စစ်တွေမြို့တွင် ရွှေဝါရောင်တော်လှန်ရေးအတွင်း ခေါင်းဆောင်ခဲ့သူများကို ဓါတ်ပုံဖြင့်လိုက်၍ ဖမ်းဆီးနေ

မောင်သစ်အောင် (နိရဉ္စရာ) စစ်တွေမြို့တွင် ရဲနှင့် စစ်ထောက်လှမ်းရေးများက ရွှေဝါရောင်တော်လှန်ရေး ဦးဆောင်ခဲ့သူ များအား လိုက်လံရှာဖွေ ဖမ်းဆီးနေသဖြင့် အရေးအခင်းအတွင်း ဦးဆောင်ခဲ့သူ ရဟန်းတော်များ၊ ကျောင်းသားများနှင့် ပြည်သူများမှာ စစ်တွေမြို့ကတဆင့် တောလက်ကျေးရွာများသို့ ထွက်ပြေးတိမ်းရှောင်နေကြရကြောင်း သတင်းရရှိသည်။

ဒီဇင်္ဘလာ ၁၉ ရက်နေ့က စစ်တွေမြို့မှ ဘင်္ဂလာဒေခ်ျ့ နိုင်ငံသို့ ထွက်ပြေး တိမ်းရှောင်လာသူ စစ်တွေ တက္ကသိုလ်မှ ကျောင်းသားတဦးက နိရဉ္စရာသို့ ယခုကဲ့သို့ ပြောသည်။

“စစ်တပ်ကတော့ ရွှေဝါရောင်တော်လှန်ရေးမှာ ပါဝင်ခဲ့တဲ့သူတွေကို အေးအေးဆေးဆေးနဲ့ လိုက်ဖမ်းဆီးနေပါတယ်။ ကျနော်အပါအ၀င် ဆန္ဒပြခဲ့ကြခဲ့တဲ့သူတွေဆိုလို့ ရှိရင် ဘယ်သူမှ အိမ်မှာမနေပဲ ရှောင်နေကြပါတယ်၊ ကျနော်လည်း အစတော့ ဆန္ဒပြတဲ့ အထဲမှာ မပါဝင်ခဲ့ပါ၊ ဒါပေမဲ့ နောက်ပိုင်း မဖြစ်ဘူးဆိုပြီး အလံကိုင်ပြီး ရှေ့တန်းက လိုက်တော့ ဆန္ဒပြတာကို စစ်တပ်နဲ့ နီးစပ်တဲ့ ဓါတ်ပုံဆိုင်တဆိုင်က ဓါတ်ပုံရိုက်တယ်။ အခုက အဲဒီဓါတ်ပုံဆိုင်က တဆင့် ကျနော် ဓါတ်ပုံကို ထောက်လှမ်းရေးနဲ့ ရဲကရသွားတော့ ကျနော်ကို ဖမ်းမယ်ဆိုတာကို သိတော့ ဘင်္ဂလာကို ထွက်ပြေးလာရတာ ဖြစ်ပါတယ်။”

၎င်းအပြင် “ခုပိုဆိုးလာတာက ဒီဇင်္ဘာလ နောက်ဆုံးအပတ်နဲ့ ဇန္န၀ါရီ ၄ ရက်နေ့မှာ ဆက်ဆန္ဒပြမယ်ဆိုပြီး ပိုစတာတွေ၊ လက်ကမ်းကြော်ငြာတွေနဲ့ ကာတွန်းတွေကို ရေးဆွဲ ချိတ်ကပ်နေတော့ အာဏာပိုင်တွေက ပိုပြီးတော့ လုံခြုံရေးကို တင်းကျပ်လာသလို လူတွေကိုလည်းလိုက်လံမေးမြန်းမှုတွေ ရှာတာ ဖွေတာတွေ ပြုလုပ်လာတော့ ဘယ်သူမှ အိမ်မှာ မနေရဲဘဲ ဖြစ်လာပါတယ်။” ဟု သူက ဆက်လက် ပြောကြားသည်။

စစ်တွေမြို့တွင် အစိုးရ ဆန့်ကျင်ရေး စာများမှာ ဆက်လက်ပျံ့နှံ့ နေတုန်းဖြစ်သဖြင့် အာဏာပိုင်များက လုံခြုံရေးကို မရုတ်သိမ်းဝံ့ဘဲ ရှိနေပြီး အရေးကြီးသော နေရာများဖြစ်သည့် အတုလမာရဇိန်ဘုရားကြီး၊ ဦးရဲကျော်သူကျောင်း၊ လောကာနန္ဒာစေတီ၊ ထောင်ပတ်ပတ်လည်နဲ့ အာဂျိတ်တော် ကုန်းတော်များတွင် လုံထိန်း၊ ရဲနှင့် စစ်သားများကို ဆက်လက် ဖြန့်ကျက်ချထားကြောင်း သ်ိရှိရသည်။

စစ်တွေမြို့ပေါ် အခြေအနေမှာ မျက်မြင်ဆိုလျှင် အေးဆေးတည်ငြိမ်နေသည်ဟု ထင်မြင်ရသော်လည်း သတင်းပေးများ ထောက်လှမ်းရေးများနှင့် ကြံ့ဖွတ်များမှ နေရာတိုင်းတွင် အရပ်သားပုံစံမျိုးဖြင့် အခြေအနေကို စောင့်ကြည့် နေကြကြောင်း၊၎င်းအပြင် ရွှေဝါရောင် တော်လှန်ရေးထဲတွင် ပါဝင်သူများအား ဓါတ်ပုံ အထောက်အထားများနှင့် လိုက်လံရှာဖွေမှုများ ပြုလုပ်နေကြောင်း အဆိုပါ ကျောင်းသားက ပြောသည်။

နအဖ အာဏာပိုင်က အတင်းအဓမ္မ ပါဝင်ခိုင်းထားသော စွမ်းအားရှင်အဖွဲ့ထဲရှိ ကျောင်းသားလူငယ် တချို့ကိုလည်း စာရွက် စာတန်းဖြန့်ဝေမှုကြောင့် စစ်တပ်က စစ်ဆေးမေးမြန်းမှုများ စတင်လုပ်ဆောင်နေသဖြင့် တချို့ကျောင်းသားများမှာ ဘေးကျပ်နံကျပ် အခြေအေနသို့ ရောက်ရှိနေကြာင်း သိရှိရသည်။