ရခိုင်ပြည်နယ်အတွင်း ကျရောက်ခဲ့သည့် ရေဘေးအတွက် အကူအညီ လိုအပ်နေသေးကြောင်း စစ်တွေမြို့ရှိ လူမှုရေးဆောင်ရွက်နေသော လူငယ်များက ပြောသည်။ပြီးခဲ့သည့် ဇွန် (၁၃) ရက်နေ့ကစ၍ သည်းထန်စွာရွာသွန်းခဲ့သော မိုးကြောင့် ရခိုင်ပြည်နယ်အတွင်း နေရာအနှံ့တွင် ရေကြီးခြင်းများ ဖြစ်ပေါ်ခဲ့ကာ စစ်တွေ၊ ဘူးသီးတောင်၊ မောင်တော၊ မင်းပြား၊ ကျောက်တော်၊ ပုဏ္ဏားကျွန်းနှင့် မြေပုံမြို့ နယ်တို့တွင် အကူအညီများ လိုအပ်နေကြောင်း သိရသည်။
စစ်အစိုးရထုတ်သတင်းစာများက မောင်တောနှင့် ဘူးသီးတောင် မြို့နယ်တို့တွင် မိုးသည်းထန်စွာ ရွာသွန်းသည့်အတွက် မြေပြိုကာ လူ (၄၆) ဦး သေဆုံးခဲ့ကြောင်း ဇွန် (၁၇) ရက်တွင် တရားဝင်ကြေညာခဲ့သည်။
ရေလွှမ်းကာ အသေအပျောက် အများဆုံးဖြစ်သော ဘူးသီးတောင်မြို့နယ် ဒေသခံများ ပြောပြချက်အရ ယင်းမြို့နယ်တွင် သေဆုံးသူ ဦးရေ (၁၀၀) ခန့်ရှိမည်ဟု ခန့်မှန်းကြောင်း သိရသည်။
ဘူးသီးတောင်တွင် ရေလွှမ်းမိုးမှု၊ တောင်ပြိုကျမှုတို့ကြောင့် (၅) ရပ်ကွက်ရှိ ဟန်မလာကျေးရွာ၊ ကျောက်ရွက်ပြင်တိုးချဲ့ကျေးရွာ၊ ကကျဘက်ပြင်ကျေးရွာ အုပ်စုတို့မှ သေဆုံးသူများပြားခဲ့ကြောင်း၊ သတင်းစာတွင်မူ ယင်းဒေသတို့၌ အမျိုးသား (၁၃) ဦးနှင့် အမျိုးသမီး (၁၈) ဦး စုစုပေါင်း (၃၁) ဦး သေဆုံးခဲ့ကြောင်း သိရသည်။
မောင်တောတွင် အကူအညီကို UN က လာရောက်ပေးနေကြောင်း၊ ရေဘေးသင့်သူများကို ကျောင်းများတွင် နေရာချထားပေး ကြောင်း သိရသည်။
စစ်အစိုးရ ၀န်ထမ်းတဦးဖြစ်သူ လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး တာဝန်ရှိသူတဦးက “ယူအန်ကတော့ နိုင်ငံတကာအဖွဲ့အစည်းတခုဆိုတော့ ကယ်ဆယ်ရေးလုပ်ငန်းတွေကို သူတို့က နိုင်နင်းတယ်လေ။ အမှန်မှာက အစိုးရအနေနဲ့ အဲဒီလို အတွေ့အကြုံရှိတဲ့အဖွဲ့တွေရဲ့အကူအညီကို ယူပြီးတော့ ပူးပေါင်းသင့်တာပေါ့။ ဧရာဝတီက နာဂစ်လိုတော့ မကြီးကျယ်ပေမယ့် ရခိုင်မှာတော့ အခုအဖြစ်အပျက်က ပြည်နယ်အနေနဲ့ အကြီးဆုံးပဲလေ” ဟု ပြောသည်။
မောင်တောမြို့နယ်အတွင်း အမြင့်ပေ (၄) ပေအထိ ဒီရေမြင့်တက်ခဲ့သောကြောင့် ယင်းဒေသရှိ မိသားစုများ ဘေးလွတ်ရာကျောင်းများသို့ ပြေးရှောင်ခဲ့ရကြောင်း သိရသည်။
“မောင်တောမြို့နယ်အတွင်းမှာ ဆိုရင်တော့ ရွာတော်တော်များများ ရေမြုပ်တယ်၊ မြေပြိုတယ်၊ တောင်ပြိုတယ်၊ လူတွေသေတာ အယောက် (၄၀) လောက်ရှိတယ်” ဟု မောင်တောမြို့ခံများက ပြောသည်။
