပ်နေခြင်းကလည်း လူကုန်ကူးမှု ပြဿနာကို ပိုမိုဆိုးရွားစေခဲ့သည်ဟု လူ့အခွင့်အရေး အုပ်စုများက ပြောဆိုကြသည်။

အမေရိကန် ပြည်ထောင်စု၏ သတ်မှတ်ချက်အရ ထိုင်းနိုင်ငံတွင် လူကုန်ကူးခံရမှု အခြေအနေများသည် စိုးရိမ်စရာ ဖြစ်နေပြီး ပြီးခဲ့သည့် နှစ်အနည်းငယ်အတွင်း ပိုမိုများပြားလာခဲ့သည်ဟု အလုပ်သမား အခွင့်အရေး မြှင့်တင်ရေးကွန်ယက် ဒါရိုက်တာ Sompong Sakaew က မဇ္ဈိမကို ပြောသည်။ ဤ NGO အဖွဲ့အစည်းသည် ဘန်ကောက်မြို့ တောင်ဘက်ရှိ ထိုင်းနိုင်ငံ၏ ပင်လယ်ကွေ့ ငါးဖမ်းလုပ်ငန်းနှင့် ဆားထုတ်လုပ်မှု လုပ်ငန်းများ အဓိက လုပ်ကိုင်ရာ စမတ်ဆခွန် Samut Sakhon တွင် အခြေစိုက်သည်။
“အကြီးမားဆုံး ပြဿနာကတော့ ငါးဖမ်းလုပ်ငန်းတွေမှာပါ။ မြန်မာအလုပ်သမားတွေဟာ အလှည့်ဖြားခံရပြီးတော့ အခက်အခဲ အပင်ပန်းဆုံးနဲ့ အကြာရှည်ဆုံး အလုပ်တွေကို အတင်းအကျပ် လုပ်ခိုင်းတာ ခံနေရပါတယ်” ဟု Sompong Sakaew က ပြောသည်။

မကြာသေးခင်က ခန့်မှန်းချက်များအရ ထိုင်းနိုင်ငံရှိ ရွှေ့ပြောင်းအလုပ်သမား အရေအတွက်မှာ ၃ သန်းကျော် ရှိနေပြီး ၎င်းတို့အနက် တရားဝင် မှတ်ပုံတင်ထားသော အလုပ်သမား အရေအတွက်မှာ ၇ သိန်းခန့်သာ ရှိသည်။ ရွှေ့ပြောင်းအလုပ်သမား အများစုမှာ မြန်မာနိုင်ငံမှ ဖြစ်ကြသည်။

ထိုင်းနိုင်ငံရှိ လုပ်ငန်းရှင်အများစုမှာ အလုပ်သမားများအား တရားဝင်ခန့်ရန် စိတ်ပါဝင်စားမှု လျော့နည်းနေကြပြီး လုပ်ငန်းရှင် အများစုမှာ ဥပဒေကို ဆန့်ကျင်ကာ ဈေးပေါသော တရားမဝင် အလုပ်သမားများကိုသာ ခန့်ထားလေ့ရှိကြသည်။

“ထိုင်းနိုင်ငံရဲ့ ရေထွက်ပစ္စည်း ထုတ်လုပ်မှု လုပ်ငန်းမှာ လူကုန်ကူးမှု ပြဿနာတွေ ရှိနေတာကို မဖြေရှင်းနိုင်ခဲ့ရင် ထိုင်းနိုင်ငံရဲ့ ပင်လယ်အစားအစာတွေဟာ နိုင်ငံတကာရဲ့ သပိတ်မှောက်မှု ခံရစရာ ရှိပါတယ်” ဟု Sompong Sakaew က သတိပေးခဲ့သည်။

