စည်းရုံးရေးမှုးတဦးလျှင် ပါတီဝင် (၃၀) ပေးရန် ကြံ့ဖွံ့ တောင်းခံ

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက မြို့နယ် ကျေးရွာအလိုက် စည်းရုံးရေးမှူးများကို တဦးလျှင် ပါတီဝင် (၃၀) ဦး စည်းရုံးပေးရန် တောင်းခံထားကြောင်း သိရသည်။

စစ်အစိုးရကိုယ်စားပြု နိုင်ငံရေးပါတီအဖြစ် လူမှုရေးအသင်းအဖွဲ့မှ အသွင်ပြောင်းလိုက်ပြီးသည့်နောက် ကြံ့ဖွံ့ အသင်းဝင်များကို ပါတီဝင်များအဖြစ် ပြောင်းလဲရန် အပူတပြင်း ဆောင်ရွက်နေခြင်းလည်း ဖြစ်သည်။

“သူတို့အသင်းက အခု ပါတီပြောင်းလိုက်တဲ့အချိန်မှာ တကယ်တမ်းပါတီဝင်လို့ ပြောလို့ရတာ (၅,၀၀၀) တောင် မပြည့်တဲ့အခြေအနေမှာ သူတို့ ခံစားနေရတယ်” ဟု ပဲခူးတိုင်း ကြံ့ဖွံ့ပါတီနှင့် နီးစပ်သူက ဆိုသည်။

ကြံ့ဖွံ့ပါတီ စည်းရုံးရေးမှူးများအတွက် လူထုကိုစည်းရုံးရန် သက်ဆိုင်ရာ တိုင်းနှင့်ပြည်နယ် ကြံ့ဖွံ့ခေါင်းဆောင်များက ပါတီရန်ပုံငွေ ကျပ် သိန်းထောင်ချီ ထုတ်ပေးထားကြောင်းလည်း သိရသည်။

“ဦးရဲမြင့်ထွန်းဆိုတဲ့ သူတို့ တိုင်းတာဝန်ခံ စည်းရုံးရေးမှူးတဦးဆို ဗိုလ်ချုပ် အောင်မင်းဆီကနေ သိန်းထောင်ချီပြီးတော့ ထုတ်ထားတယ်။ လွန်ခဲ့တဲ့ (၆) လလောက်ကတည်းက ထုတ်ထားတယ်။ သူတို့က ဒီလို ငွေထုတ်ပြီး ဒေသထဲမှာ ငွေတိုးပေးတဲ့ အလုပ်ကို ပြန်လုပ်တယ်” ဟု အဆိုပါ ကြံ့ဖွံ့နှင့်နီးစပ်သူက ဆက်ပြောသည်။

လက်ရှိတွင် ပြည်နယ်နှင့်တိုင်းအလိုက် ကြံ့ဖွံ့ပါတီ စည်းရုံးရေးမှူးများက သက်ဆိုင်ရာ ရပ်ကွက် ကျေးရွာများတွင် ပါတီဝင်များ လိုက်လံစုဆောင်းနေပြီး ပါတီဝင်တဦးလျှင် ငွေကျပ် (၁,၃၀၀) ကျပ် ပေးဆောင်ခိုင်းနေကြောင်း သိရသည်။

“နီးစပ်သူတွေကို တအိမ်တက် တအိမ်ဆင်း စည်းရုံးတယ်။ စည်းရုံးပြန်တော့လည်း မရတဲ့ အခက်အခဲနဲ့ ရင်ဆိုင်ရတယ်။ အခုက ကိုယ်မကြိုက်တဲ့ပါတီ ဖြစ်နေတာကို ငွေ (၁,၃၀၀) ပေးရမယ်ဆိုတော့ ဘယ်သူမှ မ၀င်ဘူး” ဟု ပဲခူးမြို့ ဒေသခံတဦးက ဆိုသည်။

သို့သော် ကျေးလက်တောရွာများတွင်မူ တအိမ်ထောင် တယောက်နှုန်း ဓာတ်ပုံရိုက် ငွေတောင်းခံပြီး အတင်းအကျပ် ပါတီဝင် စုဆောင်းမှုများ ရှိလာကြောင်း သိရသည်။

လူမှုရေးအသင်းအဖွဲ့အဖြစ် ရပ်တည်စဉ်က နိုင်ငံဝန်ထမ်းများနှင့် ကျောင်းသူကျောင်းသားများကို အသင်း မ၀င်မနေရ ၀င်ခိုင်းခဲ့ပြီးနောက် ယခု နိုင်ငံရေးပါတီအဖြစ် ပြောင်းလဲချိန်တွင် အစစ်အမှန်ပါတီဝင်များ လိုက်လံ စုဆောင်းရာ၌ အခက်တွေ့နေကြခြင်းဖြစ်သည်။

စစ်အစိုးရက ကြံ့ဖွံ့အသင်းကို ပါတီအဖြစ် အသွင်ပြောင်းပြီးနောက် တိုင်းနှင့်ပြည်နယ်၊ ကျေးရွာများရှိ အရေအတွက် သောင်းနှင့်ချီရှိသော ကြံ့ခိုင်ရေးအသင်းဆိုင်းဘုတ်များကို ပြီးခဲ့သည့်လမှစပြီး ဖြုတ်ချနေကာ ကြံ့ခိုင်ရေးပါတီ ဆိုင်းဘုတ်အဖြစ် ပြောင်းလဲရန် ပြင်ဆင်နေသည်။
ခေတ်ပြိုင်သတင်းထောက် စိုးမိုး ရေးသားသည်။