ရောဂါ ကုစားခြင်း(သို့) Think Tank

ကျွန်တော် အတွင်းသတင်း တချို့အရ သိထားရတာတွေ ရှိပါသည်။ လူထုကို အကြောက်တရားတွေ ကြီးဆိုးအောင် လုပ်ပြီး တိုင်းပြည်အာဏာကို ချုပ်ကိုင်ဖို့ နည်းအမျိုးမျိုးနဲ့ ရှာကြံနေကြတဲ့ စစ်ဗိုလ်(အထူး သဖြင့် နအဖ အဖွဲ့ဝင်) တွေမှာ အကြောက်တရားတွေ ပြန်ပြီးကြီးဆိုးနေကြတယ် ဆိုတာပါပဲ။

လက်ရှိနအဖ အဖွဲ့ခေါင်းဆောင် သန်းရွှေရဲ့ သတင်းနဲ့ သူ့မိသားစုကတော့ ဘယ်လို ခံစားနေရသလဲဆိုတာ ကျွန်တော် သေခြာ မသိ၊ မကြားရပေမယ့် သူ့လက်အောက်က အတော်ကြီးမားတဲ့ ရာထူးကို ရယူ လုပ်ကိုင်နေကြသော အချို့ စစ်ခေါင်းဆောင်တွေမှာ လိပ်ပြာ မလုံတဲ့ ရောဂါ တမျိုးခံစားနေကြရပါတယ်။ အထူးသဖြင့် စက်တင်ဘာ သံဃာ့ လှုပ်ရှားမှုကို အကြမ်းဖက်မှု အပြီးမှာ ပိုဆိုးရွားလာကြပါတယ်။

အခုမှ ဒုက္ခရယ်လို့ ကိုယ့်ဘ၀ကို ကိုယ်ပြန်သနားနေကြရတာပါ။ သိန်းထောင်ချီတဲ့ အိမ်တွေ၊ ကားတွေ ဇိမ်ခံ ပစ္စည်းတွေ၊ စည်းစိမ် ဥစ္စာတွေ ခံစားနေကြရပေမယ့် ညဘက် အိပ်မရတာ ကိုယ့် အရိပ်ကိုယ် ရန်သူထင်နေရတဲ့ ဘ၀တွေကို ခံစားနေကြရပါတယ်။ အဆိုပါ အရာရှိကြီးတွေရဲ့ ကတော်တွေလည်း စိတ်ခြာက်ခြားတဲ့ ဘ၀တွေရဲ့သားကောင်တွေ ဖြစ်နေကြရပါပြီ။ ငိုကြွေးနေကြရတဲ့ ညတွေကို ဖြတ်သန်းခဲ့ရတာလည်း အကြိမ်ကြိမ်ပါပဲ။

အထက်ပါ အရာရှိကြီးတွေ ခံစားနေကြရတဲ့ စိတ်ဖိစီးမှု ဝေဒနာတွေကို ၃ ပိုင်းတွေ့မြင်နိုင်ပါတယ်။

1. ပြည်သူလူထုနဲ့ ဆက်ဆံတဲ့ အခါ
   
2. ကိုယ်လက်အောက် ငယ်သားများနှင့် ဆက်ဆံသည့်အခါ
3. အထက်အရာရှိနှင့် ဆက်ဆံရသည့်အခါ(အထူးသဖြင့် သန်းရွှေနှင့် တိုက်ရိုက်ဆက်ဆံခြင်း(သို့)သန်းရွှေ၏ တိုက်ရိုက် အမိန့်ကို နာခံ ဆက်ဆံရခြင်း)တွေမှာ စိတ်ဖိစီးမှုတွေကို ခံစားကြရပါတယ်။