ဘန်ကောက်မြို့ရှိ လူကုန်ကူးမှု ဆန့်ကျင်တိုက်ဖျက်ရေး ဖောင်ဒေးရှင်း၏ အဆိုအရ ယခုနှစ်တွင် လူကုန်ကူးခံရသည့် အမှုပေါင်း ၁၃၈ ခုအထိ ဖောင်ဒေးရှင်းသို့ တိုင်ကြားခဲ့ပြီး ထိုနှုန်းထားသည် ပြီးခဲ့သည့်နှစ်ကထက် ၃ ဆမျှ မြင့်တက်လာခဲ့ခြင်း ဖြစ်သည်။ ထိုသတင်းထုတ်ပြန်ချက်အား ဇွန်လ ၃ ရက်နေ့က ဘန်ကောက်မြို့တွင် ပြုလုပ်ခဲ့သည့် လူကုန်ကူးမှု တိုက်ဖျက်ရေးနေ့ အကြို သတင်းစာ ရှင်းလင်းပွဲတွင် ထုတ်ပြန်ခဲ့ခြင်း ဖြစ်သည်။

ထိုင်းနိုင်ငံ မြောက်ပိုင်းတွင်လည်း လူကုန်ကူးမှု အခြေအနေများသည် ဆိုးရွားလျက်ပင် ရှိနေသည်။ မြန်မာနိုင်ငံ မဲဆောက်မြို့မှ မြန်မာအမျိုးသား လူငယ်များသည် လိမ်လည်လှည့်ဖြားခံရကာ ချင်းမိုင်မြို့တွင် ရိုတီ ရောင်းနေရသည့် အဖြစ်မျိုး ရှိနေပြီး လူကုန်ကူးမှု ကျူးလွန်သူများသည် မြန်မာကလေးငယ်များအား ဖြားယောင်းကာ ထိုင်းနိုင်ငံတွင် အလုပ်လုပ်ခိုင်းရုံမျှမက နောက်ပိုင်းတွင် ထိုကလေးငယ်များအား ထိုင်းနိုင်ငံမြောက်ပိုင်းရှိ မြို့များတွင် ပန်းများ လှည့်လည်ရောင်းချခိုင်းသည်လည်း ရှိနေသည်ဟု ချင်းမိုင်မြို့ရှိ ထိုင်းနိုင်ငံမြောက်ပိုင်း လူကုန်ကူးမှု တိုက်ဖျက်ရေး ပူးပေါင်းဆောင်ရွက်မှု အဖွဲ့၏ မန်နေဂျာ Duan Wongsa က ပြောကြားခဲ့သည်။

“သိပ်တောင် မကြာသေးဘူး၊ လူကုန်ကူးတဲ့သူတွေက Tak ပြည်နယ်က နယ်စပ်တလျှောက်မှာရှိတဲ့ ဒုက္ခသည် စခန်းတွေက ကလေးငယ်တွေကို ထိုင်းနိုင်ငံအတွင်းပိုင်းက ပြည်နယ်တွေကို ပို့ပြီးတော့ အလုပ်လုပ်ခိုင်းကြတယ်။ ကလေးတွေကို အရမ်းနည်းတဲ့ မဖြစ်စလောက် လစာလေးတွေနဲ့ အိမ်ဖော်လုပ်ခိုင်းကြတယ်” ဟု သူမက ဆက်ပြောခဲ့သည်။

လူကုန်ကူးမှု တိုက်ဖျက်ရေး ကြေးမုံ ဖောင်ဒေးရှင်းမှ အကြီးအကဲ Ekkalak Lumchomkae က ထိုင်းနိုင်ငံမှာ လူကုန်ကူးမှု အခြေအနေသည် စိုးရိမ်စရာကောင်းသည့် အကျပ်အတည်း အခြေအနေကို ဆိုက်ရောက်နေပြီး အဆိုးဆုံးမှာ ငါးဖမ်းလုပ်ငန်း နယ်ပယ်တွင် ဖြစ်သည်ဟု မဇ္ဈိမကို ပြောခဲ့သည်။

