ယခုနှစ် ကျောင်းဖွင့်ချိန်တွင် ကျောင်းသား ကျောင်းသားများထံမှ သတ်မှတ် ငွေထက် ပိုပြီး ကျောင်းဝင်ကြေး တောင်းခံပါက တိုင်ကြားနိုင်ပြီး သက်ဆိုင်ရာက အရေး ယူမည် ဖြစ်ကြောင်း အခြေခံ ပညာ ဦးစီးဌာနမှ ထုတ်ပြန် ထားသော်လည်း အဆိုပါ ထုတ်ပြန်ချက်ကို မိမိတို့ လိုက်နာနိုင်မည် မဟုတ်ကြောင်း အလယ်တန်းပြ ဆရာမ တဦးက ပြောသည်။
“ ဘယ်သူမဆို မကောင်းမူကို လုပ်ချင်ကြမှာ မဟုတ်ဘူး။ ဆရာဆရာမတွေ ဆိုရင် ပိုပီး မလုပ်ချင် ကြပါဘူး။ နာသုံးနာနဲ့ အလုပ် လုပ်နေကြရတဲ့ ဆရာ ဆရာမတွေ ဖြစ်တဲ့ အတွက် ဖြစ်တယ်။ ပီးတော့ ကိုယ်ရဲ့ တပည့်တွေဆီက ဘယ်ဆရာ ဆရာမမှ ခုလို ငွေတွေကို အပိုတောင်းခံချင်ကြမှာ မဟုတ်ဘူး။ ဒါပေမယ့် ကျွန်မတို့ အနေနဲ့ ကျောင်းဝင်ကြေးတွေ စာအုပ်ဖိုးတွေကို ပိုယူ နေရကြရတယ်။ ခုလို လုပ်ရတာက ကျွန်မတို့ ရတဲ့ လစာနဲ့ ကျွန်မတို့ မိသားစု စားဝတ်နေရေး မလုံလောက်တဲ့ အတွက် ဖြစ်တယ်။ ခုလို အပိုဝင်ငွေတွေ မရရင် ကျွန်မတို့ အချိန်ပြည့် စာပြနိုင်မှာ မဟုတ်ဘူး။ အဲသလို ဆိုရင် ကျောင်းသား တွေကို ပိုနစ်နာ စေနိုင်ပါတယ်။”
အဆိုပါ ကျောင်းဝင်ကြေး ပိုမတောင်းရ အမိန့်ကို အခြေခံ ပညာ ဦးစီးဌာနက သက်ဆိုင်ရာ ပြည်နယ်နှင့် တိုင်း ကျောင်းများ အသီးသီးသို့ မေလ ၃ ရက်နေ့က ထုတ်ပြန်ခဲ့သည်။
၎င်းပြင် ဆရာမက “ကျွန်မ အခု အလယ်တန်းပြ ဆရာမပါ။ လစာက ကျပ် ၇၀၀၀၀ ဖြစ်ပါတယ်။ ဒီလစာနဲ့ ဘယ်လိုနည်းနဲ့မှ မိသားစု စားဝတ်နေရေးကို ဖြေရှင်းလို့ မရပါ။ ဒါကြောင်း ခေါင်းစဉ် အမျိုးမျိုးနဲ့ လှည့်ပြီး တောင်းခံ နေရတာ ဖြစ်ပါတယ်။ ဒီအလုပ်ကို လုပ်ချင်လို့ လုပ်တာ မဟုတ်ဘူး။ ၀မ်းရေး အတွက် ဖြစ်ပါတယ်။ အလုပ်လက်မဲ့ သူတွေကလည်း များနေတော့ တခြား အလုပ် တခု ရဖို့လည်း မလွယ်တော့ ကျောင်းဆရာ လုပ်ပြီး ဖြစ်သလို ရုန်းကန်နေရတာဘဲ ဖြစ်ပါတယ်” ဟု သူမက ဆက်ပြောသည်။
မြန်မာနိုင်ငံတွင် အထက်တန်း ကျောင်းအုပ် ဆရာကြီး၏ လစာမှာ တလကို ၁၀၀၀၀၀ ကျပ်၊ အထက်တန်းပြနှင့် အလယ်တန်းပြ ဆရာ တဦး၏ လစာမှာ ၇၀၀၀၀ ကျပ်နှင့် မှုလတန်းပြ ကျောင်းဆရာတယောက်၏ လစာက ၅၀၀၀၀ ကျပ် ဖြစ်ကြောင်း သိရသည်။
စစ်တွေမြို့ အတိုင်းအတာအရ မိသားစု ၆ ဦးရှိသော အစိုးရ အမှုထမ်း မိသားစု တစုအတွက် တလတာ အနိမ့်ဆုံး အသုံးစရိတ်မှာ ကျပ် ၃ သိန်းခွဲ ခန့် လိုအပ်သဖြင့် ကျောင်သားများကို သူမဆီတွင် ကျူရှင် တက်ရန် ပြောကြားထားသည်ဟု သူမက ပြောသည်။
“ကျွန်မကတော့ ကျွန်မ ကိုင်တဲ့ အတန်းသားတွေကို ကျူရှင်လာတတ်ဖို့ ပြောထားပါတယ်။ ကျူရှင်လိုရင် ကျွန်မဆီမှာ တက်ကြပါ။ ကျူရှင် မပြရင် ဘယ်သူမှ ရတဲ့ လစာနဲ့ စားဝတ်နေရေးကို ဖြေရှင်းနိုင်ကြမှာ မဟုတ်ပါဘူး။ ဘယ်သူဘဲ တားတား ပြောပြော ကျူရှင်ပြသွားဖို့ စီစဉ်ထားပါတယ်။ ”
တောင်ကုတ်မြို့ ဦးဥက္တမဈေး အနီးက အင်ဂျင်နီယာ တဦးကလည်း “ ကျွန်တော်က အီလက်ထရောနစ် အင်ဂျင်နီယာတ ယောက် ဖြစ်ပါတယ်။ လစာက တလကို ၆၀၀၀၀ ကျပ် ရပါတယ်။ မိသားစု များတော့ ဒီလစာနဲ့ မလုံ လောက်ဘူး။ မဖြစ်သာ လို့သာ လုပ်နေရတာပါ” ဟုပြောသည်။
မြန်မာနိုင်ငံတွင် အစိုးရ အမှုထမ်းများ ဖြစ်ကြသည့် ကျောင်းဆရာ ဆရာမများ ၊ အင်ဂျာနီယာများ၊ တခြား ဌာနဆိုင်ရာ ၀န်ထမ်းများ၊ သူနာပြု သားဖွား ဆရာမနှင့် အောက်ခြေရှိ စစ်သားများနှင့် ရဲသားများ အစိုးရမှ ပေးသော လစာဖြင့် မလုံလောက်သဖြင့် ဆင်းရဲ ကျပ်တည်းမှု အဖုံဖုံကို ရင်ဆိုင်ပြီး ဘ၀ကို ရုန်းကန် နေကြရကြောင်း သိရှိရသည်။
Subscribe to:
Post Comments (Atom)
No comments:
Post a Comment