သို့သော် ထို အချက် ၃ ခုမှ ခွဲ၍ မနေဘဲ တခုနှင့် တခု ဆက်တိုက် ဖြစ်ပေါ်၍နေပါသည်။

ပြည်သူလူထုကို ဆက်ဆံရသည့်အခါမျိုးတွင် မိမိကို ကြောက်နေကြရသော်လည်း(အမှန်က သူ့နောက်တွင် တစောက်ကန်း လုပ်တတ်သော စစ်တပ်နှင့် စစ်သားများကို ကြောက်သောကြောင့် ဖြစ်ပါသည်။) ရင်ထဲတွင် မိမိကို အမုန်းပွားနေသည်ကို သိသောကြောင့် စိတ်ပညာအရ မသိစိတ်တွင် စိတ်ကျဉ်းကြပ်နေကြရပါသည်။ ထို့အပြင် သူကိုယ်တိုင်တွင်လည်း ထို တစောက်ကန်းလုပ်တတ်သော စစ်သားများက မိမိအတွက် အန္တရာယ် ပြန်ဖြစ်နေသည်ကိုလည်း စိတ်၏ မသိစိတ်တွင် ကိုယ့်ဘာသာ ပြန်ကြောက်နေတတ်ပါသည်။ အဘယ်ကြောင့်ဆိုသော မိမိ အမှား အယွင်း တစ်ခုခုကို လုပ်မိလျှင်(တကယ်က တပ်ချုပ်ကြီး စိတ်ဆိုးအောင် လုပ်မိလျှင်) အဆိုပါ စစ်သားများက မိမိကို ဒုက္ခ ကောင်းကောင်း ပေးနိုင်မည် ဆိုတာ သိနေသောကြောင့် ဖြစ်ပါသည်။


မိမိက ပေးလိုက်သော တာဝန်ကို အောက်လက်ငယ်သားများက မည်သို့ အကောင်အထည် ဖေါ်ကြသနည်း၊ ထို အောက်လက်ငယ်သားများက မိမိပေးလိုက်သော တာဝန်များကို မိမိ နာမည်ခံ၍ လုပ်ချင်ရာ လုပ်ကြသောအခါ မိမိ အလုပ်ကို ထိခိုက်လာနိုင်သောကြောင့် ပူပန်ရပါသည်။
ဥပမာ .. အဆိုပါ အမိန့်ကို တာဝန်ယူ လုပ်ကိုင်သော သူက အမှားအယွင်း လုပ်မိလိုက်သောအခါ၊ အဆိုပါ အမှား အယွင်းသည် ပြင်ဆင်၍ မရနိုင်ဘဲ တပ်ချုပ်ကြီးမှ စိတ်ဆိုးသည်အထိ ထိခိုင်လာနိုင်သောအခါ .. ။

အထက်လူကြီးနှင့် ဆက်ဆံရသည့်အခါတွင်လည်း မိမိကို ပေးအပ်လာသည့် တာဝန်မှာ မဖြစ်နိုင်မှန်း၊ လူမုန်းပိုများလာနိုင်မှန်း၊ အန္တရာယ် ကြီးမှန်း(စစ်သား ဖြစ်သောကြောင့် စစ်တိုက်ရသော အန္တရာယ်ကို မမှုပေမယ့် ဘ၀နှင့် နာမည်နှင့် ရင်းရသော အန္တရာယ်မျိုးကိုတော့ နောက်တွန့်တတ်ကြပါသည်။) သိပေမယ့် ပြန်မပြောနိုင်သော၊ မပြောရဲသော စိတ်ဒုက္ခမျိုး ရင်ဆိုင်နေကြရပါသည်။ အကယ်၍ မနာခံပြန်လျှင်လည်း တစောက်ကန်းလုပ်တတ်သော စစ်သားများကို အထက်အရာရှိက အမိန့်ပေးပြီး မိမိကို လာဘ်စားမှုဖြင့် အရေးယူလာနိုင်ဖွယ်ရာ ရှိနေပါသည်။(ဥပမာ .. ဗိုလ်ချုပ် ခင်ညွန့်)