GreenFacts.org ဝက်ဘ်ဆိုဒ်က ၂၀၀၆ ခုနှစ်တွင် ထိုင်းနိုင်ငံအား ငါးနှင့် ရေထွက်ကုန် ပစ္စည်းများ တတိယ အများဆုံး တင်ပို့သော နိုင်ငံအဖြစ် သတ်မှတ်ခဲ့သည်။ သို့သော် ထိုင်းနိုင်ငံ၏ ငါးဖမ်းလုပ်ငန်းတွင် အလုပ်သမားများ ပြတ်လပ်လျက် ရှိနေပြီး ခန့်မှန်းချက်တခုအရ အလုပ်သမား တသောင်းကျော် လိုအပ်လျက် ရှိနေသည်။ ထိုကဲ့သို့ အလုပ်သမား ပြတ်လပ်ရှားပါးမှုသည် လူကုန်ကူးသူများအတွက် ဈေးချိုချိုနှင့် အလုပ်သမားများ ရှာဖွေပေးစရာ လုပ်ကွက်တခုကို ဖြစ်ထွန်းစေခဲ့သည်။

“ကွင်းဆင်းလေ့လာမှုတွေအရ လူကုန်ကူးသူတွေရဲ့ နောက်မှာ နိုင်ငံရေးသမားတချို့နဲ့ အရာရှိတချို့ရှိနေပြီး လူကုန်ကူးသူတွေကို အကာအကွယ်ပေးနေပါတယ်။ အဲဒီတော့ ဥပဒေတွေဟာ ထိရောက်မှုမရှိ ဖြစ်ကုန်ပြီး အရာရှိတွေကလည်း ဥပဒေကို လျစ်လျူရှုနေကြပါတယ်” ဟု Ekkalak က ဆိုခဲ့သည်။

လူကုန်ကူးခံရသူများ လုပ်ကိုင်နေရသည့် အခြားလုပ်ငန်းများမှာ ပြည့်တန်ဆာလုပ်ငန်း၊ တောင်းစားသည့် လုပ်ငန်းနှင့် ပန်းရောင်းသည့် လုပ်ငန်းများဖြစ်ပြီး အခြေအနေများမှာ ၂၀၀၈ နှင့် ၂၀၀၉ ခုနှစ်များက ကဲ့သို့ပင် တိုးတက်မှု မရှိသေးဟု ကြေးမုံ ဖောင်ဒေးရှင်း၏ သတင်းထုတ်ပြန်ချက်တွင် ပါရှိသည်။

ထို့ပြင် မြန်မာအလုပ်သမားများက ထိုင်းနိုင်ငံတွင် အလုပ်လုပ်ခွင့် ရရန်အတွက် လူပွဲစားများသို့ ပေးရသည့် ငွေကြေးပမာဏမှာလည်း ပိုများလာပြီး မကြာသေးခင်က ပေါက်ဈေးအရဆိုလျှင် ဘတ် ၂၀၀၀၀ (အမေရိကန်ဒေါ်လာ ၆၀၀ ခန့်) မှ ဘတ် ၂၅၀၀၀ အထိ ရှိနေပြီး ပြီးခဲ့သည့်နှစ်က လူပွဲစားများ တောင်းဆိုသည့်နှုန်းထက် ၂ ဆနီးပါး မြင့်တက်နေသည်။ အလုပ်သမား အများစုမှာ ထိုငွေကို ပြန်ဆပ်နိုင်ရေးအတွက် အနည်းဆုံး တနှစ်ခန့် ယူရလေ့ရှိသည်ဟု Ekkalak က ပြောသည်။

Ekkalak က ဆက်လက်ပြောရာတွင် ထိုင်းရဲများသည် သံသယရှိသော စက်ရုံများအား အလစ်ဝင်ရောက် စစ်ဆေးခြင်းအားဖြင့် မြန်မာလူကုန်ကူးသူ အနည်းစုကိုသာ ဖမ်းဆီးနိုင်ခဲ့ပြီး နောက်ကွယ်မှ ကြိုးကိုင်နေသူများကိုမူ ဖမ်းဆီးနိုင်ခြင်း မရှိဟု ပြောခဲ့သည်။ “ဒေသတွင်းက ရဲတွေဟာ အဓိက ကျသူတွေကို ကျတော့ ၂၀၀၈ ခုနှစ် လူကုန်ကူးမှု တိုက်ဖျက်ရေးအတိုင်း အရေးယူဖို့ ဝန်လေးနေကြပြီးတော့ သိပ်အဓိက မကျတဲ့ လူတွေကိုပဲ အရေးယူနေကြပါတယ်” ဟု ပြောခဲ့သည်။