မိုးရွာသည့်အပြင် လေပြင်းများပါ တိုက်ခတ်ခဲ့သည့်အတွက် ပို၍ ဆိုးရွားခြင်းဖြစ်ကြောင်း ဒေသခံတို့က ပြောသည်။
“လတ်တလောကတော့ နေစရာတွေ လိုနေသေးတယ်၊ အရေးကြီးတယ်။ အခုကတော့ စားစရာတွေကို လှူသူတွေက ပေးဝေနေတာပေါ့၊ စေတနာရှင်တွေကရော၊ အစိုးရမဟုတ်တဲ့ NGO တွေကရော လာလှူတာတွေ ရှိတယ်။ ဒါပေမယ့် နေစရာအိမ်တွေကို အရင်လိုအပ်နေတယ်” ဟု မောင်တောမြို့နယ်သားတဦးက ပြောသည်။
ရေဘေး၊ လေဘေးကြောင့် အိုးအိမ်မဲ့နှင့် အိုးအိမ်ပျက်စီးသွားသော မိသားစုပေါင်း (၁,၀၀၀) ခန့်ရှိမည်ဟု ခန့်မှန်းကြောင်း စစ်တွေရှိ လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးမှ တာဝန်ရှိသူက ပြောသည်။
ယူအန်လက်အောက်ခံ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးမှ ဇွန် (၁၆) ရက်၌ ရေဘေးဒဏ်ခံခဲ့ရသူ မောင်တောမြို့ပေါ်မှ မိသားစုများကို အထက်တန်းကျောင်းနှင့် အလယ်တန်းကျောင်းတွင် ဖွင့်လှစ်ထားသော ကယ်ဆယ်ရေးစခန်း (၂) ခုသို့ သွားရောက်ကာ ဆန်၊ ဆီ၊ စောင်၊ ခြင်ထောင်နှင့် အိုးခွက်ပန်းကန်များ ပေးလှူခဲ့ကြောင်း မောတောမြို့ခံတဦးက ပြောသည်။
“အစိုးရကလာလှူတယ်ဆိုပြီးတော့ ကျမတို့တော့မသိဘူး။ အခုက နိုင်ငံခြားကလို့ ပြောတာပဲ” ဟု ရေဘေးဒုက္ခသည်တဦးက ပြောသည်။
ဘူးသီးတောင်မြို့တွင် တည်ရှိသော အလိုတော်ပြည့် ဘုန်းတော်ကြီးကျောင်းရှိ အဆောက်အဦ အများအပြားလည်း ရေကြောင့် မြေပြိုကာ ပျက်စီးသွားကြောင်း၊ ကျောင်းတိုက်အတွင်းရှိ စေတီရင်ပြင်တော်တွင် ခင်းထားသော ကြွေပြားများ၊ ဆွမ်းချက်ဆောင်၊ ယောဂီဆွမ်းစားဆောင်၊ မီးစက်ရုံ စသည်တို့ ပျက်စီးသွားကြောင်း သိရသည်။
မိုးသည်းထန်သည့်အတွက် မြေပြိုကာ ဘူးသီးတောင်- မောင်တော ကားလမ်း လုံးဝနီးပါး ပျက်စီးသွားပြီး အစိုးရက အချိန်တိုအတွင်း မပြင်ဆင်နိုင်သေးကြောင်း သိရသည်။
စစ်တွေမှ ကုန်သည်တဦးက “အဲဒီလမ်းက အရင်ကလည်း မကောင်းဘူး၊ အစိုးရက ရခိုင်ဒေသဖွံ့ဖြိုးအောင်လုပ်ရင် လမ်းတွေကို အရင်ကောင်းအောင် လုပ်သင့်တယ်။ ကျနော်တို့ ဒေသမှာ လမ်းပန်းဆက်သွယ်ရေး လုံးဝမမကောင်းဘူး။ အားလုံးသိပါတယ်၊ ဘာမှ ဖွံ့ဖြိုးအောင်လုပ်ပေးတာ မရှိဘူး” ဟု ပြောသည်။
No comments:
Post a Comment