ထိုကဲ့သို့ စိတ်ဒုက္ခ ကြီးမားလှစွာ ခံစားနေကြရသော နအဖ စစ်ဗိုလ်ချုပ်တွေ အတွက်၊ ညဘက် ကောင်းကောင်း မအိပ်နိုင်တာ၊ ကိုယ့်အရိပ် ကိုယ်ပြန်လန့်နေတတ်တာ၊ ဗိုလ်ကတော်တွေ လူကွယ်ရာမှာ အကြိမ်ကြိမ် ငိုနေကြရတာဟာ ယနေ့ မြန်မာ့ တပ်မတော်ထဲက အရာရှိ ကြီးကြီးတွေရဲ့ မထူးဆန်းတဲ့ အဖြစ်တွေလို့ ပြောရရင် မမှားပါဘူး။

ကဲ .. ဒါတွေကို ဘယ်လို ဖြေရှင်းကြမလဲ ....
အဖြေကို ရှာရင် မြတ်စွာ ဘုရားဟောခဲ့သလို လောကမှာ ဖြစ်သမျှ အရာ အားလုံးရဲ့ အဓိက ပြဿနာတွေဟာ မိမိကိုယ်တွင်းမှာရှိနေပြီး၊ မိမိကိုယ် ကိုယ် ဖြေရှင်း အောင်နိုင်ရင် ပြဿနာတွေကို အောင်နိုင်သူ ဖြစ်ပါတယ်။ (မြတ်စွာဘုရားကတော့ အတွင်း အောင်ခြင်းလို့ ဆိုပါတယ်)

ဗိုလ်ချုပ်ကြီးတွေရဲ့ ပြဿနာတွေကို ၀ိုင်းကူပေးဖို့ ကျွန်တော် ဒီနေရာကနေ Think Tank လေး လုပ်ပြီး ဆွေးနွေးကြည့်တာပါ။ အဲဒီ ပြဿနာတွေဟာ လက်ရှိ ဖြစ်ပေါ်နေတဲ့ ပြဿနာအားလုံးရဲ့ အဖြေလို့ ဆိုရင်လည်း မမှားပါဘူး။

ကျွန်တော်တို့ နိုင်ငံနဲ့ ပြဿနာ အားလုံးရဲ့ အခြေခံဟာ စိတ်ဓါတ်ရေးရာနဲ့ တော်သက်ဆိုင်နေတာ တွေ့ရပါတယ်။ နောက်ပြီး နိုင်ငံရဲ့ လည်ပတ်နေတဲ့ လှုပ်ရှားမှု စက်ဝန်း(Life Circle) ဟာ အမှားဘက်ကို (တနည်း) အကျ (Negative) ဘက်ကို သွားနေပါတယ်။ ဒီနေရာမှာတော့ တိုင်းပြည်က Down Circle ထဲရောက်နေတာကို မဆွေးနွေးလိုပါဘူး။ ဗိုလ်ချုပ်ကြီးတွေ ပိတ်မိနေတဲ့ Down Circle ကိုသာ ဆွေးနွေးလိုပါတယ်။

ပထမဦးဆုံး သတိထားမိတဲ့ အရာတစ်ခုကတော့ တပ်မတော်သား တစ်ယောက်ဟာ မိမိနဲ့ စကားပြောနေတဲ့ သာမန်မြန်မာနိုင်ငံသား တစ်ယောက်နဲ့ ယှဉ်လိုက်လျှင် မိမိကသာ အဆိုပါ တပ်မတော်သား မဟုတ်သော မြန်မာနိုင်ငံသားထက် တိုင်းပြည်ကို ပိုပြီး ချစ်တယ်လို့ စိတ်ကြီးဝင်နေမှု တခုကို တွေ့ရပါတယ်။ ရာထူး ပိုကြီးတဲ့ တပ်မတော် အရာရှိပိုင်းဆို ပိုပြီး စိတ်ကြီးဝင်မှုတွေ များလာနေတတ်ပါတယ်။