ထိုဖောင်ဒေးရှင်းမှ လူကုန်ကူးမှု ပြဿနာ ဆိုးဆိုးရွားရွားဖြစ်နေသော ပင်လယ်နှင့်ထိစပ်နေသည့် Songkhla၊ Chonburi၊ Samut Sakhon နှင့် Samut Prakan ပြည်နယ်များအား နာမည်ပျက်စာရင်းထဲသို့ ထည့်သွင်းခဲ့သည်။

မဲဆောက်မြို့မှ ၁၄ နှစ် အရွယ်ရှိ မူဆလင် ကလေးမလေး တဦးသည် ဘန်ကောက်မြို့တွင် ပန်းလှည့်လည်ရောင်းချရန် ဖြားယောင်းခြင်း ခံခဲ့ရပြီး သူမ အလုပ်လုပ်ခဲ့သည့် ၂ နှစ်စာအတွက် သူမ၏ အလုပ်ရှင်ထံမှ လခ မရခဲ့ဟု ပြောသည်။

“သူတို့က အမေ့ကို သမီးရဲ့ လုပ်အားခတွေ ပေးမယ်လို့ ပြောတယ်။ ဒါပေမဲ့ အမေလည်း တကယ် မရဘူး။ သမီး ပန်းရောင်းလို့ ပိုက်ဆံသိပ်မရတဲ့ အခါမျိုးဆို ခေါင်းကိုလည်း ရိုက်တယ်” ဟု ဆယ်ကျော်သက်အရွယ် ကလေးမလေးက ပြောခဲ့သည်။

သူမသည် အိမ်နီးချင်းများ အကူအညီဖြင့် အဓမ္မခိုင်းစေသူ အလုပ်ရှင် လက်ထဲမှ ထွက်ပြေးလွတ်မြောက်ခဲ့ပြီး မဲဆောက်မြို့သို့ ပြန်လာခဲ့သည်။ မြန်မာနိုင်ငံနှင့် နယ်စပ် မဲဆောက်မြို့၊ ထိုင်းနိုင်ငံ အနောက်တောင် ကမ်းရိုးတန်းရှိ နယ်စပ် ရနောင်းမြို့နှင့် မြောက်ပိုင်းရှိ ချင်းရိုင်ဒေသ တို့သည် လူကုန်ကူးသူများ ကျက်စားသော နေရာများ ဖြစ်ကြသည်။

ထိုင်းနိုင်ငံ လူမှုဖွံ့ဖြိုးရေးနှင့် လုံခြုံရေးဝန်ကြီး Issara Somchai က ဘန်ကောက်မြို့တွင် ပြုလုပ်ခဲ့သည် လူကုန်ကူးမှု တိုက်ဖျက်ရေး ကင်ပိန်းဖွင့်ပွဲတွင် လူကုန်ကူးမှုများသည် ရှုပ်ထွေးသော အနေအထားများ ဖြစ်လာနေသည်ဟု ပြောခဲ့သည်။

လူကုန်ကူးမှု ကွန်ယက်များသည် ကလေးငယ်များနှင့် လူငယ်များ၏ ပိုမိုတိုးတက်လိုသော ဘဝကို ရရှိလိုသည့် စိတ်ဆန္ဒ အခြေအနေကို အသုံးချ မက်လုံးပေးကာ ၎င်းတို့အား အန္တရာယ်ရှိသော အခြေအနေသို့ တွန်းပို့လျက်ရှိနေသည်ဟု ထိုင်းနိုင်ငံ ပြည်သူ့ဆက်ဆံရေးဌာန ဝက်ဘ်ဆိုဒ်၏ သောကြာနေ့က ထုတ်ပြန်ချက်အရ သိရသည်။

