Pages

Subscribe

Friday 9 July 2010

ယုဇနပလာဇာ ကားပါကင်တွင် ဆောက်လျက်ရှိ ဆိုင်ခန်း များ လွှဲပြောင်းမှု ကန့်သတ်

ယုဇန ပလာဇာရှိ ကား ပါကင်တွင် ဆိုင်ခန်း သစ်များ ဆောက်လုပ်လျက် ရှိပြီး ဈေး အတွင်း မူလ ရောင်းချလျက် ရှိသည့် ဆိုင်ခန်းများ လွှဲပြောင်း မှုကို ကန့်သတ်လျက် ရှိသည်။ ယုဇန ပလာဇာရှိ ကားပါကင် နေရာတွင် တိုးချဲ့ ဖွင့်လှစ်မည့် ဆိုင်ခန်းများ အားလုံး နီးပါးကို ယခင်က မင်္ဂလာ ဈေးတွင် ရောင်းချလျက် ရှိသည့် ဆိုင်ခန်းများမှ လာရောက် ငှားရမ်းကြရာ ဆိုင်ခန်းများ ဆောက်လုပ်၍ မပြီးစီးမီ ဆိုင်ခန်း အားလုံး နီးပါး ငှားရမ်းပြီး ဖြစ် ကြောင်း ယုဇနပလာဇာ အုပ်ချုပ်ရေး ကော်မတီ တာဝန်ရှိသူ တစ်ဦးက ဆိုသည်။ဆိုင်ခန်းတွေ ကတော့ ဆောက်လို့ မပြီးသေး ပါဘူး။ အခု ငှား ချင်တဲ့ သူတွေကိုက ပုံစံ အကြမ်း ပြပြီး လိုချင်တဲ့ နေရာကို ငှားတာပါ။ အထည် ရောင်းဖို့ အတွက် ဆိုင်ခန်းတွေ အားလုံး ကတော့ ငှားလို့ ကုန်သွား ပါပြီ။ ဆေး အရောင်းဆိုင် အတွက်က ဒီနေ့မှ စပြီး ငှားပေးတာ အခုဆိုရင် ဆိုင်ခန်းက ၁၀ ခန်း လောက်ပဲ ကျန်တော့ တယ်ဟု ယုဇန ပလာဇာ အုပ်ချုပ်ရေး ကော်မတီက ပြောသည်။

အဆိုပါ တိုးချဲ့ ဆိုင်ခန်း များတွင် လာရောက် ငှားရမ်း သူများမှာ မင်္ဂလာ ဈေးတွင် လက်ကား ရောင်းဝယ် လျက် ရှိသည့် ဆိုင်များမှ အများဆုံး လာရောက် ငှားရမ်းလျက် ရှိပြီး ဆေးအရောင်း ဆိုင်ခန်းများ တွင်လည်း ဆေးကုမ္ပဏီ ၁၀ ခုခန့် လာရောက် ငှားရမ်းပြီး ဖြစ်သည်။ ယုဇန ပလာဇာရှိ ကားပါကင် တိုးချဲ့ ဆိုင်ခန်း များကို ဇွန် ၁၁ ရက်မှ စပြီး စတင် ပြင်ဆင်ကာ ဇူလိုင်လ နောက်ဆုံး ပတ် အတွင်း အပြီးသတ် ဆောက်လုပ် သွားရန် ရည်ရွယ် ထားကာ ဆိုင်ခန်းများကို ယုဇန ပလာဇာရှိ ပထမထပ်၊ တတိယထပ် နှင့် စတုတ္ထထပ် တို့ရှိ ကား ပါကင် များတွင် ဆောက်လုပ်ထား ရှိသည်။

ထို့ပြင် ယုဇန ပလာဇာ တတိယ ထပ်တွင် ဖွင့်လှစ် ထားရှိသည့် စားသောက် ဆိုင်တန်းကို စတုတ္ထ ထပ်သို့ ပြောင်းရွှေ့ ဖွင့်လှစ် ရမည် ဖြစ်ပြီး မူလ နေရာတွင် ဆိုင်ခန်းများ တိုးချဲ့ ဆောက် လုပ်ကာ ငှားရမ်း သွားရန် စီစဉ် နေကြောင်း အဆိုပါ စားသောက် ဆိုင်တန်းမှ တာဝန်ရှိသူ တစ်ဦးကဆို သည်။ စားသောက် ဆိုင်တန်း တစ်ခုလုံး စတုတ္ထထပ် ကို ပြောင်းရွှေ့တော့ မှာပါ။ ဇူလိုင်လ ကုန်လောက် ရွှေ့ ဖြစ်ပါမယ်။ ပြောင်းရွှေ့လိုက်ရင်တော့ အခုလို ပုံစံမျိုး မဟုတ်ဘဲ ဒီဇိုင်း ဆန်းဆန်းနဲ့ အဆင့်မီ စားသောက် ဆိုင်တန်း ဖြစ်အောင် ပြုလုပ်သွားမှာပါ။ ပြောင်းရွှေ့ရမယ့် စရိတ် အပြင် ဆိုင်ရဲ့ ဒီဇိုင်း တွေလည်း ပြောင်းမယ် ဆိုပေမယ့် အစားအသောက်ရဲ့ ဈေးနှုန်းတွေကို ပြောင်း မပြောင်း ကတော့ အခုထိ မသတ်မှတ် ရသေးပါဘူးဟု ၄င်းက ဆိုသည်။