တပြိုင်နက်ထဲမှာပဲ တခါတလေ ငယ်ငယ်က သိလာခဲ့တဲ့ အမှန်၊ အမှား အကောင်းအဆိုး ခွဲခြား ဝေဖန်တတ်တဲ့ အသိစိတ်၊ မိဘ ဘိုးဘွား မျိုးရိုး စဉ်ဆက်က သိရှိလာတဲ့ စိတ်ဓါတ်တွေက မိမိ လုပ်ရပ်အမှားတွေကို မသိစိတ်ရဲ့ ကွယ်ရာကနေ ပြန်လည် ခြောက်လှန့်နေတတ်ပါတယ်။ အဘယ်ကြောင့်ဆိုသော် တပ်က ပေးလာတဲ့ အမိန့်က ပြည်သူလူထု ဘက်က ကြည့်ရင် မှားနေတတ်ပါတယ်။ စက်တင်ဘာ အကြမ်းဖက်မှုက သက်သေပါ။ တပ်မတော်သား ဖြစ်လို့ တိုင်းပြည်ချစ်စိတ်က တပ်အမိန့် အတိုင်း လုပ်ရတယ်။ ပြည်သူ တွေအားလုံးက မိမိကို မှားတယ်လို့ ဝေဖန်တယ်။ ဒီသဘောနှစ်ခုဟာ ဆန့်ကျင်ဘက် လားရာကို သွားနေတဲ့ မြှားနှစ်စင်း ဖြစ်လို့ နေပါတယ်။

ဒီတော့ စည်းမျဉ်း ဥပဒေသ ( ၁ ) (Rule No. 1) အခြားသူများလည်း မိမိလို တိုင်းပြည် ချစ်တယ်ဆိုတာကို ခံစား နားလည်ပါ။ အထက်က အမိန့်ကို သေချာစွာ စေ့စပ် သုံးသပ်ပြီးမှာ နာခံပါ။ မှားတယ်လို့ ထင်မိလျှင် အထက် အရာရှိကို ရင်းရင်းနှီးနှီး ဆွေးနွေးတိုင်ပင်ကြည့်ပါ။ နည်းနည်းပါးပါး အမှား၊အမှန် ဝေဖန်ရုံနဲ့ ဘ၀ ပျက်မသွားနိုင်ပါဘူး။ အခုလို မျက်ကန်း အမိန့်နာခံနေရတာသာ ဘ၀ ပျက်ဖို့ လမ်းစ အမှန် ဖြစ်ပါတယ်။

ကိုယ်တိုင်က မိမိ အရည် အချင်းကို မိမိသိပါတယ်။ ငါ ဘာတတ်မြောက်တယ်၊ ဘာကျွမ်းကျင်တယ် ဆိုတာမျိုးပါ။ လူတိုင်းက အရာအားလုံးကို တတ်မြောက် မကျွမ်းကျင်နိုင်ပါဘူး။ ဒါက သဘာဝ တရားပါ။ အဲဒီ သဘာဝကို ဘယ်သူမှ မလွန်ဆန်နိုင်ပါဘူး။ စစ်သားလဲ သဘာဝထဲက လူပါပဲ။ သဘာဝ တရားကို လက်ခံပါ။ ဒီတော့ မိမိနဲ့ မသက်ဆိုင်တဲ့ရာထူး၊ မထိုက်တန်တဲ့ ရာထူးမှာ အခြေအနေအရ ရယူထားမိရင် သေချာ ပြန်လည် သုံးသပ်ရန် လိုအပ်လာပါတယ်။

စည်းမျဉ်း ဥပဒေသ ( ၂ ) (Rule No.2) မိမိနဲ့ မထိုက်တန်သော ရာထူးကို ရယူထားလျှင်သော်လည်းကောင်း၊ မိမိ မကျွမ်းကျင်သော နေရာကို ရယူထားလျှင်သော်လည်းကောင်း ထိုက်ထန်အောင်၊ ကျွမ်းကျင်အောင် လေ့လာပါ။ ပြောချင်ရာ ပြောနေခြင်းကို စွန့်လွှတ်ပြီး ကိုယ့်ကိုကိုယ် အမြဲဝေဖန် သုံးသပ် သင်ယူပါ။ ထိုသို့ လေ့လာ သင်ယူရခြင်းသည် ရှက်စရာ မဟုတ်ပါ။ သဘာဝ တရားသာ ဖြစ်ပါသည်။ ဤသို့ မလုပ်ပဲ ပြောချင်ရာ ပြောနေတာသာလျှင် ရှက်စရာ ဖြစ်နေသည်ကို သတိပြုပါ။

