ရန်ကုန်တွင် ရာဇဝတ်မှုများ တိုးပွား

ရန်ကုန်မြို့တွင် တပတ်လျှင် ရာဇ၀တ်မှုပေါင်း ၄၀၀ ကျော် ဖြစ်ပွားလျက် ရှိကြောင်း ရန်ကုန်တိုင်း ရဲတပ်ဖွဲ့မှူးရုံးမှ တရားဝင် ထုတ်ပြန်ချက် အရ သိရသည်။

ရာဇ၀တ်မှု များသည် အမှန် ဖြစ်ပွားသည့် နှုန်းအတိုင်း အထက်သို့ တိတိကျကျ စာရင်း မတက်ရောက်ခြင်းများလည်း ရှိနေသေးကြောင်း နိုင်ငံဖြတ်ကျော် မှုခင်းများဌာနမှ အရာရှိတဦးက ပြောသည်။

“အထက်က စီမံချက်တွေချပြီး သေသေချာချာ စိစစ်ခိုင်းတာတွေ၊ အမှုဖြစ်ပွားမှုနှုန်းတွေကို မြို့နယ်အလိုက် တင်ပြခိုင်းတာတွေကို အခု ၃၊ ၄ လ အတွင်း လုပ်လာတယ်” ဟု အဆိုပါ အရာရှိက ပြောသည်။

သင်္ကြန်တွင်း ဗုံးပေါက်ကွဲမှုဖြစ်စဉ်နှင့် ကွမ်းခြံကုန်းတွင် ဓားပြတိုက်၊ လူသတ်မှုများ ဖြစ်ပွားပြီးနောက် ရဲချုပ် ဗိုလ်မှူးချုပ်ခင်ရီက ရန်ကုန်မြို့တွင်း ရာဇ၀တ်မှုများကို ယခုကဲ့သို့ စိစစ်ခိုင်းခြင်းဖြစ်ကြောင်း သိရသည်။

ပြီးခဲ့သည့် တပတ်အတွင်း ကောက်ယူထားသော စာရင်းများကို ထုတ်ပြန်ချက်အရ မှောင်ရိပ်ခိုမှုနှင့် မူးယစ်ရမ်းကားမှု ၂၀၀ ကျော်၊ ခိုးမှု၊ မသင်္ကာမှု ၄၀ ကျော်၊ လက်နက်မှု ၂၀ ကျော်၊ ယစ်မျိုးနှင့် မူးယစ်ဆေးဝါးမှု ၁၀ မှု၊ ပြည့်တန်ဆာမှု ၅၀၊ လောင်းကစားမှု ၂၀ ကျော်တို့ ပါဝင်ကြောင်းသိရသည်။

“တလအတွင်း အမှုဘယ်လောက် ဖော်ထုတ်ရမယ်ဆိုတဲ့ စီမံချက်တွေကို မြို့နယ်တွေအလိုက် တင်ခိုင်းတာရှိတယ်။ ဒီလို လုပ်တာ ဘာပြဿနာတက်လဲဆိုတော့ အမှုပြည့်အောင်ဆိုပြီး အကုန်ဆွဲထည့်ကုန်တာရှိတယ်။ ဥပမာ မသင်္ကာမှုလိုမျိုးပေါ့။ အဲဒီလို အမှုတွေက များလာတယ်” ဟု ပန်းဆိုးတန်းမြို့နယ်ရှိ ဒုရဲအုပ်တဦးကပြောသည်။

“ကွမ်းခြံကုန်း ဓားပြတိုက်၊ လူသတ်မှု ဖြစ်ပြီးတဲ့နောက်မှာ ရာဇ၀တ်မှု အသေးတွေကစပြီး ဖော်ထုတ်ဖို့၊ သူတို့ ဖြစ်စေချင်တာက မြို့နယ်အလိုက် တက်လာတဲ့ အမှုစာရင်းတွေ စုစည်းတင်ပြပြီး အခု နောက်ပိုင်းမှာ ရဲတပ်ဖွဲ့ကနေ ထိထိရောက်ရောက် ကိုင်တွယ်နေတယ်ဆိုတာကို ပြချင်တာလည်းပါတယ်” ဟု အဆိုပါ ဒုရဲအုပ်က ဆက်လက်ပြောသည်။

မြို့နယ်အတွင်းရှိ လောင်းကစားနှင့် ပြည့်တန်ဆာလုပ်ငန်းများက ရဲဌာနအသီးသီးကို လိုင်းကြေးပေး၍ လုပ်ကိုင်နေသော်လည်း အထက်မှ စီမံချက်ချမှတ်သည့် အခါမျိုးတွင်မူ ဖမ်းဆီးမှုများ ပြုလုပ်ရကြောင်းလည်း ၎င်းက ရှင်းပြသည်။

“တချို့ အမှုတွေက ရဲစခန်းမှာတင် ပျောက်သွားတာရှိတယ်။ သက်ဆိုင်ရာရဲအရာရှိနဲ့ ပေါင်းပြီး တရားခံနဲ့ တရားလို ကျေအေးလိုက်တဲ့ အမှုမျိုးတွေရှိတယ်။ အဓိကကတော့ မြန်မာပြည်မှာ အထက်ကို အဆင့်ဆင့်တက်လေ အချိန်ကုန်၊ ငွေကုန်လေဆိုတော့ ဒီနည်းနဲ့ ဖြေရှင်းကြတာများတယ်။ ဒီတော့ မှုခင်းစာရင်းထဲ မသွင်းဘဲ အောက်ခြေမှာတင် ပျောက်နေတဲ့ အမှုသေးတွေ ထောင်နဲ့ ချီရှိနေတယ်” ဟု ဥပဒေအရာရှိတဦးက ပြောသည်။

ယခုကဲ့သို့ မှုခင်းများဖြစ်ပွားနှုန်း မြင့်တက်လာခြင်းကို တရားဝင် သတင်းထုတ်ပြန်ခြင်းသည် ရဲဌာနချုပ်အနေနှင့် မှုခင်းဖော်ထုတ်မှုများ တိုးတက်လုပ်ဆောင်နေကြောင်း ပြသမှု ဖြစ်နိုင်ကြောင်း ၎င်းက ပြောသည်။

မြန်မာနိုင်ငံရဲတပ်ဖွဲ့သည် မှုခင်းကြိုတင် ကာကွယ်ရေးလုပ်ငန်းစဉ် ၉ ရပ်ဖြင့် မှုခင်းလျော့နည်းစေရန် လုပ်ဆောင်နေကြောင်း ရဲချုပ် ဗိုလ်မှူးချုပ်ခင်ရီက ဇွန်လ ၄ ရက်နေ့က ပြုလုပ်သည့် သတင်းစာ ရှင်းလင်းပွဲတွင် ပြောကြားခဲ့ကြောင်း သိရသည်။

ဧရာဝတီသတင်းထောက် နရီလင်းလက် ရေးသားသည်။