လူထုစည်းရုံးရေး ခရီးစဉ်များ အာဏာပိုင်တို့ စောင့်ကြပ်

နိုင်ငံရေးပါတီများ၏ စည်းရုံးရေးခရီးစဉ်များ၊ ပြည်သူလူထုနှင့် တွေ့ဆုံပွဲများတွင် ဒေသဆိုင်ရာ အာဏာပိုင်များက နောက်မှ လိုက်လံစောင့်ကြပ် မှတ်တမ်းတင်မှုကြောင့် ပါတီများ စည်းရုံးရန် ခက်ခဲနေသည်။

စည်းရုံးရေး ခရီးစဉ်များတွင် စစ်အစိုးရအာဏာပိုင်များက လိုက်လံစောင့်ကြပ်နေခြင်းကြောင့် ရွေးကောက်ပွဲ အကြိုကာလတွင် နိုင်ငံရေးပါတီများမှ စည်းရုံးရေးမှူးများနှင့် ပြည်သူလူထု လွတ်လွတ်လပ်လပ် မဆွေးနွေးရဲဘဲ ဖြစ်နေသည်ဟု ဒီမိုကရက်တစ် ပါတီ (မြန်မာပြည်) ဥက္ကဋ္ဌ ဦးသုဝေက ပြောကြားသည်။

“နောက်က တကောက်ကောက်လိုက်ပြီး မေးတာ ကျနော်တို့ကတော့ ဘာမှကိစ္စမရှိဘူး။ ဒါပေမယ့် အရပ်သားတွေကျတော့ စိုးရိမ်တာပေါ့၊ ကြောက်တာပေါ့နော်။ အဲဒါမျိုးတွေကို မလုပ်စေချင်ဘူးပေါ့နော် ” ဟု ၎င်းက ပြောသည်။

ဒေသဆိုင်ရာ အာဏာပိုင်များက ပါတီစည်းရုံးရေးမှူးများနောက် ထပ်ကြပ်မကွာ လိုက်ပါနေပြီး လူထုတွေ့ဆုံ စည်းရုံးပွဲများတွင်လည်း ဘေးမှထိုင်ကာ စောင့်ကြည့် သတင်းယူနေမှုကြောင့် ပြည်သူလူထုနှင့် နိုင်ငံရေးပါတီများ လွတ်လွတ်လပ်လပ် ဟောပြောဆွေးနွေးခွင့် မရရှိဘဲ ဖြစ်နေသည်ဟု ၎င်းက ဆိုသည်။

ပြည်ထောင်စု ဒီမိုကရေစီပါတီ ဥက္ကဋ္ဌ ဦးဖြိုးမင်းသိန်းကမူ နိုင်ငံရေးပါတီများ စည်းရုံးရေး ဥပဒေကြောင့် နှစ်ပေါင်း (၂၀) ကျော်အတွင်း မရရှိဖူးသည့် လူထုစည်းဝေးတွေ့ဆုံပွဲများ လုပ်ဆောင်လာနိုင်မည်ဟု အကောင်းဘက်က ရှုမြင်သုံးသပ်၍ ရသော်လည်း ရွေးကောက်ပွဲကော်မရှင်၏ စည်းကမ်းများမှာ တင်းကျပ်လွန်းလှသည်ဟု ပြောဆိုသည်။

လွတ်လပ်ပြီး တရားမျှတသည့် ရွေးကောက်ပွဲဖြစ်ရန် နိုင်ငံရေးပါတီများကို လွတ်လွတ်လပ်လပ် စည်းရုံးလှုပ်ရှားခွင့် ပေးသင့်ကြောင်း ဦးသုဝေက ပြောကြားသည်။

၎င်းက “ရွေးကောက်ပွဲမှာလည်း တရားမျှမျှတတ ဖြစ်စေချင်တာပေါ့။ လွတ်လည်း လွတ်လပ်ရမယ်၊ တရားလည်း မျှတရမယ်။ ဖြစ်ချင်တော့ အခုနေခါမှာ ကျနော်တို့ စည်းရုံးရေး ဘာညာ ဆင်းတဲ့အခါမှာ အာဏာပိုင်တွေက ခပ်ခွာခွာနေပေါ့ဗျာ။ ကျနော်တို့ သတင်းယူချင်လည်း နောက်ပြီးတော့မှ မေးပေါ့” ဟု ပြောသည်။

ယခုကဲ့သို့ နိုင်ငံရေးပါတီများကို စည်းရုံးလှုပ်ရှားခွင့် ပုံနှိပ်ထုတ်ဝေခွင့်အတွက် စည်းကမ်းများ တင်းကျပ်ထားသော်လည်း ကြံ့ဖွံ့ပါတီကမူ ပြည်သူလူထုက မထောက်ခံသည့်တိုင် အာဏာသုံးကာ ပါတီဝင်များ စုဆောင်းနေကြောင်း နိုင်ငံရေးသမားများက ထောက်ပြပြောဆိုသည်။

ခေတ်ပြိုင်သတင်းထောက် စိုးမိုး ရေးသားသည်။