လာဘ်စားခြင်းဆိုင်ရာ ကိစ္စရပ်တွေမှာတော့ ယခုအခါ တနိုင်ငံလုံး အတိုင်းအတာနဲ့ အစိုးရ ၀န်ထမ်းတိုင်း လာဘ်စားနေကြတာ ဖြစ်ပါသည်။ ရာထူးကြီးလေ လာဘ်ပိုစားလေ ဆိုတဲ့ သဘောတရားတစ်ခုကို မြန်မာနိုင်ငံထဲမှာ တည်ဆောက်နေသလို ဖြစ်နေပါသည်။ ရာထူးကြီးသော နအဖ ခေါင်းဆောင်များ အဖို့ ယခု အခါ မိမိရယူထားသော လာဘ်ငွေပမာဏနှင့် တော်တော်လေး ချမ်းသာနေကြသည်မှာ လူတိုင်း အသိပင်၊ မိမိကိုယ်ကို အသိပင် ဖြစ်ပါသည်။ လာဘ်စားခြင်းတွေကို ယခု အချိန်မှာ ရပ်တန့်လိုက်ပါက မိမိပိုင်ဆိုင်မှုများ ဆုတ်ယုတ် မွဲတေ သွားမည် မဟုတ်ပါ။ ထိုသို့ မရပ်တန့်ပဲ ဆက်လက် လုပ်ကိုင်နေပါက အမှန်တကယ် မွဲမည့်လမ်းကို မိမိက ဦးတည်နေပါသည်။ ဥပမာ .. ဗိုလ်ချုပ် ခင်ညွန့်

စည်းမျဉ်း ဥပဒေသ ၃ (Rule No.3) လာဘ်ပေး လက်ယူ၊ လာဘ်စားရသော အခြေအနေကို လက်ရှိ အတိုင်းအတာတွင် ရပ်ပစ်နိုင်ရန် ကြိုးစားပါ။ မဟုတ်ပါက ယခု လက်ရှိ ရရှိထားသော စည်းစိမ် ဥစ္စာများပင် အလုံးစုံ ကုန်ဆုံးခြင်းသို့ ရောက်ဆုံးမည်ဖြစ်ပါသည်။ လာဘ်စားခြင်းကို ရပ်တန့်ခြင်းမှာ မိမိစည်းစိမ်ကို မွဲအောင် လုပ်နေသည်မဟုတ်။ ရေရှည်တည်တန့်အောင် ပြုလုပ်နေခြင်းသာ ဖြစ်ကြောင်း သတိပြုမိပါရန်။

ယနေ့ မိမိသည် တိုင်းပြည်ကောင်းကျိုး အတွက် ဘာတွေ လုပ်ခဲ့သလဲ၊ ဒီနေရာမှာ နည်းနည်း ခွဲခြားမြင်တတ်ရန် အရေးကြီးပါသည်။ အထက်အမိန့် နာခံတာသည် တိုင်းပြည်ကောင်းကျိုး လုပ်တာ ဟုတ်ချင်မှ ဟုတ်ပါလိမ့်မည်။ အခု အချိန်တွင် အထက်အမိန့် နာခံခြင်းသည် တိုင်းပြည်ကောင်းကျိုး လုပ်ရပ် မဟုတ်နိုင်ခြေ ပိုများနေပါသည်။ တိုင်းပြည်အတွက် အမှန်တကယ် ကောင်းကျိုးကို ဘာလုပ်ခဲ့သနည်းဆိုတာ မိမိ အတွင်းစိတ်က သေချာ ပြန်လည် သုံးသပ်စေလိုပါသည်။ တိုင်းပြည်ကောင်းကျိုး တစ်ခု လုပ်တာသည်၊ တပ်အမိန့်ကို အာခံနေတာ မဟုတ်၊ တပ်မတော်၏ အခြေခံမှာစည်းကမ်း ဖြစ်ပါသည်။