ယုဇန ပလာဇာရှိ တိုးချဲ့ ဆိုင်ခန်းများ၏ ဈေးနှုန်းမှာ ဆိုင်ခန်း အကျယ်နှင့် ဆိုင်ခန်း နေရာတို့ အပေါ်တွင် မူတည်ပြီး အနည်းဆုံး ၆ လခန့် ငှားရမ်း စာချုပ် ချုပ်ရမည် ဖြစ်ပြီး ယုဇနပလာဇာ အုပ်ချုပ်ရေး ကော်မတီတွင် သွားရောက် စုံစမ်း ငှားရမ်း နိုင်သည်။ မင်္ဂလာ ဈေး မီးလောင်ပြီး နောက်ပိုင်းတွင် ဈေးအတွင်း ရောင်းချလျက် ရှိသည့် ဆိုင်ခန်းများ အား မင်္ဂလာ ဈေးသစ်၊ မင်္ဂလာမွန်ဈေး နှင့် မင်္ဂလာဈေးသစ် အနီးရှိ ဘောလုံးကွင်း တွင် ယာယီ မင်္ဂလာ ဈေး တစ်ခု ဆောက်လုပ်ကာ ဆိုင်ခန်းများ နေရာချထား ပေးလျက် ရှိသည်။ ယာယီ မင်္ဂလာဈေးတွင် ရောင်းချလျက် ရှိသည့် ဆိုင်ခန်း များမှာလည်း ပစ္စည်းများ ထားရှိရန် မလွယ်ကူခြင်း ဆိုင်ခန်း ဖွင့်လှစ် ရောင်းချ ရာတွင် အဆင်မပြေမှု အချို့ကြောင့် ယုဇန ပလာဇာရှိ တိုးချဲ့ ဆိုင်ခန်းများကို ငှားရမ်း ကြခြင်း ဖြစ်သည်။

အခု လက်ရှိ ကျွန်တော်က ယာယီ မင်္ဂလာဈေးမှာ ဆိုင်ခန်း ဖွင့်ထားတယ်။ အဆင်သိပ် မပြေဘူး။ မင်္ဂလာဈေး ကလည်း ဘယ်တော့ေ လာက်မှ ပြန်ဖွင့်မယ် မသိတော့ ယုဇန ပလာဇာမှာပဲ ငှားလိုက် ပါတယ်။ အခု ကျွန်တော် ငှားထားတဲ့ နေရာ က အလယ်လောက် ကျတယ်။ ဆိုင်ခန်းက လကုန် အပြီး ဆောက်မယ် ပြောတယ်၊ ဘယ်တော့ ဆိုင်စဖွင့် ဖြစ်မလဲတော့ မသိသေးဘူးဟု အထည်ဆိုင် ဖွင့်ရန် ဆိုင်ခန်း ငှားရမ်းသူ တစ်ဦးက ပြောသည်။ ယုဇန ပလာဇာတွင် ဆိုင်ခန်း ငှားရမ်း လိုသူ များပြား လာသောကြောင့် ယုဇန ပလာဇာ အုပ်ချုပ်ရေး ကော်မတီမှ ၄င်းတို့ထံမှ ငှားရမ်း ထားရှိသည့် ဆိုင်ခန်း များကို ၄င်းတို့ မသိဘဲ တစ်ဆင့် ပြန်လည် ငှားရမ်း ခြင်းကို တွေ့ရှိပါက ဇူလိုင် ၁ ရက်မှ စပြီး ဆိုင်ခန်း ငှားရမ်းခ ငွေအား ပြန်မပေးဘဲ ဆိုင်ခန်း ပိတ်သိမ်းပြီး အရေးယူ သွားမည် ဖြစ်ကြောင်း ထပ်မံ၍ ကြေညာချက် ထုတ်ပြန် ထားသည်။ မင်္ဂလာဈေး မီးလောင်ပြီး နောက်ပိုင်းတွင် ယုဇန ပလာဇာ နှင့် ယင်းအနီးရှိ နေရာများ၊ တော်ဝင် ပလာဇာ တို့တွင် ဆိုင်ခန်းများ အများဆုံး ငှားရမ်း ရောင်းချလျက် ရှိသောကြောင့် ယုဇန ပလာဇာရှိ ပုဂ္ဂလိကပိုင် ဆိုင်ခန်း များမှာ ငှားရမ်း ခနှုန်း မြင့်တက် သွားပြီး ယုဇန ပလာဇာမှ တိုက်ရိုက် ငှားရမ်းသည့် ဆိုင်ခန်း ငှားရမ်းခ နှုန်းမှာ ပြောင်းလဲမှု မရှိကြောင်း တွေ့ရသည်။

No comments:

Post a Comment