ထိုင်းနိုင်ငံ၏ ပထမဆုံးသော လူကုန်ကူးမှု တိုက်ဖျက်ရေး ဥပဒေသည် ၂၀၀၈ ခုနှစ် ဇွန်လတွင် စတင်ချမှတ်ခဲ့ကာ တစစ ကြီးထွားလာနေသည့် ပြဿနာကို ဖြေရှင်းရန် ရည်ရွယ်ခဲ့သည်။ ထိုဥပဒေအရ တရားမဝင် အလုပ်ခန့်ထားမှု၊ တရားမဝင် လူကုန်ကူး ခေါ်ဆောင်သွားမှု၊ လူပွဲစားများမှ အလုပ်သမားများအား တရားမဝင် လွှဲပြောင်းရောင်းချမှု၊ ခြိမ်းခြောက်ကာ အလုပ်ခိုင်းစေမှု၊ ခေါင်းပုံဖြတ်ရန် ရည်ရွယ်ချက်ဖြင့် အလုပ်အတင်းအကျပ် ခိုင်းစေမှု စသည့် လူကုန်ကူးမှု ပုံစံမျိုးစုံအား တားမြစ်ထားသည်။

ထိုဥပဒေအရ လူကုန်ကူးခံရသူများအား ပြည့်တန်ဆာ လုပ်ငန်းများတွင် ခိုင်းစေခြင်း၊ အပြာစာအုပ် အပြာဗီဒီယို စသည့် ရာဂစိတ် ဖြစ်စေရန် ရည်ရွယ်သည့် အရာများ ဖြန့်ချိရန်အတွက် လူကုန်ကူးခံရသူ အမျိုးသမီးများအား အသုံးချခြင်း၊ လိင်ပိုင်းဆိုင်ရာ အမြတ်ထုတ်သော လုပ်ငန်းများတွင် အသုံးချခြင်း၊ ကျွန်ကဲ့သို့ ခိုင်းစေခြင်း၊ အတင်းအကျပ် တောင်းစားခိုင်းကာ တောင်း၍ရသည့် ပိုက်ဆံများအား ခေါင်းပုံဖြတ်ခြင်း၊ ကိုယ်တွင်း အင်္ဂါအစိတ်အပိုင်းများအား ရောင်းချရန်အတွက် အကျပ်ကိုင်ခြင်းတို့နှင့် လူကုန်ကူးကာ ခေါင်းပုံဖြတ် အမြတ်ထုတ်မှု ပုံစံမျိုးစုံအား တင်းကျပ်စွာ တားမြစ်ထားသည်။

သို့သော် လူအခွင့်အရေး လှုပ်ရှားသူများက ပြဿနာ ပြေလည်မှုသည် ဥပဒေပြဋ္ဌာန်းရုံနှင့် မလုံလောက်ဘဲ ထိုဥပဒေကို လိုက်နာအသုံးချကြမှသာလျှင် ပြဿနာများ လျော့နည်းသွားလိမ့်မည်ဟု ထောက်ပြခဲ့ကြသည်။ ဒေသဆိုင်ရာ ရဲများသည် လက်နက်များ ကိုင်ဆောင်ထားလေ့ရှိသည့် သို့မဟုတ် လူမှုရေး အရှိန်အဝါ သြဇာကြီးသည့် လူကုန်ကူးသူများအား ဖမ်းဆီးအရေးယူရန် စိတ်မပါဘဲ ဖြစ်နေကြကာ ဥပဒေမှ ပြဋ္ဌာန်းထားသလောက် အရေးယူမှုများ မပြုလုပ်ဘဲ အဖြစ်သဘောခန့်သာ ဆောင်ရွက်အရေးယူနေကြသည်ဟု လူ့အခွင့်အရေး လှုပ်ရှားသူများက ဆိုကြသည်။