နအဖကာကွယ်ရေးဝန်ကြီးဋ္ဌာန စစ်ဆင်ရေးအထူးအဖွဲ့ (ကစထ) မှူး ဒု ဗိုလ်ချုပ်ကြီး မင်းအောင်လှိုင်၏ ဇူလိုင်လ ၈ ရက်နေ့ သျှမ်းပြည် (မြောက်ပိုင်း) နမ့်ခမ်းမြို့ ခရီးစဉ်အတွင်း နမ့်ခမ်းဆေးရုံသို့ ၀င်ရောက် စစ်ဆေးခဲ့ရာ ရက်ပိုင်းအတွင်း ဆေးရုံအုပ် ဒေါက်တာ ဒေါ်ခင်ဝင်းကြည် ပြောင်းရွေ့ရန် အမိန့်ကျလာကြောင်း သိရသည်။
အဆိုပါ နမ့်ခမ်းဆေးရုံတွင် ဧပြီလပိုင်းက မွေးလူနာရော ကလေးပါ သေဆုံးမှု ဖြစ်ပွားခဲ့ပြီးနောက် ဆေးရုံအခြေအနေ ယို ယွင်းလာရာ ဒုဗိုလ်ချုပ်ကြီး မင်းအောင်လှိုင်က ၎င်း၏ ခရီးစဉ်အတွင်း နမ့်ခမ်းဆေးရုံ အခြေအနေမှန်ကို သိရှိရန် စုံစမ်း မေးမြန်းမှု ပြုလုပ်ခဲ့ကြောင်း ဆေးရုံနှင့်နီးစပ်သူ တစ်ဦးက သျှမ်းသံတော်ဆင့် သို့ ပြောသည်။
ဆေးရုံ၏ ယိုယွင်းနေသည့် အခြေအနေဆိုသည်မှာ ဆေးရုံသို့ လူနာများ ဆေးကုသမှုခံယူရန် မလာရောက်ကြပဲ ပြင်ပဆေး ခန်းများတွင်သာ လူနာများပြည့်နှက်နေပြီး ဆေးရုံတွင် လူနာကုတင်များ လျှော့နည်းလျှက်ရှိရာ ၎င်းက ဘာကြောင့် ယခုလို ဖြစ်နေရသည်ကို မေးမြန်းခဲ့ကြောင်း သိရသည်။
“ပြင်ပဆေးခန်းတွေမှာ လူနာတွေပြည့်နေပြီးတော့ ဆေးရုံကို လူနာဘာကြောင့်မလာတာလဲပေါ့ နောက်တစ်ခုက ကုတင် တွေပျောက်နေတဲ့ကိစ္စ ဘယ်ရောက်သွားလဲပေါ့ အဲဒါတွေက မွေးလူနာသေဆုံးသွားတဲ့ကိစ္စကြောင့်လား ဆိုပြီး မေးတယ် မနေ့ (ဇူလိုင် ၁၁ ရက်နေ့) ကတော့ ဆေးရုံအုပ်ပြောင်းရွေ့မိန့်ကျလာပြီဆိုတာ သိရတယ် ” လို့ သူက ဆိုသည်။
ကစထမှူး၏ ခရီးစဉ်တွင် အရပ်ဘက် အာဏာပိုင်များအနေဖြင့် အဆိုပါဆေးရုံကိစ္စနှင့်မပတ်သက်သည့် သီးခြားကိစ္စတချို့ တင်ပြမှုရှိခဲ့ကြောင်း သူက ဆက်ပြောရာတွင် “ တခြားကိစ္စတွေအနေနဲ့ နမ့်ခမ်း - မုံးဝီးကားလမ်း ကတ္တရာခင်းဖို့နဲ့ အထက်တန်းကျောင်း ဆောက်ဖို့ကိစ္စတွေ တင်ပြတာတော့ရှိတယ် ” လို့ဆိုသည်။
ယခုပြောင်းရွေ့ခံရမည့် ဆေးရုံအုပ်ကြီးသည် ဧပြီလ ၈ ရက်နေ့က နမ့်ခမ်းဆေးရုံသို့ ပြောင်းရွေ့ ရောက်ရှိလာကြောင်း သိရသည်။
မှတ်ချက် ။ ။ အချက်အလက်များအား စိုင်းဝင်း ပေးပို့သည်။
Tuesday, 13 July 2010
Subscribe to:
Post Comments (Atom)
No comments:
Post a Comment