လူနာများအား ဂရုမစိုက်သည့် နမ့်ခမ်းဆေးရုံ ခြောက်ကပ်

လူနာများအပေါ် ဂရုစိုက်မှု နည်းပါးသည်ဟု သတင်းကြီးနေသဖြင့် ဆေးကုသခံယူလိုသူများ သွားရောက်မှုသိပ် မရှိတော့ ဘဲ သျှမ်းပြည်(မြောက်ပိုင်း) နမ့်ခမ်းမြို့ ပြည်သူ့ဆေးရုံကြီး ခြောက်ကပ်လျှက်ရှိကြောင်း သိရသည်။
ဧပြီလကုန်ပိုင်းက နမ့်ခမ်းဆေးရုံတွင် မွေးလူနာဒေါ်ခမ်းရှင် ဗိုက်ခွဲမွေးစဉ် မိခင်ရောကလေးပါသေဆုံးမှုဖြစ်ပွားပြီး နောက် ပိုင်း သွားရောက် ဆေးကုခံယူသူ သိသိသာသာနည်းပါးလာကြောင်း ဆေးရုံဝန်ထမ်းအသိုင်းအ၀ိုင်းက သျှမ်းသံတော်ဆင့် သို့ ပြောသည်။

ဆေးရုံသို့ လူနာသိပ်မလာတော့သည့်ကိစ္စနှင့်ပတ်သက်၍ နအဖကာကွယ်ရေးဝန်ကြီးဋ္ဌာနမှ ဒု-ဗိုလ်ချုပ်ကြီးမင်းအောင်လှိုင် စုံစမ်းမေးမြန်းမှု ပြုလုပ်ခဲ့သေးကြောင်း ဆေးရုံဝန်ထမ်းနှင့်နီးစပ်သူ တစ်ဦးက ပြောသည်။

“မနေ့က တိုင်းချုပ်ရဲ့နမ့်ခမ်းခရီးစဉ်မှာ ဆေးရုံကိုလာကြည့်သွားတယ်။ ဆေးရုံမှာလူနာမရှိပဲ ခြောက်ကပ်နေတော့ လူနာ တွေ ဘာကြောင့်မရှိတာလည်းလို့မေးတယ်။ ဆေးရုံမှာဗိုက်ခွဲမွေးလို့သေသွားတဲ့ကိစ္စကြောင့်လားလို့မေးတယ်။ ဆေးရုံတာ ၀န်ရှိ သူတွေက ဘာမှတော့ပြန်မပြောဘူး ” ဟု သူက ဆိုသည်။

ဆေးရုံတွင်လူနာနည်းရသည့် နောက်ထပ်အကြောင်းတစ်ခုမှာ ယခုအခါ နမ့်ခမ်းမြို့ပေါ်တွင် ပုဂ္ဂလိက ဆေးခန်း အမြောက် အများ ဖွင့်လှစ်လာ၍လည်း ဖြစ်ကြောင်း သူက ဆက်ပြောသည်။

“ဆေးရုံက ဆရာဝန်တွေကိုယ်တိုင် ပြင်ပမှာဆေးခန်းဖွင့်တော့ တော်ရုံဖျားတာနာတာက အပြင်မှာပဲကုသကြတာပေါ့ ပြင်ပဆေးခန်းကတော့ ၈ ခုလောက်ရှိတယ်။ ခွဲစိတ်နိုင်တာက ၂ ခုရှိတယ် ” ဟု ဆိုသည်။

ဒေသခံအများစုက နမ့်ခမ်းဆေးရုံတွင် ခွဲစိတ်ကုသမှုခံယူရန် မလိုလားကြကြောင်း ဒေသခံတစ်ဦးကပြောသည်။


“ ဆေးရုံက ကောင်းကောင်းမွန်မွန်ကုမပေးဘူး၊ မွေးလူနာဗိုက်ခွဲမွေးမယ်ဆိုရင် ကြိုတင်ငွေ ၃ သောင်းအရင်ပေးရတယ် ငွေမပေးရင်လုံးဝဂရုမစိုက်တော့ဘူး အရင်မွေးလူနာသေပြီးနောက်ပိုင်းဆို ခွဲမွေးတာဆို ဆေးရုံကလက်မခံတော့ဘူး မူစယ် ဆေးရုံ ကိုပဲလွတ်တယ်၊ အခုဆို မူစယ်ကိုသွားကြတာများတယ်” ဟု ဒေသခံက ဆိုသည်။

နမ့်ခမ်းမြို့သည် တရုတ်နယ်စပ်နှင့် ကပ်နေသောကြောင့် ရောဂါအသည်းအသန်ဖြစ်သူများအနေဖြင့် တရုတ်ဆေးရုံများ သို့သွား ရောက်ကြကြောင်း သိရသည်။

နယ်စပ်ဒေသများတွင် ကူးစက်ရောဂါများ လျှင်မြန်စွာ ပြန့်ပွားလွယ်သော်လည်း ကျန်းမာရေးကဏ္ဍအတွက် နအဖ စစ်အုပ်စု အသုံးပြုငွေမှာ တိုင်းပြည်ဝင်ငွေ၏ ၀.၄ ရာခိုင်နူန်းသာရှိကြောင်း နိုင်ငံတကာလေ့လာရေးအဖွဲ့များ၏ အစီရင်ခံ စာများက ဆိုသည်။