သောက်သုံးရေအတွက် ရေလှူသည့် ကားတစီးကို ၀ိုင်းအုံနေကြသည့် ပဲခူးမြို့ တနေရာမှ ဒေသခံများ (ဓာတ်ပုံ - ဧရာဝတီ)
အထူးသဖြင့် ဧကရာဇ်၊ ကျိုက်လတ်၊ နောင်ပတ္တရာ၊ နောင်ကြမ်း၊ ဒေးစွန်ပါ၊ ရှမ်းရွာကြီး၊ မယင်းရွာမ၊ ကံကြီးကုန်း စသည့် ကျေးရွာများ အပါအ၀င် ရွာပေါင်း ၃၀ ခန့်တွင် သောက်သုံးရေ ပြတ်လပ်မှုများ ဖြစ်ပေါ် နေကြောင်း သိရသည်။
သောက်သုံးရေ ပြတ်လပ်ရသည့် အခြေခံ အကြောင်းရင်းမှာ မုတ်သုန် နောက်ကျ ခြင်းကြောင့် ဖြစ်ကြောင်း ထင်ရှားသည့် မိုးလေ၀သ ပညာရှင် ဦးထွန်းလွင်က ပြောသည်။
“အမှန်က ဒီအချိန်ဆိုရင် မွန်၊ တနင်္သာရီတို့ ဘက်မှာ မုတ်သုန် ၀င်ရတော့မှာ။ ဒီနှစ်တော့ အဲဒီဘက် တွေမှာလည်း ၀င်တာ မတွေ့ရသေးဘူး။ ဒါပေမယ့် လာမယ့် မေ ၂၀ ရက် ၀န်းကျင်မှာ ဧရာဝတီတိုင်း အတွင်း မုတ်သုန် ၀င်မယ့် အလားအလာ ရှိပါတယ်”ဟု မိုးလေ၀သနှင့် ဇလဗေဒ ညွှန်ကြားမှု ဦးစီးဌာန ညွှန်ကြားရေးမှူးချုပ် အဖြစ် တာဝန် ယူခဲ့ဖူးသူ ဦးထွန်းလွင်က ဧရာဝတီကို ပြောသည်။
သို့ရာတွင် ပစိဖိတ် သမုဒ္ဒရာ အတွင်း အပူလှိုင်း ရေစီးကြောင်း ဖြစ်စဉ်ကြောင့် လာမည့် ၂ လ၊ ၃ လ အထိ အပူရှိန် လွန်ကဲမှုနှင့် မိုးနည်းပါးမှုတို့ ဖြစ်နေဦးမည် ဟုလည်း သူက သုံးသပ်သည်။
ရာသီဥတုကြောင့် သောက်သုံးရေ အခက်အခဲနှင့် ကြုံတွေ့ နေရသော ကျေးရွာများကို ပဲခူးမြို့နယ်၊ ဘုရားကြီး မြို့သူ မြို့သားများက ကားများဖြင့် ရွာစဉ် လှည့်လည်ပြီး ရေလှူနေ ကြကြောင်း သိရသည်။
“ကားပိုင်တွေကို အကူအညီ တောင်းပြီး လှူနေတာပါ။ ကားဆိုတာက ရေတိုင်ကီ တင်ထားတဲ့ ထော်လာဂျီတွေပါ။ အခု လောလောဆယ် တရက်ကို ၁၅ စီးလောက်နဲ့ လှည့်လှူပါတယ်။ လုံလောက်မှုတော့ မရှိသေးပါဘူး”ဟု ဘုရားကြီးမြို့ခံ တဦးက ပြောသည်။
ရေလှူဒါန်းမှုကို တနင်္ဂနွေနေ့က စတင်ခဲ့ကြပြီး မီးသတ်ကားကို အသုံးပြုခဲ့ ကြသော်လည်း နောက်ပိုင်းတွင် မီးသတ်ကားကို အသုံးပြုခွင့် မရတော့ဟုလည်း သူက ဧရာဝတီကို ရှင်းပြသည်။
“ရေလှူတဲ့အဖွဲ့မှာ အမျိုးသား ဒီမိုကရေစီ အဖွဲ့ချုပ်က လူတွေပါတယ်၊ ဘာညာနဲ့ အတိုင်ခံရလို့ ဆိုပြီး မီးသတ်က နောက်ရက်တွေ မလိုက်ရဲ တော့ဘူး”ဟု သူက ဆက်ပြောသည်။
နာဂစ်ဒဏ် ခံခဲ့ရသည့် မြစ်ဝကျွန်းပေါ်နေ လူ ၂ သိန်း နီးပါး အတွက်လည်း သောက်သုံးရေ ရှားပါးမှု ကြုံနေရသည်ဟု ကုလသမဂ္ဂ ရန်ကုန်ရုံးက သတင်း ထုတ်ပြန် ထားသည်။
No comments:
Post a Comment