ရေကြီးပြီး နောက်ပိုင်း မောင်တောမြို့နယ်တွင် ဆန်ဈေးများ အဆမတန် မြင့်တက်သွားသဖြင့် ပြည်သူများ သက်သက်သာသာဖြင့် ၀ယ်ယူ အသုံးပြုနိုင်ရန် အတွက် စစ်တွေ အင်းပေါက်ဝ ကုမ္ပဏီမှ ဆန်အိတ်များကို သင်္ဘောဖြင့် မောင်တောသို့ တင်ပို့နေရာ ဇွန်လ ၃၀ ရက်နေ့က နောက်ထပ် ဆန်အိတ် ၃၀၀၀ ရောက်ရှိလာကြောင်း သတင်း ရရှိသည်။
မောင်တောမြို့ခံ တဦးက “ ခုရောက်လာတာက ဒုတိယ အကြိမ် ဖြစ်ပါတယ်။ ပထမ အခေါက်ကလည်း အင်းပေါက်ဝ ကုမ္ပဏီက ဆန်အိတ် ၃၀၀၀ ကိုမောင်တောကို သင်္ဘောနဲ့ တင်ပို့ပြီး တအိတ်ကို ကျပ် တသောင်းခွဲနုန်းနဲ့ ရောင်းချပေးခဲ့ပါတယ်” ဟု ပြောသည်။
ယခုရောက်ရှိလာသော ဆန်များကို မောင်တော ခရိုင် ကုန်သည်ကြီးများ အသင်းမှ တအိတ်ကို ကျပ် ၁၅၀၀၀ ဖြင့် ၀ယ်ယူပြီး ဒေသခံ ပြည်သူများသို့ ၁၅၅၀၀ ဖြင့် ရောင်းချသွားမည် ဖြစ်ကြောင်း သိရသည်။
“ ဆန်တွေကို ဇူလိူင်လ ၁ ရက်နေ့က စပြီး ရောင်းချနေပါပြီ။ အိမ်ထောင်စု အလိုက် မှတ်ပုံတင် မဟုတ်ရင် ပုံစံ တဆယ် မိသားစု စာရင်း အပြည့်အစုံနဲ့ အိမ်ထောင်စုတစုကို ဆန် (၁၀) အိတ်နှုန်း ရောင်ချ နေပါတယ်။” ဟု သူက ဆက်ပြောသည်။
ဘူးသီးတောင်-မောင်တော ကားလမ်းမှာ ယခုအချိန်ထိ ကျိုးပျက်နေသဖြင့် အဆိုပါ ဆန်အိတ်များကို စစ်တွေမှ တဆင့် ရေလမ်းကြောင်းကို အသုံးပြုပြီး တင်ပို့နေရကြောင်း သိရသည်။ ၎င်းပြင် တခြား ကုန်ပစ္စည်းများ တင်ပို့ခြင်းကိုလည်း ကားလမ်းပျက်နေသဖြင့် ရေလမ်းကို အသုံးပြုပြီး ဆက်သွယ် တင်ပို့နေရကြောင်း သိရသည်။
သို့သော်လည်း ပင်လယ်ပြင်ကို ဖြတ်ပြီး ခရီးသွားလာရ သဖြင့် မိုးရာသီတွင် ယခုကဲ့သို့ ရေလမ်းကြောင်းကို အသုံးပြုနေရခြင်းမှာ အန္တရာယ်များကြောင်း သိရသည်။
နိရဉ္စရာသတင်းထောက် ခိုင်ခိုင်စံ ရေးသားသည်။
Friday 2 July 2010
Subscribe to:
Post Comments (Atom)
No comments:
Post a Comment