စည်းမျဉ်း ဥပဒေသ ၄ (Rule No.4) တိုင်းပြည်အတွက် ကောင်းကျိုး တစ်ခုခုကို မိမိက လက်ခံသလို အများက လက်ခံလာအောင် ကြိုးစား လုပ်ကိုင်ပါ။ အဆိုပါ လုပ်ရပ်သည် တပ်ကို အာခံသည်မဟုတ်၊ တပ်မတော်၏ အခြေခံ စည်းမျဉ်းတွင် တပ်မတော်သည် တိုင်းပြည်ကို ဘယ်တော့မှ သစ္စာ မဖောက်၊ တိုင်းပြည်ကောင်းကျိုးအတွက် အမြဲဆောင်ရွက်မည် ဆိုသော တပ်မတော်၏ အခြေခံမှု ဖြစ်သောကြောင့် တပ်၏ အမိန့်ကို နာခံရာသာရောက်ပါသည်။ ထိုသို့ လုပ်ခြင်းဖြင့် မိမိအတွက် ထိခိုက်နိုင်မည် မဟုတ်ပါ။ ထိုသို့ မလုပ်ဘဲ တိုင်းပြည်ဆိုးကျိုး ဖြစ်စေမည့် အထက် အမိန့်ကို နာခံ လုပ်ဆောင်နေရခြင်းသာလျှင် တပ်မတော်ကို အာခံခြင်း မိမိ အလုပ်ကို ထိခိုက်အောင် လုပ်နေခြင်း ဖြစ်နေသည်ကို သတိပြုပါ။

နောက်ဆုံး အနေဖြင့် ကျွန်တော် ယခု Think Tank လုပ်ခဲ့သော အချက်များကို ဆရာ လုပ်သည်ဟု မထင်မြင်စေလိုပဲ သေချာစွာ စဉ်းစား သုံးသပ်ကြည့်ပြီး ယခုပင် စတင် လုပ်ဆောင်ပါက ဗိုလ်ချုပ်ကြီးများတွင် ကျရောက်နေသော စိတ်လန့်ရောဂါ၊ ဗိုလ်ကတော်များ ညည ငိုရသော ရောဂါများ ပျောက်ကင်းမည် ဖြစ်ပြီး မိမိတို့ ကျရောက်နေသော တပ်မတော်၏ အဆိုးသံသရာ လည်မှု(Down Circle) ကို ချေဖျက်နိုင်မည်ဟု ကျွန်တော် ယုံကြည်မိပါသည်။ ဗိုလ်ချုပ်ကြီးများ ဒီစာကို ဖတ်မိ နားလည် ခံစားနိုင်ပါစေ။

လေးစားစွာဖြင့်
ကိုထိုက်

P.S .. ကျွန်တော် ရေးခဲ့သော အထက်ပါ အချက်များကို ပြင်ဆင်လိုလျှင်၊ ဖြည့်စွက်လိုလျှင်၊ ဖျက်ပေးစေလိုလျှင် အချက်ကျကျ ဆွေးနွေးဝေဖန် အကြံပြုပေးပါရန် ဖိတ်ခေါ်အပ်ပါသည်။ comment တွင် ရေးထားနိုင်ပါသည်။

နောက်တခု အနေနဲ့လည်း ဤဆောင်းပါးကို အခြားဘာသာသို့ ပြန်ဆိုလိုပါက လွတ်လပ်စွာ ပြန်ဆိုနိုင်ပါသည်။ သို့သော် ကျွန်တော့်ကို publish မလုပ်ခင် အရင် ပြစေလိုပါသည်။ အဓိပ္ပါယ် အကောက်လွဲသွားပါက အန္တရာယ် ဖြစ်နိုင်သော ဆောင်းပါး ဖြစ်နေသောကြောင့် ဖြစ်ပါသည်။