စစ်အစိုးရကို စွပ်စွဲထားသည့် နျူကလီးယား အစီအစဉ်များ အပေါ် နိုင်ငံတကာ အဏုမြူစွမ်းအင် အေဂျင်စီ (IAEA) ဆိုင်ရာ မြန်မာ ကိုယ်စားလှယ် သံအမတ်ကြီး ဦးတင်ဝင်းက ငြင်းဆို လိုက်ကြောင်း သိရှိရသည်။
IAEA ၏ Division of Operations A မှ Department of Safeguards ၏ ညွှန်ကြားရေးမှူး မစ္စတာ မာကို မာဇိုက ဇွန်လ ၁၄ ရက်နေ့ ရက်စွဲဖြင့် နျူကလီးယား အစီအမံများ ရှိမရှိ စာပေးပို့၍ မေးမြန်းခဲ့ရာ ဦးတင်ဝင်းက ယူရေနီယံ ပြောင်းလဲထုတ်လုပ်မှု၊ အဆင့်မြင့် သန့်စင်မှု၊ ဓာတ်ပေါင်းဖို တည်ဆောက်မှု၊ အသုံးပြုလည်ပတ်မှု စသည့် နျူကလီးယား ဆိုင်ရာ လုပ်ငန်းများကို ဆောင်ရွက်ရန် စီစဉ်ထားခြင်း မရှိဟု ပြန်ကြားခဲ့ခြင်း ဖြစ်သည်။
မြန်မာနိုင်ငံသည် နျူကလီးယားလက်နက် မပြန့်ပွားရေး စာချုပ် (NPT) အဖွဲ့ဝင်နိုင်ငံ ဖြစ်ပြီး စာချုပ်ကို ၁၉၉၅ ခုနှစ်တွင် သဘောတူ လက်မှတ်ရေးထိုးပြီး ဖြစ်ကြောင်း၊ နျူကလီးယား ဆိုင်ရာ လုပ်ငန်းများကို ဆောင်ရွက်မည်ဆိုပါက IAEA ကို အသိပေးမည်ဟု ဦးတင်ဝင်းက ပြန်ကြားကြောင်း ယခုလ ၁၈ ရက်နေ့ထုတ် မြန်မာ့အလင်း သတင်းစာတွင် ဖော်ပြထားသည်။
ဒုံးပျံအင်ဂျင် အထူးပြုဘာသာရပ်ဖြင့် ရုရှားမှ ဘွဲ့ရခဲ့သူ ဗိုလ်မှူးစိုင်းသိန်းဝင်း၏ ထုတ်ဖော်ချက် အထောက်အထားများကို အခြေခံကာ စစ်အစိုးရ၏ နျူကလီးယားဆိုင်ရာ သံသယဖြစ်ဖွယ် အချက်အလက်များအား အယ်လ်ဂျာဇီးယား သတင်းဌာန နှင့် ဒီမို ကရက်တစ် မြန်မာ့အသံ (DVB) တို့က ထုတ်လွှင့်ပြသခဲ့သည်။
ပြည်ပ အခြေစိုက် သတင်းဌာနများက ဖော်ပြခဲ့သည်မှာ အခြေအမြစ် မရှိသည့် မခိုင်လုံသော သတင်း အချက်အလက်များသာ ဖြစ်ကြောင်း ဦးတင်ဝင်း၏ ရေးသားပေးပို့ချက်တွင် ပါရှိသည်။
ယင်းစီမံကိန်းများကို မြောက်ကိုရီးယား အစိုးရ၏ အကူအညီဖြင့် အကောင်အထည် ဖော်နေသည်ဟုလည်း လေ့လာသူများ က သုံးသပ်ကြသည်။
စစ်အစိုးရကမူ မြန်မာနိုင်ငံအနေဖြင့် မြောက်ကိုရီးယားနိုင်ငံနှင့် နှစ်ပေါင်း ၂၀ ကျော်ကြာ သံတမန် ဆက်ဆံရေး ပြတ်တောက်ခဲ့ပြီးနောက် ကမ္ဘာ့နိုင်ငံများနှင့် ချစ်ကြည်ရင်းနှီးစွာ ဆက်ဆံရေးမူဝါဒကြောင့် မြောက်ကိုရီးယားနှင့် သံတမန် ဆက်ဆံရေး ပြန်လည်ထူထောင်ခဲ့ခြင်းသာ ဖြစ်ကြောင်း နိုင်ငံပိုင်သတင်းစာတွင် ရေးသားထားသည်။
နှစ်နိုင်ငံ အကျိုးတူ ကုန်သွယ်ရေးအတွက် မြောက်ကိုရီးယားနိုင်ငံမှ ကုန်တင်သင်္ဘောများသည် အများက ထင်နေကြသည့် အတိုင်း လက်နက်များ တင်ဆောင်လာခြင်း မဟုတ်ဘဲ ပုံမှန် ကုန်ပစ္စည်းများ အတင်အချ ပြုလုပ်ခဲ့ခြင်းသာ ဖြစ်သည်ဟု ယခုလ ၁၂ ရက်နေ့က ကြေးမုံသတင်းစာတွင် ဖော်ပြခဲ့သည်။
Monday 21 June 2010
Subscribe to:
Post Comments (Atom)
No comments:
Post a Comment